Navigation

Inhaltsbereich

Incumbensa Candinas concernent la realisaziun da classas per promover il sport al stgalim secundar I (7. 9. classa)

Sessiun: 04.12.2007
Per che giuvnas Grischunas e per che giuvens Grischuns ch'èn motivads e ch'èn pronts da prestar insatge hajan dapli success en il sport d'elita, ston ellas ed els vegnir registrads e promovids a temp. Ultra da las cundiziuns sportivas da basa dumonda quai er ch'i vegnia creà in ambient da scola ch'è adattà al sport d'elita e che permetta a las scolaras ed als scolars d'instradar ina carriera encurunada da success e da dumagnar il temp che la suonda. Entant ch'i dat en il Grischun gia purschidas correspundentas fitg attractivas al stgalim secundar II (sectur da scola media e da scola professiunala), manca ina tala purschida dal tuttafatg al stgalim secundar I (7. 9. classa).

Furmas da scolaziun alternativas, in'assistenza individuala, ina promoziun da persunas cun talent e cun duns extraordinaris sin tut ils stgalims da scola èn dumandadas adina pli fitg en l'entira Svizra. La realisaziun da classas per promover il sport al stgalim secundar I duai serrar ina largia en noss chantun, e quai en in sectur, en il qual igl exista in cler basegn d'agir. En auters chantuns èn vegnidas fatgas experientschas fitg positivas cun las classas per promover il sport al stgalim secundar I. Talas classas èn vegnidas iniziadas e realisadas per part schizunt dals chantuns sezs (chantuns Sviz, Lucerna, Argovia, Berna, Basilea-Citad, Basilea-Champagna, Glaruna, Giura, Vallais e Turitg).

En l'associaziun grischuna da sport (AGS) s'occupa ina gruppa da lavur da questa dumonda. Questa gruppa ha fatg in concept per realisar classas per promover il sport al stgalim secundar I. Il concept sa basa sin las prescripziuns da las associaziuns naziunalas da sport (tranter auter swiss ski) e resguarda las prescripziuns dal dretg da scola. Il concept prevesa da realisar classas per promover il sport er en scolas publicas en 3 fin 4 lieus dal chantun. En questas scolas duain vegnir assistids, promovids e scolads las giuvnas ed ils giuvens cun talent, e quai cun cleras prescripziuns che pertutgan la scola ed il sport ed en moda cumplessiva. En differentas regiuns è questa tematica medemamain en discussiun ed i vegnan tschertgadas soluziuns constructivas. Uschia s'occupa per exempel la corporaziun da vischnancas da Glion e conturns intensivamain da l'elavuraziun d'in concept concret a Glion. Tenor las enconuschientschas actualas duai vegnir realisada ina classa per promover il sport al stgalim secundar I (ev. schizunt en il rom d'ina classa cumbinada) fin il pli tard l'onn da scola 2009/2010.

Perquai vegn envidada la regenza d'incumbensar ils uffizis chantunals cumpetents da cussegliar cun cleras finamiras las vischnancas respectivamain las corporaziuns da scola ch'èn interessadas per ch'ellas possian realisar ed introducir, accumpagnar e sustegnair en il rom da lur cumpetenzas classas per promover il sport al stgalim secundar I. Plinavant vegn la regenza envidada da metter a disposiziun en ina emprima fasa ils meds finanzials per projects da pilot respectivamain per experiments da scola (contribuziuns tenor l'art. 6 da la lescha da scola; contribuziun liada ad in intent specific dal fond chantunal da sport e toto).

Cuira, ils 4 da december 2007

Nmae: Candinas (Rabius), Hasler, Kunz, Bachmann, Berther (Sedrun), Bezzola (Samedan), Bezzola (Zernez), Bleiker, Blumenthal, Bondolfi, Brandenburger, Brüesch, Bucher-Brini, Buchli, Caduff, Cahannes Renggli, Campell, Casty, Casutt, Caviezel (Pitasch), Caviezel-Sutter (Tusaun), Cavigelli, Christoffel-Casty, Darms-Landolt, Dermont, Donatsch, Federspiel, Feltscher, Florin-Caluori, Geisseler, Giovanoli, Hartmann (Cuira), Hartmann (Champfèr), Heinz, Jenny, Kleis-Kümin, Koch, Kollegger, Loepfe, Märchy-Michel, Marti, Meyer-Grass (Claustra), Montalta, Niederer, Noi-Togni, Parolini, Parpan, Peer, Pfäffli, Pfister, Portner, Quinter, Ragettli, Rathgeb, Righetti, Rizzi, Sax, Stiffler, Tenchio, Thurner-Steier, Trepp, Troncana-Sauer, Tuor, Valär, Brunold, Caluori, Candinas (Mustér), Cattaneo, Clalüna, Engler, Hauser, Mainetti

