Navigation

Inhaltsbereich

Incumbensa Feltscher concernent l'effizienza da l'energia en il chantun Grischun

Sessiun: 14.06.2007

La bumba climatica è explosiva! Tut las producentas e tut ils producents da CO2 vegnan a stuair pajar en il proxim avegnir. Las reservas d'ieli dad oz èn consumadas en 50 onns e n'èn gia ditg avant strusch pajablas. Ils pretschs d'ieli e tras quai tut ils pretschs d'energia vegnan a s'augmentar massivamain. Ina gronda part da l'ieli vegn consumà dal traffic. La legislaziun correspundenta è per gronda part chaussa federala e noss chantun la po influenzar mo marginalmain. Circa la mesadad da l'ieli vegn dentant duvrà per stgaudar e per abitar. Sur impuls e sur regulaziuns en la politica d'energia sco er sur prescripziuns en la legislaziun davart la planisaziun dal territori po il chantun fixar prescripziuns en questa situaziun, quai ch'el vul er far activamain tenor il punct central da svilup 17/17 dal program da la regenza. Anc avant 15 onns era noss chantun a la testa da la promoziun da l'effizienza da l'energia. Almain en l'Europa dal vest essan nus dentant vegnids surpassads lunschor. Il pajais federativ Vorarlberg p.ex. ha sviluppà in program per l'effizienza da l'energia che ha fitg grond success e che porta a lunga vista blers tschains, perquai che la valur agiuntada ch'è colliada cun tal en il sectur da construcziun e da cussegliaziun cumpensescha bel e bain las investiziuns dal stadi. Quai ch'è gist en il Vorarlberg, stuess en il temp da la revoluziun da l'energia er esser dretg en il Grischun. Tar edifizis novs pussibilitescha la tecnica dad oz standards d'energia passiva che chaschunan en cumbinaziun cun in confort d'abitar maximal e cun ina bellezza architectonica custs d'investiziun supplementars realistics da 3 8 %. Tras il respargn dals custs accessorics per la chalur e tras l'augment da la valur da l'edifizi a lunga vista vegnan cumpensadas questas investiziuns supplementaras a lunga vista.

La finamira principala da nossa intervenziun è da sensibilisar la populaziun dal chantun Grischun per l'effizienza da l'energia. Tras questa intervenziun duai vegnir sustegnida la via a la "societad da 2000 watts". Sche questa finamira na po betg vegnir cuntanschida dal tuttafatg pervia da las relaziuns da la topografia e da l'autezza dal chantun, èn las incumbensadras ed ils incumbensaders er cuntents. La contribuziun dal chantun a questa finamira sto succeder sur impuls, sur cussegliaziuns e sur prescripziuns per construir e per sanar edifizis en moda effizienta areguard l'energia: tar edifizis novs cun il standard da chasas passivas da MINERGIE (almain 10 giadas damain energia ch'ina chasa d'abitar da 30 onns) e tar sanaziuns cun il standard da MINERGIE (almain 4 giadas).

Las incumbensadras ed ils incumbensaders vulan surlaschar a la regenza, co ch'ella vul cuntanscher questas finamiras. Tuttina vulan ellas ed els proponer soluziuns pussaivlas betg definitivas:

1. Per edifizis novs duess vegnir stgaffì a curta vista ca. da l'onn 2008 fin l'onn 2012 in model d'impuls per iniziar cun contribuziuns da promoziun il standard da chasas passivas u in meglier standard. Ca. a partir da l'onn 2013 pudess il standard da chasas passivas vegnir prescrit tras la legislaziun davart la planisaziun dal territori. Cun determinar a temp il standard influenzass quai ils edifizis ed er la scolaziun da las spezialistas e dals spezialists. Contribuziuns d'impuls correspundentas pudessan vegnir finanziadas tras l'agio che vegn pajà da la banca chantunala grischuna. Possessuras e possessurs d'immobiglias retiran dal rest savens ipotecas da nossa banca chantunala.

