Navigation

Inhaltsbereich

Incumbensa Wettstein concernent il sustegn da la tgira d'uffants cumplementara a la scola tras il chantun

Sessiun: 13.06.2007
"Uffants ston vegnir tgirads ed accumpagnads. Per differents motivs na pon u na vulan blers geniturs betg surpigliar adina u cumplainamain sezs questa incumbensa. Per quest motiv è resultada la dumonda per purschidas da la tgira d'uffants cumplementara a la famiglia." Quai èn las frasas introductivas da la missiva tar la lescha davart la promoziun da la tgira d'uffants cumplementara a la famiglia en il chantun Grischun. Cun questa missiva ha la regenza proponì al cussegl grond da relaschar questa lescha, e quai sin basa d'ina moziun Robustelli ch'era vegnida acceptada l'atun 2002. En las explicaziuns vegn designà il fatg da sa restrenscher a la tgira d'uffants ordaifer la scola sco in punct central dal project, e quai cun l'argumentaziun ch'i fetschia prescha e ch'i saja pli simpel da stgaffir l'emprim ina soluziun per il sectur ordaifer la scola. In project communabel per ils secturs ordaifer ed entaifer la scola chaschunass in retardament (missivas, carnet nr. 5/2002-2003, p. 196).

Dapi lura èn passads prest tschintg onns. Las frasas introductivas da la missiva n'han pers nagut da lur actualitad e l'urgenza d'ina regulaziun è daventada anc pli gronda er per il sectur da la scola. Il grond augment da famiglias cun mo in genitur, la necessitad economica pli e pli gronda che omadus geniturs ston exercitar in'activitad da gudogn, ma er il basegn da dunnas e d'umens cun ina scolaziun meglra e meglra d'exercitar in'activitad da gudogn almain parziala, er sch'ellas e sch'els han uffants ch'èn obligads d'ir a scola tut quai chaschuna che la dumonda per purschidas da la tgira d'uffants cumplementara a la famiglia crescha ad in crescher.

En quest connex daventan purschidas da scolas dal di e purschidas d'instrucziun en uras da bloc medemamain pli impurtantas. Gist sin il stgalim da la scola primara n'è dentant ina instrucziun en uras da bloc dentant betg imaginabla senza ina buna purschida da tgira. Per quest motiv ha la confederaziun extendì expressivamain sia finanziaziun da partenza er sin la tgira cumplementara a la scola. En il chantun Grischun n'è quai actualmain betg pussaivel.

Cur ch'ins ha relaschà la lescha davart la promoziun da la tgira d'uffants cumplementara a la famiglia, partivan ins dal fatg ch'i suondian purschidas cumplementaras a la scola, sco p.ex. l'instrucziun da scola concepida en blocs. La deliberaziun dal rapport da famiglia en la sessiun da favrer dal cussegl grond ha mussà l'urgenza da purschidas correspundentas. Fin che midadas correspundentas vegnan realisadas en la legislaziun da scola, vai dentant memia ditg.

Sch'ina vischnanca sa decida oz d'endrizzar ina purschida da canortas, sto ella far quai senza il sustegn finanzial chantunal che fiss previs per la tgira d'uffants cumplementara a la famiglia, ubain vegn la vischnanca sfurzada a manipulaziuns giuridicas inadequatas.

In'extensiun da la promoziun da la tgira d'uffants cumplementara a la famiglia sin il sectur da la scola augmentass percunter la prontezza da las vischnancas da procurar per la purschida da canortas che vegn duvrada urgentamain e gidass uschia a realisar in postulat urgent ed impurtant da la politica da famiglia.
La regenza vegn perquai envidada da suttametter al cussegl grond ubain in project per garantir che la tgira d'uffants cumplementara a la scola vegnia subvenziunada ubain sco alternativa in project per extender la promoziun da la tgira d'uffants cumplementara a la famiglia sin il sectur da la scola. Il project duai garantir ch'ina finanziaziun subsidiara da plazzas da tgira che vegnan purschidas en canortas na vegnia betg mo messa a disposiziun ad instituziuns responsablas privatas, mabain er a vischnancas ed a corporaziuns da vischnancas.

