Dumonda Parpan concernent la sanaziun termica d'edifizis existents e concernent l'effizienza da l'energia
Sessiun: 13.06.2007
I vegn adina puspè accentuà, quant gronda che saja la part d'emissiuns da CO2 che sorta d'edifizis existents che n'èn betg isolads u ch'èn isolads mal. Er l'uffizi federal d'energia vesa il potenzial il pli grond da spargnar energia en il sectur da la sanaziun termica d'edifizis existents. Sche l'impressiun constat, èn percunter las patrunas ed ils patruns da construcziun per gronda part conscients da las dumondas d'energia tar edifizis novs.
Er or da l'optica da la politica da mastergn ed or da l'optica da l'economia publica interessan en quest connex las suandantas dumondas:
1. Quant grond stima il chantun il dumber d'edifizis ch'èn en cumparegliaziun cun edifizis novs insuffizients areguard l'energia?
2. Co statti cun l'effizienza da l'energia tar ils edifizis chantunals?
3. Quantas sanaziuns d'edifizis han pudì vegnir sustegnidas en il passà cun quants meds finanzials chantunals? Quant gronda è ina contribuziun chantunala en media?
4. È er il chantun da l'avis ch'i saja raschunaivel da sustegnair sanaziuns d'edifizis cun la finamira da reducir il basegn d'energia, e quai tant or da l'optica da la politica da mastergn sco er or da l'optica da la politica d'energia? Basta il program da promoziun dal chantun sco impuls per quest intent?
5. È il program da promoziun enconuschent avunda tar las proprietarias u tar ils proprietaris d'edifizis?
Cuira, ils 13 da zercladur 2007
Name: Parpan, Conrad, Pfäffli, Berther (Mustér), Blumenthal, Brantschen, Casty, Dudli, Fallet, Felix, Geisseler, Montalta, Quinter, Rizzi, Troncana-Sauer, Vetsch (Pragg-Jenaz), Hauser
Session: 13.06.2007
Vorstoss: rg Anfrage
Resposta da la regenza
1. Il consum d'energia per il stgaudament e per l'aua chauda da tut ils edifizis importa en Svizra var 45 pertschient dal basegn d'energia. En cumparegliaziun cun edifizis novs d'ozendi han var dus terzs da tut ils edifizis ina isolaziun termica manglusa. Questas relaziuns dastgassan esser il cas er per il Grischun.
2. Actualmain posseda il chantun 743 construcziuns autas, tranter quellas fitg blers edifizis pitschens senza impurtanza energetica. Per mantegnair e per reparar tut ils edifizis ch'il chantun posseda ha l'uffizi da construcziun auta a disposiziun 7,5 milliuns francs per onn. Per la gestiun dals edifizis vegn elavurà dapi l'onn 2006 in sistem da "facility management" che duai garantir che las immobiglias vegnian administradas en moda effizienta, economica ed activa, e quai resguardond l'effizienza da l'energia.
Tar edifizis dal chantun e tar edifizis che vegnan subvenziunads dal chantun ston edifizis novs sutpassar las limitas tenor la norma da la SIA 380/1, ed edifizis existents ston ademplir las limitas per edifizis novs. Tar concurrenzas da projects è previs obligatoricamain il criteri "energia". Edifizis novs correspundan bunamain adina al standard da MINERGIE (tranter auter la basa principala resp. l'edifizi da l'administraziun a Glion; la directiva per sanar la scola chantunala a Cuira).
3. Dapi l'onn 1994 fin la fin da l'onn 2006 èn vegnidas sustegnidas en il chantun 704 sanaziuns d'edifizis e meglieraziuns dal grad d'utilisaziun, e quai cun contribuziuns da totalmain 13.7 milliuns francs. Quellas èn stadas colliadas cun investiziuns privatas en l'autezza da var 185 milliuns francs. La media da las contribuziuns chantunalas per mintga object importa pia stgars 19'500 francs, quai che correspunda ad ina quota da 7.4 pertschient da l'investiziun. L'autezza da la contribuziun dependa da la grondezza da l'object e da la reducziun dal basegn d'energia. Uschia exista ina motivaziun da reducir il basegn d'energia uschè bain sco pussaivel e da profitar tras quai da contribuziuns pli grondas.
En la pratica variescha la quota da l'investiziun tranter 5 e passa 20 pertschient.
4. Il potenzial il pli grond per reducir il basegn d'energia sa chatta en il sectur da l'edifizi. Edifizis che adempleschan las pretensiuns legalas per survegnir contribuziuns chantunalas dovran suenter la sanaziun en media mo pli la mesadad da l'energia. La qualitad energetica dals mirs exteriurs d'in object sanà e promovì correspunda a la qualitad d'edifizis novs. Cun il program da promoziun han ins spargnà fin ussa en tut ina quantitad d'energia che correspunda annualmain a passa 2'800 tonnas ieli per onn. En la gronda part dals cas vegnan sanaziuns d'edifizis planisadas e realisadas tras forzas spezialisadas localas. Uschia ha il program da promoziun er in effect positiv per la situaziun da l'occupaziun. Il success vertent dal program da promoziun mussa ch'ils impuls finanzials correspundan a la dumonda sin il martgà. I na po betg vegnir exclus che l'augment dals pretschs d'energia vegnian anc ad engrondir la dumonda.
5. Dapi l'onn 1994 vegn il program da promoziun purschì senza interrupziun ed en furma praticamain identica. En il rom da l'activitad d'infurmaziun renda l'uffizi d'energia adina puspè attent a quest program. Mo quest onn han ins publitgà plirs artitgels en las gasettas dal di, en il "Bündner Wohneigentum" e.u.v., ha tegnì numerus referats, è sa participà ad exposiziuns ed ha dà intervistas. Las pussaivladads da promoziun vegnan medemamain explitgadas al public interessà a chaschun da referats, p.ex. tar l'apero d'energia che ha lieu trais fin quatter giadas per onn. Ils documents cumplets stattan a disposiziun sin la pagina d'internet da l'uffizi. Ins dastga far quint ch'il program da promoziun saja fitg bain enconuschent tar la gronda part da las persunas dal fatg.
Datum: 31 d'avust 2007