Session: 04.12.2007
Vorstoss: rg Auftrag


Resposta da la regenza

Per la scola populara èsi ina gronda sfida d'ademplir a medem temp las finamiras generalas dal plan d'instrucziun ed ils basegns spezials da las futuras sportistas e dals futurs sportists da prestaziun, saja quai en general ed en il cas singul. Il fatg ch'i vegnan chattadas bunas soluziuns individualas per questa incumbensa difficila en la gronda part dals cas en il mintgadi da scola, n'è betg ina chaussa evidenta, e sch'in cas singul ha success dat quai perditga d'in engaschament extraordinari da tut las persunas participadas.

Tenor las leschas ch'èn actualmain vertentas han las scolas popularas la pussaivladad da sustegnair la promoziun da duns extraordinaris en il rom d'ina classa regulara, e quai cun metter a disposiziun ina structura individuala da l'instrucziun sco er ina reglamentaziun dals dis da congedi ch'è adattada a la situaziun concreta. Uschia pon giuvnas sportistas talentadas e giuvens sportists talentads duvrar per trenaments e per concurrenzas ultra dals 15 dis da congedi che vegnan concedids dal cussegl da scola tenor l'art. 41 al. 2 da la lescha da scola er anc ulteriurs dis da congedi che ston vegnir permess da l'uffizi per la scola populara ed il sport. En l'entira scola populara dal Grischun profitan annualmain almain 100 futuras sportistas e futurs sportists da prestaziun da questa pussaivladad.

Ultra da promover individualmain singulas sportistas e singuls sportists en il rom d'ina classa regulara, èsi er pussaivel en il rom da la legislaziun da scola vertenta da flexibilisar l'instrucziun d'ina entira classa e da drizzar il temp da scola tenor ils temps da trenament e da concurrenza da las giuvnas sportistas e dals giuvens sportists, sco ch'i mussa l'exempel da la classa da sport ch'è vegnida manada ils onns 2001 fin 2005 a Tavau. Ina premissa centrala per mintga midada da la structura da l'instrucziun è dentant quella da resguardar las finamiras dal plan d'instrucziun. Cur che la classa da sport da Tavau è vegnida introducida, è l'uffizi cumpetent stà participà en il senn da questa incumbensa. Suenter quatter onns è il project vegnì interrut da l'instituziun ch'era responsabla per la scola. En quest connex n'han bain betg mo motivs finanzials giugà ina rolla, mabain er motivs pedagogics, motivs organisatorics e motivs da sport.

Ils uffizis chantunals cumpetents vegnan a sustegnair las scolas a promover giuvnas sportistas talentadas e giuvens sportists talentads er en il futur. En il center da quest sustegn stat sco fin ussa la cussegliaziun en connex cun dumondas da sport sco er en connex cun la concepziun pedagogica e didactica d'in project concret. Tuttina pon ils uffizis chantunals daventar activs pir, cur ch'ils basegns correspundents sco er las dumondas dal lieu da staziunament èn vegnids sclerids en ina regiun. Questas lavurs preparatoricas fan cleramain part dal champ da cumpetenza e d'incumbensa da las instituziuns ch'èn responsablas per la scola. Sch'ina regiun suttametta in project concret en furma d'ina dumonda, è la regenza pronta d'examinar quel ed en cas ch'ella conceda ina permissiun da sustegnair quel en la fasa iniziala cun ina contribuziun or dal fond chantunal da sport. Sch'in project inoltrà surpassa il rom da la legislaziun da scola vertenta, en spezial las prescripziuns dal plan d'instrucziun (incl. urari), alura sto vegnir refusada ina permissiun, e quai sch'ins resguarda l'incumbensa fundamentala da la scola populara e dal dretg da l'uffant da survegnir ina furmaziun, dentant er sch'ins resguarda il fatg che schizunt uffants fitg talentads che vegnan promovids individualmain han mo fitg darar propi success en il sport e chattan las perspectivas professiunalas correspundentas. Sut questas circumstanzas na fissi betg nizzaivel da permetter in experiment da scola tenor l'art. 6 da la lescha da scola; in experiment che guntgiss il plan d'instrucziun.

La regenza propona d'acceptar l'incumbensa en quest senn.

Datum: 28 da favrer 2008