Cuira, ils 13 da zercladur 2007

Name: Wettstein, Cahannes Renggli, Baselgia-Brunner, Arquint, Bachmann, Berther (Sedrun), Bischoff, Brandenburger, Brüesch, Bucher-Brini, Caduff, Casparis-Nigg, Caviezel-Sutter (Tusaun), Christoffel-Casty, Clavadetscher, Darms-Landolt, Feltscher, Florin-Caluori, Frigg-Walt, Gartmann-Albin, Hanimann, Hardegger, Hasler, Jaag, Jäger, Jenny, Kessler, Kleis-Kümin, Koch, Kollegger, Kunz (Cuira), Mani-Heldstab, Menge, Meyer Persili (Cuira), Meyer-Grass (Claustra), Möhr, Nick, Niederer, Noi-Togni, Pedrini, Perl, Peyer, Pfäffli, Pfenninger, Pfiffner-Bearth, Pfister, Portner, Quinter, Rathgeb, Rizzi, Stiffler, Thomann, Thöny, Thurner-Steier, Toschini, Trepp, Troncana-Sauer, Tuor, Vetsch, Just, Kunz (Fläsch), Joos

Session: 13.06.2007
Vorstoss: rg Auftrag


Resposta da la regenza

Questa incumbensa ha la finamira ch'il subvenziunament da la tgira d'uffants ch'è limità en la lescha davart la promoziun da la tgira d'uffants cumplementara a la famiglia en il chantun Grischun dals 18 da matg 2003 (DG 548.300) sin il sectur da la famiglia vegnia pussibilità uschè svelt sco pussaivel er en il sectur da la scola. En vista ad ina soluziun vegn la regenza "envidada da suttametter al cussegl grond ubain in project per garantir che la tgira d'uffants cumplementara a la scola vegnia subvenziunada ubain sco alternativa in project per extender la promoziun da la tgira d'uffants cumplementara a la famiglia sin il sectur da scola".

En il center da l'intervenziun stat l'emprova da satisfar tras ina suletta regulaziun a tut las dumondas che resultan en connex cun la finanziaziun da la tgira d'uffants tranter la chasa dals geniturs e la scola. Tractond questa dumonda stoi vegnir resguardà che la cumpetenza per la tgira d'uffants cumplementara a la famiglia e che la cumpetenza per la tgira d'uffants cumplementara a la scola èn domiciliadas sin differents plauns. Entant che las purschidas cumplementaras a la scola (uras da bloc, uras libras en l'urari, uras a l'ur e.u.v.) ch'èn previsas per tut ils uffants e ch'èn pia obligatoricas vegnan finanziadas da la scola, sa tracti tar la tgira d'uffants cumplementara a la famiglia (canorta, maisa da mezdi e.u.v.) da purschidas facultativas che na pertutgan betg tut ils uffants. Lur finanziaziun na tutga pia betg al champ da cumpetenza da la scola. Tenor l'avis da la regenza ston questas differentas cumpetenzas sa manifestar er en la regulaziun che vegn prendida en mira.
La regenza è da l'avis che la proposta da reglar il subvenziunament d'ina tgira d'uffants cumplementara a la scola tras in sulet project al cussegl grond, na mainia per il mument betg ad ina finamira. Il resultat fiss ina mesira singula che stuess vegnir repassada gia suenter in curt temp e vegnir integrada en la revisiun totala da la legislaziun da scola ch'è planisada per l'onn 2010.

Er la proposta alternativa d'extender sin il sectur da la scola la lescha davart la promoziun da la tgira d'uffants cumplementara a la famiglia ch'è vegnida messa en vigur l'onn 2003, na fiss betg ina soluziun adequata tenor l'avis da la regenza. In tala extensiun cuntraschess tant a la filosofia che la regenza e ch'il parlament avevan tschernì sapientivamain da lezzas uras, sco er a la sistematica da la lescha vertenta che sa basa sin questa filosofia. Quai chaschunass ina cuntschadira che stuess vegnir remessa gia suenter in curt temp en il rom da la proxima revisiun totala da la legislaziun da scola en ses stadi actual.

Tenor l'avis da la regenza è la meglra soluziun quella da considerar il subvenziunament da la tgira d'uffants cumplementara a la scola sco in element da la legislaziun da scola che sto vegnir revedida totalmain ils proxims onns. Cun las lavurs preparatoricas correspundentas poi vegnir cumenzà gia l'onn 2009, ed ellas pon vegnir coordinadas currentamain cun las autras novaziuns sco er cun il project da la NGF grischuna. In tal proceder pussibilitescha d'impunder effizientamain las resursas da temp, da daners e d'energia che stattan a disposiziun.

Tenor questas explicaziuns supplitgescha la regenza il cussegl grond d'acceptar l'incumbensa betg sco mesira singula, mabain sco ina part impurtanta da la proxima revisiun totala da la legislaziun da scola. En quest senn aveva il cussegl grond er discutà il rapport da famiglia.

Datum: 7 da settember 2007