2. A possessuras ed a possessurs d'immobiglias ch'èn innovativs vegnan concedidas deducziuns fiscalas pli autas fin l'onn 2012 durant in temp limità, sch'ina cumprova ecologica correspundenta d'auta qualitad è avant maun. En quest connex duai la certificaziun dals standards cuntanschids esser gratuita.

3. Il chantun e la cassa da pensiun chantunala duessan avair in effect da signal. Per edifizis novs duess vegnir previs il standard da chasas passivas, per sanaziuns il standard da MINERGIE.

4. Projects per la sanaziun da chasas che cuntanschan in meglier standard ch'il standard da MINERGIE pudess la lescha davart la planisaziun dal territori remunerar cun ina cifra d'utilisaziun resp. cun ina cifra da volumen da construcziun pli auta. La cifra d'utilisaziun resp. la cifra da volumen da construcziun duess ultra da quai vegnir calculada per las mesiras interiuras.

5. Il chantun duess promover projects da scolaziun, da know-how u da perscrutaziun en il sectur d'edifizis ch'èn effizients areguard l'energia, e quai cun endrizzar in center da cumpetenza correspundent e cun collavurar cun la cuminanza svizra d'infurmaziun per la chasa passiva.
Nus supplitgain la regenza da prender las mesiras correspundentas per promover immediatamain la construcziun da chasas novas passivas e projects da sanaziun da MINERGIE sco er per introducir en general il standard da chasas passivas per edifizis novs entaifer main che 10 onns a partir dad oz e sch'ella è da l'avis che quai saja necessari da preschentar in rapport cumplessiv fin l'onn 2009. En quest connex duai la regenza tuttavia tegnair quint da las relaziuns topograficas (autezzas) e dals basegns spezials d'edifizis veglianders e d'edifizis istorics.

Cuira, ils 14 da zercladur 2007

Name: Feltscher, Hanimann, Rathgeb, Bachmann, Barandun, Bischoff, Casparis-Nigg, Caviezel (Pitasch), Clavadetscher, Hartmann (Cuira), Jenny, Kessler, Kunz (Cuira), Meyer-Grass (Claustra), Nick, Perl, Pfäffli, Rizzi, Thomann, Toschini, Valär, Vetsch, Wettstein, Hauser, Just, Kunz (Fläsch)

Session: 14.06.2007
Vorstoss: rg Auftrag



Resposta da la regenza

En la part lianta da l'intervenziun vegn la regenza supplitgada da far las adattaziuns necessarias en las leschas, per che las valurs energeticas d'ina chasa passiva da MINERGIE (qua sutvart: standard da MINERGIE-P) vegnian cuntanschidas obligatoricamain ed en general entaifer 10 onns tar edifizis novs e per ch'il standard da MINERGIE vegnia cuntanschì entaifer 10 onns tar sanaziuns. Ultra da quai stoppian vegnir prendidas las mesiras correspundentas "per promover immediatamain la construcziun da chasas novas passivas e projects da sanaziun da MINERGIE".

1. Il consum d'energia d'edifizis importa var 45 % dal basegn d'energia en Svizra. Agids per reducir il consum d'energia èn cunzunt la meglieraziun da la qualitad architectonica, l'augment da l'effizienza da l'energia ed il cumportament da las consumentas e dals consuments. Gia la lescha d'energia dal chantun Grischun remunerescha e promova edifizis che vegnan construids en moda effizienta areguard l'energia. En il rom da la repassada da las prescripziuns d'energia, ch'èn armonisadas tranter ils chantuns, èsi previs d'augmentar las pretensiuns energeticas che vegnan fatgas ad edifizis novs ed a midadas da construcziun. Sco nova finamira prevesa il sboz che la media annuala dal consum d'ieli da stgaudar (sco equivalent per auters purtaders d'energia) vegnia reducida tar edifizis novs e tar sanaziuns sumegliantas ad edifizis novs dad actualmain 9 l/m² a 4.8 l/m² surfatscha d'abitar. Areguard ils mirs exteriurs da l'edifizi correspunda questa valur a las prescripziuns d'edifizis da MINERGIE. Cumpareglià cun quai importa il consum d'ina chasa da MINERGIE-P 3 l/m². La regenza ha l'intenziun da surpigliar questas prescripziuns da model ch'èn vegnidas repassadas en quest senn, uschenavant ch'ellas pon er vegnir realisadas tecnicamain en il chantun Grischun. A medem temp duai vegnir examinà, tge impuls supplementars sco p.ex. in attest per l'edifizi sin basa voluntara che pon sustegnair la finamira incontestada da reducir il consum d'energia en edifizis.

