Navigation

Inhaltsbereich

Dumonda Loepfe concernent ina "zona d'economia speziala" en il Grischun

Sessiun: 13.06.2007
Tenor la litteratura correspundenta èn zonas d'economia spezialas regiuns geograficas entaifer in stadi, en las qualas la legislaziun davart il dretg economic e davart il dretg fiscal è autra ch'en il rest da quest stadi. Sco zonas d'economia spezialas pon per exempel vegnir numnadas exclavas da duana sco Samignun. L'intent da stgaffir talas zonas è quel d'augmentar las investiziuns naziunalas ed internaziunalas. Zonas d'economia spezialas èn vegnidas installadas cun success tranter auter en China, en India, en Russia ed en Pologna. En Germania han ins discutà e discutan ins puspè, sch'ina zona d'economia speziala duai vegnir installada en tschertas parts da la Germania da l'ost, vul dir en territoris da l'anteriura Republica democratica tudestga (RDT). Ina gruppa d'expertas e d'experts ch'è vegnida convocada da la regenza e ch'è sa constituida enturn l'anteriur president da la citad Klaus von Dohnanyi pleda per l'installaziun d'ina tala zona.

La dumonda, co ch'ins po stgaffir novas plazzas da lavur en territoris perifers cun ina structura economica che n'è betg equilibrada, e quai cun attrair intenziunadamain investiziuns, è ina da las dumondas centralas per il chantun Grischun. Il rapport da federalissem dal lavuratori d'ideas „avenir suisse„ ha mussà ch'ils territoris perifers na pon betg far quint che las regiuns metropolitanas ed economicamain fermas als sustegnian en moda federal-amicabla a lunga vista. En quest connex è gia vegnì discurrì da la "depopulaziun en dignitad da las valladas". Il medem mument pretenda la nova politica regiunala da la confederaziun in agid activ per gidar sasez. L'idea d'installar zonas d'economia spezialas è vegnida formulada per l'emprima giada en in document da posiziun da la PCD l'onn 2006. Il mars 2007 è quella idea alura vegnida preschentada dal forum economic dal Grischun en il rom d'in referat davart la situaziun economica da la Surselva e restrenschida a tscherts territoris.

Las petentas ed ils petents sa drizzan pervia da quai a la regenza cun la finamira d'eruir, sch'il potenzial è avant maun e sch'igl è pussaivel da realisar zonas d'economia spezialas en il senn da l'agid a sasez, e quai per evitar che las valladas sa depopuleschian e per mantegnair la colonisaziun decentrala dals territoris perifers. Talas zonas d'economia spezialas duain s'orientar a las suandantas finamiras:

- svilup economic d'ina part dal territori chantunal cun sviluppar tscherts roms industrials ch'èn orientads a l'export, sviluppar novas soluziuns tecnicas e tecnologicas e las applitgar en l'economia publica
- meglierar la cumpetitivitad globala dals products che vegnan fabritgads e dals servetschs che vegnan prestads
- stgaffir novas plazzas da lavur
- economisar las resursas che na vegnan betg utilisadas, e quai resguardond ils princips d'in equiliber ecologic

En quest connex tschentain nus las suandantas dumondas a la regenza:

1. Co pudessan vegnir definidas zonas d'economia spezialas per il chantun Grischun en il rom dal dretg federal e da la constituziun chantunala, e quai concernent l'utilisaziun economica, concernent las cundiziuns da basa fiscalas, concernent las pretensiuns da la protecziun da l'ambient, concernent las directivas da la planisaziun dal territori, concernent la simplificaziun da proceduras e concernent ils meds finanzials da promoziun?

2. Tge basas legalas chantunalas stuessan en quest connex vegnir revedidas u stgaffidas?

3. Tge regiuns e tge territoris vegnissan en dumonda tenor la regenza per l'installaziun da zonas d'economia spezialas, e quai resguardond las resursas ch'èn avant maun, la savida e l'avertura per il traffic?

4. A partir da cura pudess vegnir fatg quint che zonas d'economia spezialas vegnan installadas en il Grischun?

Cuira, ils 13 da zercladur 2007

Name: Loepfe, Geisseler, Hartmann (Champfèr), Augustin, Bachmann, Barandun, Berni, Berther (Mustér), Berther (Sedrun), Bezzola (Zernez), Bleiker, Blumenthal, Bondolfi, Brandenburger, Brantschen, Brüesch, Buchli, Bundi, Butzerin, Caduff, Cahannes Renggli, Campell, Candinas, Casparis-Nigg, Castelberg-Fleischhauer, Casty, Casutt, Caviezel (Pitasch), Cavigelli, Conrad, Darms-Landolt, Dermont, Farrér, Felix, Florin-Caluori, Hanimann, Hartmann (Cuira), Hasler, Kessler, Kleis-Kümin, Kollegger, Kunz, Marti, Mengotti, Parolini, Pfäffli, Pfister, Plozza, Portner, Quinter, Sax, Stoffel, Tenchio, Thomann, Thurner-Steier, Troncana-Sauer, Tuor, Valär, Zanetti, Joos, Just, Kunz (Fläsch), Hauser

