Navigation

Inhaltsbereich

Dumonda Niederer concernent la violenza ed il vandalissem da giuvenils

Sessiun: 13.06.2007
Mintga di ans infurmeschan las medias da giuvenils violents che destrueschan tut. Mintgatant avain nus er sezs u persunas che ans èn enconuschentas stuì far nauschas experientschas en quest reguard. Cun spavent constatain nus las consequenzas per las victimas.

Tenor las cifras da l'uffizi federal per statistica han las procuras per giuvenils e las dretgiras per giuvenils sentenzià l'onn 2003 stgars 10% dapli persunas minorennas che anc l'onn 1999. Las sentenzias penalas èn succedidas per gronda part pervia d'enguladitschs u pervia da donns materials e pervia da cuntravenziuns cunter la lescha federala davart ils narcotics e las substanzas psicotropas. Tenor il UST è il dumber da las persunas sentenziadas pervia da violenza s'augmentà fermamain. Il dumber da las sentenzias pervia da delicts da violenza è s'augmentà dapi l'onn 2003 per 40% pertschient. 39% da las persunas sentenziadas l'onn 2003 èn persunas da l'exteriur. Tenor las cifras las pli novas n'è la situaziun betg sa midada fermamain da l'onn 2003 fin l'onn 2006.

Per far frunt a la violenza da giuvenils dovri l'engaschament da tut las forzas da la societad sco geniturs, scolas, stadi, societad ed economia. Plinavant dovri pass concrets che mussan als uffants ed als giuvenils autras vias per sa far valair, che als mettan dentant er cunfins e che chastian consequentamain cumportaments sbagliads. Nossas normas fundamentalas e nossas valurs ston vegnir transmessas en ina meglra moda. Sche geniturs n'èn betg abels d'ademplir lur obligaziuns educativas, ston els vegnir sustegnids cun tut las forzas. Sche geniturs na vulan betg, stuain nus pretender dad els la cuntraprestaziun ch'els debiteschan a la societad. Igl è er necessari da gidar las persunas pertutgadas or da la spirala da la violenza, da far mediaziun, da porscher agid d'integraziun sco er d'amplifitgar la purschida da plazzas d'emprendissadi.
In problem uschè cumplex sco la violenza da giuvenils ed il vandalissem pon ins tractar mo en moda cumplessiva. Perquai fai basegn da mesiras preventivas e repressivas. I dovra dentant er mesiras per manar ils giuvenils or da la spirala da la violenza e per sminuir las consequenzas da la violenza, e quai tant per las victimas sco er per las persunas che fan il delict.

Sin fundament da las explicaziuns qua survart supplitgeschan las sutsegnadras ed ils sutsegnaders la regenza da dar resposta a las suandantas dumondas:

1. Co è la situaziun en Grischun areguard la violenza ed areguard il vandalissem?

2. Tge mesiras preventivas ha la regenza prendì cunter la violenza da giuvenils?

3. La preschientscha da la polizia para en blers chantuns in med cumprovà cunter la violenza da giuvenils. Tge pensa la regenza en connex cun crear ina polizia scolada aposta per giuvenils?

4. Tge pussaivladads ha la regenza per gidar giuvenils da sortir da la spirala da violenza?

5. Tge pussaivladads datti en il chantun Grischun per sminuir las consequenzas da las victimas e da las persunas che fan il delict?

6. L'integraziun da giuvenils da l'exteriur para dad esser ina mesira impurtanta per evitar violenza da giuvenils. Tge interprenda la regenza en quest connex?

7. Co po la regenza sustegnair ad ura geniturs che na vegnan betg pli a frida cun lur uffants e giuvenils?

8. Co collavuran il chantun e las vischnancas en vista a questa problematica? Datti in potenzial da meglieraziun?

Cuira, ils 13 da zercladur 2007

Name: Niederer, Michel, Montalta, Augustin, Baselgia-Brunner, Berni, Berther (Sedrun), Blumenthal, Bondolfi, Brandenburger, Brantschen, Brüesch, Bundi, Butzerin, Caduff, Candinas, Casutt, Caviezel (Pitasch), Caviezel-Sutter (Tusaun), Cavigelli, Christoffel-Casty, Darms-Landolt, Dermont, Dudli, Fallet, Farrér, Felix, Feltscher, Florin-Caluori, Geisseler, Hardegger, Hartmann (Cuira), Hasler, Jäger, Keller, Kleis-Kümin, Koch, Kollegger, Mani-Heldstab, Mengotti, Möhr, Nick, Niederer, Noi-Togni, Parolini, Pedrini (Roveredo), Perl, Peyer, Pfister, Plozza, Portner, Quinter, Righetti, Rizzi, Sax, Stiffler, Stoffel, Tenchio, Thöny, Thurner-Steier, Trepp, Troncana-Sauer, Valär, Wettstein, Zanetti, Joos, Pedrini (Soazza), Jecklin-Jegen

