Dumonda Frigg concernent chastis per geniturs nuncooperativs
Sessiun: 23.10.2007
En las scolas da tut la Svizra s'augmentan evidentamain las difficultads cun geniturs da scolaras e da scolars problematics. Er en il Grischun èn las vischnancas bain las instituziuns ch'èn responsablas per la scola populara, ma en cas da difficultads vegn involvì fitg savens ubain l'inspecturat chantunal da scola ubain il servetsch giuridic dal DECA.
Dacurt ha Beat W. Zemp, il president dad MCH (federaziun da tetg da las magistras e dals magisters svizzers), pretendì che l'introducziun da multas per geniturs che refusan la collavuraziun cun la scola duaja vegnir examinada en tut ils chantuns. Plinavant veglia el animar sia federaziun da mintgamai retrair l'effect suspensiv tar recurs cunter decisiuns disciplinaras. Concretamain vul quai per exempel dir: Sch'ina scolara u sch'in scolar smanatscha ina persuna d'instrucziun e vegn exclusa resp. exclus durant in tschert temp da la scola tras ina reprimanda, na duain ils geniturs betg pli pudair procurar cun agid d'in recurs che lur uffant sesia il di suenter puspè en sia classa. Zemp vesa quai sco ina part d'in entir pachet per puspè survegnir ina meglra controlla sur dals problems disciplinars en las scolas. Latiers tutga er l'exclusiun da la scola durant in tschert temp.
Ina rolla da piunier en quest connex giogan tenor Beat Zemp ils chantuns Son Gagl e Basilea-Champagna. En il chantun Son Gagl vegnan geniturs smanatschads cun ina multa tranter 200 e 1'000 francs, sch'els refusan in discurs cun la scola. Ina regulaziun sumeglianta sco il chantun Son Gagl enconuscha er il chantun Argovia.
Jau supplitgesch la regenza da respunder las suandantas dumondas:
1. Co è sa mussà quest problem cun geniturs nuncooperativs en il Grischun or dal puntg da vista dals uffizis chantunals?
2. Èn ils recurs en questa chaussa s'augmentads durant ils ultims pèr onns?
3. Co proceda il chantun Grischun en in tal cas?
4. Tge posiziun ha la regenza areguard la pussaivladad da pronunziar multas er en il chantun Grischun, sche geniturs sa cumportan en moda nuncooperativa?
Cuira, ils 23 d'october 2007
Name: Frigg, Pfiffner-Bearth, Gartmann-Albin, Butzerin, Jaag, Jäger, Menge, Peyer, Pfenninger, Thöny, Trepp
Session: 23.10.2007
Vorstoss: rg Anfrage
Resposta da la regenza
La lescha davart las scolas popularas dal chantun Grischun (lescha da scola; DG 421.000) cuntegna duas disposiziuns che prevesan da chastiar persunas cun la pussanza dals geniturs. Per l'ina vegn ina persuna cun la pussanza dals geniturs chastiada da l'autoritad communala cumpetenta cun ina multa da 50 fin 1 000 francs, sch'ella na trametta senza motiv da stgisa betg regularmain a scola l'uffant u sch'ella piglia l'uffant ord scola senza ina permissiun da congedi dal cussegl da scola (art. 55 da la lescha da scola). Per l'autra vegn ina persuna cun la pussanza dals geniturs chastiada dal departament cun ina multa da 100 fin 5 000 francs, sch'ella surpassa las disposiziuns davart l'obligaziun d'ir a scola e davart la durada da scola (art. 56 cifra 1 da la lescha da scola) u sch'ella s'oppona en questa funcziun a decisiuns dal cussegl da scola envers scolaras ed envers scolars (art. 56 cifra 1 da la lescha da scola).
Malgrà questa pussaivladad generala da chastiar geniturs nuncooperativs dubitescha la regenza che quest proceder haja success. Ina collavuraziun tranter la scola ed ils geniturs, che duai effectivamain servir al singul uffant u al singul giuvenil, na sa lascha betg cuntanscher cun forza. I dovra in minimum da confidenza sco er l'intenziun d'agir communablamain a favur da la scolara u dal scolar pertutgà. Ina pitschna basa da confidenza daventa anc pli fragila cun smanatschar e cun pronunziar multas. Tras las multas vegn l'engaschi communabel da la scola e dals geniturs, che n'è collià cun naginas cundiziuns, degradà en il cas extrem ad in'obligaziun, da la quala ils geniturs pon sa cumprar libers (tras multas).
Sut l'aspect da questas consideraziuns vesa la regenza la soluziun da la problematica che vegn tematisada en l'intervenziun cunzunt en in'ulteriura meglieraziun da la communicaziun. Cun differents projects è vegnida promovida en il decurs dals onns passads ina buna cultura da discussiun tranter la scola ed ils geniturs. En cas d'in conflict concret na duess consultond la direcziun da la scola vegnir tralaschà nagut per reglar las difficultads sin ina basa colleghiala, sche quai è pussaivel.
Las dumondas che vegnan tschentadas en l'intervenziun pon vegnir respundidas sco suonda:
1. Conflicts tranter geniturs e la scola appartegnan al mintgadi e vegnan per regla schliads en il rom da las structuras giuridicas ed organisatoricas existentas. Problems cun geniturs nuncooperativs en il senn da la dumonda n'èn strusch enconuschents als uffizis chantunals. Ina suletta giada ha il departament d'educaziun, cultura e protecziun da l'ambient (DECA) pronunzià avant intgins onns sin basa da l'art. 56 da la lescha da scola ina multa cunter in genitur fallibel.
2. Il dumber da recurs en questa chaussa n'è betg creschì il ultims onns.
3. Tenor il dretg processual respectiv n'ha quai betg in effect suspensiv, sch'i vegn inoltrà al DECA in eventual recurs cunter decisiuns disciplinaras dal cussegl da scola (art. 34 al. 1 da la lescha davart la giurisdicziun administrativa [LGA; DG 370.100]). Sin dumonda u d'uffizi po l'autoritad dentant dar in effect suspensiv al recurs en il cas singul. Tenor l'avis da la regenza na pari ni cunvegnent ni adequat d'introducir ina disposiziun speziala (p.ex. en la lescha chantunala da scola), tenor la quala i na fiss betg exclus da conceder l'effect suspensiv a tals recurs.
4. A las instituziuns ch'èn responsablas per la scola statti liber da stgaffir la basa giuridica correspundenta en il rom da lur urdens da scola per pudair chastiar geniturs nuncooperativs. La regenza è da l'avis ch'i saja fauss d'introducir sancziuns che surpassan las disposiziuns penalas ch'èn previsas oz en la lescha chantunala da scola.
Datum: 17 da december 2007