2. La regenza refusescha dentant l'introducziun obligatorica e generala dal standard da MINERGIE-P entaifer 10 onns, perquai ch'ella considerescha questa idea sco nunrealistica. Per cuntanscher las valurs che vegnan prescrittas per l'isolaziun termica stuess in edifizi pudair vegnir enzuglià cun ina isolaziun termica d'ina grossezza da var 30 cm. Tras ina tala moda da construcziun vegniss la patruna u il patrun da construcziun sfurzà ad ina construcziun dal tuttafatg nova ed ad installaziuns da la tecnica da chasa cun gronda effizienza. Las restricziuns correspundentas areguard la libertad creativa ed areguard l'utilisaziun da l'edifizi e dal terren da construcziun, ma er l'augment dals custs per construir l'edifizi n'èn betg en cas da cumpensar l'avantatg d'in consum d'energia da 3 l/m² empè d'in consum d'energia da 4.8 l/m². Plinavant na fiss il standard da MINERGIE-P betg applitgabel per tut las categorias d'edifizis e las relaziuns topograficas e climaticas spezialas en il chantun, ma er la protecziun dal maletg dal vitg s'opponissan ad ina moda da construcziun unifitgada.

3. En il rom da l'adattaziun menziunada da la lescha chantunala d'energia stoi vegnir examinà, quant enavant che las valurs per l'isolaziun termica pon insumma vegnir cuntanschidas analogamain al standard da MINERGIE en il rom da la sanaziun d'in edifizi existent. La difficultad da cuntanscher il standard da MINERGIE tar sanaziuns na dastgass betg sa chattar tar ils mirs exteriurs da l'edifizi, mabain plitost tar las installaziuns da la tecnica da chasa (cun l'indriz da ventilaziun da confort che vegn pretendì). Cun custs acceptabels sa laschass realisar in tal indriz mo, sch'er la cuschina ed il bogn vegnissan sanads a medem temp cun ils mirs exteriurs da l'edifizi e sche la structura da l'edifizi permettess insumma in equipament posteriur en vista a l'autezza ed al concept da las localitads. Sin basa da las spezialitads che sa refereschan a l'object sto perquai vegnir refusada in'obligaziun da surpigliar il standard da MINERGIE tar sanaziuns, sco quai ch'ella vegn pretendida en l'incumbensa.

4. Cun l'incumbensa vegn la finala pretendì ch'i vegnian stgaffidas las premissas legalas, per che chasas passivas novas possian profitar a partir d'immediat da contribuziuns chantunalas. Actualmain sa restrenscha il program da promoziun dal chantun sin l'utilisaziun dal potenzial immens da spargnar energia en la substanza architectonica existenta. Quai vegn fatg cun pajar contribuziuns ad edifizis existents ed a stabiliments da la tecnica da chasa, sch'i vegn cuntanschì en il rom d'ina sanaziun in basegn d'energia bler pli pitschen u in grad d'utilisaziun bler meglier en cumparegliaziun cun las prescripziuns minimalas en las leschas. Per la regenza na datti nagins motivs da divergiar da quest model da promoziun, perquai che quest model d'impuls empermetta ch'ils meds finanzials publics che stattan a disposiziun cuntanschan l'effect optimal.
Sin basa dals motivs preschentads propona la regenza sco resumaziun da betg acceptar l'incumbensa.

Datum: 30 d'avust 2007