Navigation

Inhaltsbereich

Incumbensa Berther concernent meglras colliaziuns da viafier e da via da la Surselva cun ils centers

Sessiun: 06.12.2007
Il temp che la viafier dovra da Sedrun a Glion importa 1 ura e 4 minutas. Tgi che vul viagiar a Cuira sto schizunt far quint cun in temp da viadi dad 1 ura e 43 minutas. E quai malgrà l'import da 115 milliuns francs che gist la viafier retica (VR) ha survegnì ils ultims 10 onns grazia a la NVTA (plazzal intermediar da Sedrun) per meglierar l'infrastructura da viafier sco chadaina da transport da Landquart a Sedrun. Per abitantas e per abitants, per pendularias e per pendularis, per visitadras e per visitaders sco er per giasts da vacanzas che vulan utilisar la VR/MGB è il temp da viadi cun la viafier entaifer ed ordaifer la Surselva actualmain bler memia lung e bler memia pauc attractiv. La situaziun cun ils meds da traffic privats n'è er betg fitg differenta. Cumpareglià cun il traffic public na dura in viadi cun l'auto a Glion u a Cuira e viceversa betg uschè ditg. A quai contribuescha er il sviament da Flem ch'è vegnì avert da nov l'ultim mais. Malgrà quai n'è la cuntanschibladad da bleras vischnancas da la Surselva cun l'auto betg cuntentaivla.

A la medema conclusiun vegn er il rapport davart ils abitadis dal Grischun ch'è gist cumparì da nov e che classifitgescha las vischnancas dal chantun en las categorias "bun", "cuntentaivel" e "nausch" tut tenor il temp ch'ins dovra per arrivar cun ils meds da transport publics e privats al proxim center regiunal e surregiunal. La cuntanschibladad da Cuira sco center surregiunal vegn giuditgada sco nauscha per las vischnancas da tut la part sura da la Surselva (da Ruschein, Rueun fin Mustér, Tujetsch), da la Lumnezia (da Vella fin Vrin e Val S. Pieder) e da la Stussavgia, e però tant cun il traffic public sco er cun il traffic privat (rapport davart ils abitadis, p. 45, tavla 18). Schizunt Glion sco center regiunal vegn giuditgà mo sco mal cuntanschibel per pliras vischnancas (Tujetsch, Mustér, Medel/Lucmagn, Vrin, Val S. Pieder, Stussavgia) (rapport davart ils abitadis, p. 45, tavla 19).

La via la pli impurtanta per colliar la Surselva vers anora cun la chapitala dal chantun, cun las autras parts dal Grischun sco er cun la Svizra è la via chantunala A 19 Sedrun La Punt (via sursilvana), che sbucca a La Punt en la via naziunala A13. Damai che la realisaziun dal project visiunar "Porta Alpina" è vegnida sepulida, è vegnida manchentada la schanza unica per colliar la Surselva supplementarmain vers anora cun las ulteriuras parts da la Svizra. Ad Andermatt vegn cumenzà a partir da l'onn che vegn cun la realisaziun dal project da ressort fenomenal da l'investur egipzian Samih Sawiri cun 3'300 letgs che vegn a vegnir inaugurà l'onn 2012. En spezial per la part sura da la Surselva s'avran cun quest project novas schanzas per il turissem sco er per la lavur. Vitiers vegn anc ch'il chantun Grischun vul etablir la regiun dal Gottard en il center da las Alps sco nova destinaziun turistica (PREGO), e quai ensemen cun ils chantuns vischins Uri, Vallais e Tessin. En vista a quest nov posiziunament interchantunal survegn la colliaziun sur il pass da l'Alpsur en moda imprevisa ina nova impurtanza. La via sur il Alpsur è actualmain serrada durant l'enviern. Cun la MGB dura il viadi da Sedrun ad Andermatt 57 minutas, entant ch'ins fa quest traject da 24 km cun l'auto en 23 minutas. I s'impona perquai bunamain d'avrir la via da l'Alpsur er durant l'enviern per permetter ina colliaziun permanenta e svelta cun Andermatt, cun la nova regiun dal Gottard sco er cun la Svizra centrala.

L'avertura per il traffic ch'è in parameter central per il svilup d'ina regiun perifera sa chatta en la Surselva cumpareglià cun il rest dal chantun sut la media chantunala. En vista ad ina meglieraziun da questa avertura supplitgeschan las sutsegnadras ed ils sutsegnaders la regenza:

1. d'examinar ensemen cun il chantun Uri, sch'igl e realisabel d'avrir il pass da l'Alpsur per il traffic privat er durant l'enviern e da cumenzar cun in manaschi d'emprova il pli tard fin a l'avertura parziala dal ressort da vacanzas da Samih Sawiri l'onn 2012;

2. da s'engaschar per eliminar las stretgas ch'èn avant maun en connex cun la segirezza, cun il temp da viadi e cun il standard da construcziun da la via sursilvana (Mustér Sedrun, Sumvitg Mustér, sviament da Glion), da la via da la Lumnezia e da la via da Val S. Pieder;

3. da s'engaschar ch'il temp da viadi cun la viafier da Cuira sur Glion e Mustér a Sedrun vegnia reducì.
Cuira, ils 6 da december 2007