Session: 13.06.2007
Vorstoss: rg Anfrage


Resposta da la regenza

Er en il chantun Grischun stattan ils temas "violenza da giuvenils" e "vandalissem" pli e pli fitg en il focus da la societad. Las dumondas che reguardan differents aspects da quest fenomen (la situaziun actuala, la prevenziun, las consequenzas e.u.v.) sa laschan respunder suandantamain:

1. La statistica criminala mussa: Quantitativamain è vegnì registrà en ils ultims onns tar la procura per giuvenils dal Grischun mo in augment minimal (resp. l'onn 2006 perfin ina reducziun) da cas da violenza da giuvenils (quai vul dir cas da violenzas, da blessuras corporalas, da dispitas, d'attatgas, da rapiments, da smanatschas e da constricziuns). Uschia èn vegnids sentenziads l'onn 2004 totalmain 37, l'onn 2005 41 e l'onn 2006 31 giuvenils pervia da delicts da violenza. L'emprim mez onn 2007 èn vegnids fatgs responsabels en tut 20 giuvenils pervia da delicts da violenza.
Qualitativamain è la violenza da giuvenils sa midada er en il Grischun. La violenza commessa è vegnida pli dira e pli brutala.

2. Mesiras preventivas cunter la violenza da giuvenils èn tranter auter: crear in post chantunal da consultaziun per dumondas da giuvenils tar l'uffizi per la scola populara ed il sport; tractar la tematica en il plan da la scola populara; purschidas dal servetsch psicologic da scola; installar ina cumissiun per la protecziun da l'uffant e per l'agid a giuvenils; porscher cussegliaziuns da famiglias e da giuvenils tras il servetsch social regiunal; trenament da conflicts per uffants e per giuvenils ch'èn pronts d'utilisar violenza tar il servetsch psichiatric per uffants e giuvenils dal Grischun (SPUG) e tar la crusch cotschna sco er l'incarica da prestaziun al center per prevenziun e promoziun da la sanadad (ZEPRA).

3. Tut tenor co che la violenza ed il vandalissem da giuvenils en il Grischun sa sviluppa èsi tranter auter da considerar er d'installar in servetsch spezialisà.

4. Sa basond sin la nova lescha federala davart il dretg penal per giuvenils pon a partir da la stad 2007 delinquentas giuvenilas e delinquents giuvenils vegnir obligads da sa participar a curs per prevegnir a la violenza. Cun l'entrada en vigur da la lescha federala davart las persunas estras exista (previsiblamain a partir da l'onn 2008) la pussaivladad da far ina cunvegna d'integraziun cun las cundiziuns correspundentas per giuvenils esters.

5. La victima ha ils dretgs tenor la lescha federala davart l'agid a victimas (tranter auter l'accumpagnament tras ils posts da cussegliaziun per victimas; l'assistenza giuridica; il dretg d'indemnisaziun e da satisfacziun). Plinavant prevesa la nova lescha federala davart il dretg penal per giuvenils ina procedura da mediaziun. En quest connex sa tracti da chattar ina soluziun gista e cuntentaivla, e quai tant per la delinquenta giuvenila u per il delinquent giuvenil sco er per la victima.

6. Per la regenza èsi impurtant ch'ils uffants e ch'ils giuvenils vegnian integrads en moda cumplessiva gia en scolina ed en scola. Questa tenuta è formulada tranter auter er en las directivas per promover uffants da lingua estra en il chantun Grischun dal december 2001. Dapi l'onn 1988 sustegna il chantun finanzialmain er il program d'integraziun "dopo scuola" da la cuminanza da lavur grischuna per l'assistenza da persunas estras. La creaziun d'in post per ina incumbensada u per in incumbensà per l'integraziun a partir da l'onn 2008 mussa supplementarmain la tenuta clera da la regenza areguard l'integraziun cumplessiva da persunas estras.

7. Sch'en il decurs d'ina procedura sa mussa tar la delinquenta giuvenila u tar il delinquent giuvenil in basegn da mesiras (deficits da l'educaziun, relaziun disturbada cun ils geniturs), prevesa la lescha federala davart il dretg penal per giuvenils la surveglianza (art. 12) e la cussegliaziun persunala (art. 13). Questas mesiras da protecziun duain sustegnair ils geniturs en lur incumbensa d'educaziun. Ordaifer la procedura penala per giuvenils valan las mesiras da protecziun da l'uffant tenor ils art. 307 ss. CCS.

8. Tranter il chantun e las differentas regiuns exista ina buna collavuraziun sin ils differents champs (cussegliaziun da famiglias e d'educaziun, polizia e.u.v.). Da las optimaziuns ch'èn vegnidas iniziadas en connex cun la lavur d'integraziun chantunala vegnan spetgadas ulteriuras meglieraziuns.

Datum: 7 da settember 2007