Cun la votaziun dal pievel dals 26 da november 2006 ha la populaziun svizra acceptà l'armonisaziun naziunala dals supplements per uffants e per scolaziun (lescha federala davart ils supplements da famiglia, LSFam, CS 636.NN). Cur che la nova lescha federala davart ils supplements da famiglia entra en vigur, probablamain il 1-1-2009, importan ils supplements per uffants e per scolaziun en tut la Svizra almain 200 francs resp. 250 francs per mais e per uffant. En lur legislaziun executiva pon ils chantuns prescriver imports pli gronds. En il chantun Grischun importan las contribuziuns actualmain 195 francs resp. 220 francs per mais e per uffant.

Ils supplements per uffants e per scolaziun han l'effect d'in augment da salari tar las famiglias che pon profitar da tals. Ils supplements vegnan motivads exclusivamain dal fatg d'esser geniturs. Il supplement da salari è relevant per las taglias en quel senn, che las famiglias che profitan dals supplements per uffants e per scolaziun ston pajar persuenter ina taglia sin las entradas e che la grevezza fiscala s'augmenta sproporziunadamain pervia da la tariffa da progressiun. Quest effect n'è betg acceptabel, ed anc main acceptabel, sch'il dumber d'uffants è pli grond. La cumpensaziun dals custs per uffants e per scolaziun vegn per part puspè eliminada pervia da la grevezza fiscala (pli gronda), e quai tenor il princip ("spustar ils daners da la giaglioffa da las chautschas en la giaglioffina dal brastoc").

L'impurtanza dals supplements per uffants e per scolaziun è vegnida renconuschida tala e quala a chaschun da la votaziun dal pievel dal november 2006 ed è vegnida legitimada spezialmain tras questa decisiun dal suveran. Ils suandants indicaturs mussan quai:

- La sminuziun da la capacitad da cumpra a la naschientscha da l'emprim uffant importa 40%. Ditg cun auters pleds: In pèr senza uffant cun las medemas entradas sco in pèr cun uffant ha ina capacitad da cumpra ch'è per 40% pli gronda.

- Il studi dal fond naziunal ch'è vegnì fatg da Künzi e da Schärrer e che stat sut il titel "Tgi paja per la segirezza sociala e tgi profita da quella?" mussa ch'in pèr da la classa mesauna cun activitad da gudogn e senza uffants paja main contribuziuns (24.13%) al stadi social ch'in pèr da la medema categoria d'entradas cun activitad da gudogn e cun in uffant (26.96%).

- Passa in terz da tut ils uffants viva en famiglias cun entradas pitschnas e 59% en famiglias da la classa mesauna. Mo 6% dals uffants viva en famiglias bainstantas.

- Da l'onn 2000 fin l'onn 2004 èn s'augmentadas las expensas medias da las chasadas da 7'392 francs per mais sin 7'684 francs per mais. Quest augment da las expensas per 3.9% ha surpassà l'augment da las entradas bruttas da las chasadas per passa trais puncts procentuals.

- Famiglias cun entradas pitschnas impundan 24% da lur entradas bruttas per la segirezza sociala, famiglias bainstantas percunter mo 14%. Qua sa manifestescha il dischavantatg economic da las famiglias cun entradas bassas e mesaunas.

Igl è in fatg incontestà che l'instituziun dals supplements per uffants e per scolaziun è giustifitgada e sco menziunà politicamain zunt legitimada sin fundament da la decisiun dal pievel dal november 2006. L'instituziun da las deducziuns per la tgira d'uffants e da scolaziun ch'è previsa en la legislaziun (chantunala) da taglia na vegn betg concurrenzada dals supplements per uffants e per scolaziun; er quai è correct e legitim. Las duas instituziuns sa cumpletteschan vicendaivlamain, mintgina sto dentant vegnir fatga valair cumplettamain. Quai è pussaivel cun liberar ils supplements per uffants e per scolaziun da la taglia sin las entradas.
La liberaziun dals supplements per uffants e per scolaziun da la taglia (chantunala) sin las entradas pretenda in'adattaziun da la lescha federala davart l'armonisaziun da la taglia directa dals chantuns e da las vischnancas (LATD, CS 642.14). La proposta da prender in conclus direct duai instradar questa adattaziun.

La fracziun da la PCD che ha suttascrit qua sutvart envida perquai il cussegl grond da prender in conclus direct e da deliberar sin fundament da l'art. 59 CC la suandanta iniziativa dal chantun per mauns da l'assamblea federala:

Iniziativa dal chantun: Art. 7 da la lescha federala davart l'armonisaziun da la taglia directa dals chantuns e da las vischnancas (LATD, CS 642.14)
Text
Sa basond sin l'art. 160 al. 1 CF suttametta il chantun Grischun la suandanta iniziativa dal chantun a l'assamblea federala:
Il chantun Grischun propona ina midada da la lescha federala davart l'armonisaziun da la taglia directa dals chantuns e da las vischnancas cun la finamira da cuntanscher la liberaziun da taglia per ils supplements per uffants e per scolaziun.
Art. 7 al. 4 (lit. gbis nov)
"Libers da taglia èn mo:
(…)
gbis supplements per uffants e per scolaziun;
(...)“
Motivaziun
Ils supplements da 200 francs per uffants e da 250 francs per giuvenils en scolaziun èn in sustegn direct per las famiglias e gidan a meglierar lur capacitad da cumpra. La capacitad da cumpra da las famiglias sminuescha per 40% a la naschientscha da l'emprim uffant. Oz profitan las famiglias mo per part da quest sustegn, perquai ch'ils supplements per uffants èn suttamess a la taglia e perquai ch'ina part dals daners returna uschia en las cassas dal stadi.

La gronda part da las famiglias vegn classifitgada pervia dals supplements en ina categoria fiscala superiura. Ella perda uschia dentant auters privilegis, sco p.ex. ina reducziun da las premias da la cassa da malsauns u stipendis.

Ina revisiun da la lescha federala davart l'armonisaziun da la taglia directa dals chantuns e da las vischnancas liberass en quest senn ils supplements per uffants e per scolaziun da la taglia. Ella meglierass considerablamain la capacitad da cumpra da las famiglias.

Cuira, ils 29 d'avust 2007

Name: Cavigelli, Augustin, Berni, Berther (Mustér), Berther (Sedrun), Blumenthal, Bondolfi, Bundi, Caduff,
Cahannes Renggli, Candinas, Darms-Landolt, Dermont, Farrér, Fasani, Federspiel, Florin-Caluori, Geisseler, Keller, Kleis-Kümin, Kollegger, Loepfe, Niederer, Pfister, Plozza, Portner, Sax, Tenchio, Turner-Steier, Tuor, Zanetti, Capeder, Casutt-Derungs (Falera), Spadini

Session: 29.08.2007
Vorstoss: rg Antrag auf Direktbeschluss