Session: 13.06.2007
Vorstoss: rg Anfrage


Resposta da la regenza

En il rom da la nova politica regiunala (NPR) tematisescha la confederaziun il tractament futur da "regiuns periferas che n'èn betg bain cuntanschiblas". Per sviluppar e per promover talas regiuns propona la confederaziun in agir, tenor il qual i duai l'emprim vegnir fatga ina selecziun ed ina categorisaziun, suenter duai alura vegnir fixada ina strategia chantunala. Il chantun Grischun ha tractà questa tematica ensemen cun il chantun Uri ed ha lantschà in project da pilot correspundent cun il num "spazis cun pauc potenzial dal Grischun/da l'Uri, tractament da potenzials betg utilisads". Il rapport da l'emprima fasa (definiziun e basa) è avant maun dapi l'atun 2006, ils resultats da la segunda fasa (concretisaziun) vegnan preschentads a la regenza fin la fin da l'onn 2007.

Ina strategia da svilup pussaivla per spazis cun pauc potenzial s'occupa da la "basa per il svilup ch'è sa midada". Latiers pon er vegnir quintadas zonas spezialas resp. zonas d'economia spezialas. In tal "tractament spezial" duess star en in connex direct cun ils potenzials regiunals. Ina interpretaziun differenziada respectivamain champs d'applicaziun che tegnan quint da la cuntrada enconuschan ins per exempel da la lescha federala davart agids d'investiziun per territoris da muntogna u dal conclus federal davart zonas economicas che ston vegnir renovadas (conclus da Bonny).

La concepziun da la zona d'economia speziala sa basa sin la ponderaziun che la legislaziun saja fatga per regla per las relaziuns e per ils giavischs da l'aglomeraziun, en la quala il svilup economic e social cuntinuescha ad in cuntinuar e na po uschia betg tegnair quint da las relaziuns en las regiuns che na sa sviluppan strusch u che sa depopuleschan schizunt. Chaussas che n'èn betg egualas na duain betg vegnir tractadas en moda eguala.

L'installaziun da zonas d'economia spezialas pudess esser ina mesira en il rom da la realisaziun da strategias per tractar spazis cun pauc potenzial. Pia stattan quests spazis en il center. Sche l'instrument d'ina "zona speziala" è er applitgabel per autras regiuns u per autras valladas, sto vegnir eruì tras ulteriurs scleriments. Per exempel en connex cun la tematica da las segundas abitaziuns pudessi esser inditgà da proceder en ina moda e maniera che tegna quint da las regiuns.

Tar las dumondas:

1. Il segund rapport "strategias per tractar spazis cun pauc potenzial dal Grischun/ da l'Uri", tar il qual coopereschan er posts federals da differentas politicas secturialas, vegn preschentà a la regenza pir vers la fin da l'onn 2007. Incumbensas per concretisar pli detagliadamain zonas d'economia spezialas vegnan repartidas pir en la fasa da project che suonda. Ponderaziuns concretas davart ina interpretaziun da leschas ch'è differenziada en quai che reguarda il spazi n'èn pia anc betg vegnidas fatgas. Igl è imaginabel ch'ina disposiziun speziala vegnia integrada en tschertas leschas e ch'ina tala permettess ina divergenza generala u situativa da la norma en spazis definids. Questa divergenza fiss dentant accordada cun l'utilisaziun da potenzials specifics.

2. En il stadi actual dal project n'è betg avant maun ina glista da basas giuridicas chantunalas che stuessan vegnir revedidas u stgaffidas.

3. Las ponderaziuns actualas sa concentreschan sin ils uschenumnads spazis cun pauc potenzial. Sche er autras regiuns en il chantun Grischun duain vegnir en dumonda per installar zonas spezialas, è anc avert actualmain. En il focus da las ponderaziuns actualas stat l'utilisaziun da potenzials per pudair far frunt al svilup disfavuraivel en tschertas regiuns.

4. Confurm al stadi dal project n'è betg anc avant maun in urari per installar zonas d'economia spezialas en il Grischun. En il rom dals ulteriurs pass dal project "spazis cun pauc potenzial" vegn la regenza a sa fatschentar cun la concretisaziun dal tractament da potenzials betg utilisads en il Grischun e cun la tematica da las "zonas d'economia spezialas". Soluziuns a curta vista na pon betg vegnir spetgadas, perquai ch'ins sto far quint che leschas stuessan vegnir midadas.

Datum: 7 da settember 2007