Name: Berther (Sedrun), Cavigelli, Montalta, Berther (Mustér), Blumenthal, Bondolfi, Caduff, Cahannes Renggli, Candinas (Rabius), Casutt, Caviezel (Pitasch), Darms-Landolt, Dermont, Donatsch, Federspiel, Feltscher, Gartmann-Albin, Geisseler, Hartmann (Cuira), Hasler, Koch, Kunz, Marti, Mengotti, Möhr, Niederer, Nigg, Noi-Togni, Parpan, Pfister, Portner, Sax, Tenchio, Troncana-Sauer, Tuor, Brunold, Caluori, Candinas (Mustér)

Session: 06.12.2007
Vorstoss: rg Auftrag


Resposta da la regenza

Igl è in fatg incontestà ch'ina avertura moderna per il traffic gioga ina rolla decisiva per il svilup e per il progress economic d'ina regiun perifera. En quest senn dependa er la Surselva da princip da bunas colliaziuns da via e da viafier cun ils centers regiunals e surregiunals. Las dumondas fatgas pon vegnir respundidas sco suonda:

1. Ensemen cun la regenza dal chantun Uri èn vegnids tgirads ils contacts correspundents ed è vegnida examinada la dumonda, sch'igl è realisabel d'avrir la via sur il pass da l'Alpsur durant l'enviern. Igl è sa mussà ch'ina avertura durant l'enviern da la via sur il pass da l'Alpsur na stat betg en discussiun per il chantun Uri. Ultra dals custs considerabels d'investiziun, da mantegniment e da manaschi per l'avertura dal pass durant l'enviern fa il chantun Uri valair er las grondas consequenzas negativas per la regiun dal pass da l'Alpsur e per sias pussaivladads turisticas, perquai ch'ina avertura dal pass durant l'entir onn concurrenzass tranter auter la purschida actuala da la viafier Matterhorn-Gottard (VMG). Or da vista dal Grischun pledan er differents motivs cunter in'avertura durant l'enviern da la via sur il pass. Ina tala interpresa fiss cumbinada cun ristgas memia grondas. Las duas galarias sin la via dal pass da l'Alpsur èn en in fitg nausch stadi e stuessan vegnir sanadas cun gronds custs. Ultra da la periclitaziun considerabla da lavinas è cunzunt er il percurs da la via memia pauc segir per in'avertura durant l'enviern. Las numerusas stortas èn stippas e stretgas e n'han betg avunda protecziuns cunter cupitgas per il manaschi d'enviern. Cun gronds custs fissi pia stringentamain necessari d'amplifitgar e da reconstruir la via dal pass da l'Alpsur, sch'ins vuless tegnair avert la via dal pass durant l'enviern.

2. Cun metter en funcziun il sviament da Flem l'october 2007 è gia vegnida cuntanschida ina meglieraziun essenziala da la colliaziun da la Surselva e da sias vals lateralas dal sid. Il program da sanaziun da vias 2009 2012 cuntegna ulteriuras meglieraziuns. Tranter Mustér e Sedrun vegn realisà il project "Garmischeras Tscheppa". Cun quai vegn eliminada l'ultima stretga sin quest traject. Plinavant propona il program menziunà intginas mesiras d'amplificaziun er sin il traject da Sumvitg a Mustér. Per garantir ina meglra avertura da la Val Lumnezia e da la Val S. Pieder èsi previs da cumenzar a construir il sviament "Glion vest" a partir da l'onn 2010. Ultra da quai èn previs annualmain passa 2 milliuns francs per amplifitgar e per mantegnair la via da la Val Lumnezia e da la Val S. Pieder. Uschia pon da princip vegnir ademplids ils giavischs giustifitgads d'avair ina avertura cun vias moderna.

3. Il viadi da Cuira a Sedrun vegn fatg oz en la purschida da basa en ils trens regiunals che sa ferman numerusas giadas e stuend midar tren a Mustér. La regenza vul perquai da princip optimar ils temps da viadi dals trens da la viafier retica resp. da la viafier Matterhorn-Gottard sin quest traject. Cun construir ina cruschada a binaris dubels dasper Castrisch e cun meglierar divers trajects pon vegnir gudagnadas uschia fin 7 minutas temp da viadi. Per la viagiatura u per il viagiatur è ultra dal temp da viadi gudagnà er la frequenza da la purschida d'ina impurtanza essenziala. Las capacitads dals trajects n'èn oz anc betg exauridas dal tuttafatg, tant ch'i duess esser pussaivel da las optimar ulteriuramain. Perquai vul il chantun concentrar la purschida da trens al tact d'ina mesa ura, almain tranter Cuira e Glion. Talas mesiras ston dentant cuntegnair ina relaziun raschunaivla tranter ils custs ed il niz. La regenza vegn er a s'engaschar ch'il concept per ina flotta da la viafier retica, la quala prevesa da duvrar vehichels moderns er sin la lingia da la Surselva, vegnia realisà svelt. Plinavant vegnan ins a stuair reponderar il cunfin actual tranter ils sistems da la viafier retica e da la viafier Matterhorn-Gottard a Mustér, che sforza tut las viagiaturas e tut ils viagiaturs da midar tren, danor quellas e quels dal Glacier-Express. Tut tenor il resultat dals scleriments che vegnan fatgs actualmain davart ils futurs concepts da purschida e da manaschi da la viafier retica e da la viafier Matterhorn-Gottard pon ins s'imaginar da metter a disposiziun trens transitorics.

Cun quai è la regenza pronta d'acceptar questa incumbensa en il senn da las explicaziuns preschentadas.

Datum: 17 da mars 2008