Navigation

Inhaltsbereich

Dumonda Bucher-Brini concernent la garanzia da qualitad, la prevenziun e la promoziun da la sanadad en la cussegliaziun per mammas e per babs

Sessiun: 12.02.2008
Ils 13 da zercladur 2007 ha il cussegl grond approvà ina revisiun parziala da la lescha per promover la tgira da persunas malsaunas e l'assistenza da persunas attempadas e da persunas che basegnan tgira (lescha per promover la tgira da persunas malsaunas).
Suenter è er vegnida revedida l'ordinaziun tar la lescha per promover la tgira da persunas malsaunas e messa en vigur per il 1. da schaner 2008 cun il conclus da la regenza dals 11 da december 2007.
L'artitgel 31 da l'ordinaziun sa cloma ussa sco suonda:
"Ils servetschs da la cussegliaziun per mammas e per babs han d'ademplir las suandantas pretensiuns a la qualitad da la structura:
a) las collavuraturas ed ils collavuraturs han da posseder in diplom ch'è renconuschì en tut la Svizra sco tgirunza respectivamain sco tgirunz u ina scolaziun equivalenta sco er ina furmaziun supplementara en cussegliaziun. Questa furmaziun supplementara sto esser renconuschida da l'uffizi da sanadad;"
Areguard la qualitad da la structura ha la regenza mo definì las pretensiuns ch'èn necessarias per in'organisaziun, sch'ella vul vegnir renconuschida sco organisaziun che ha il dretg da survegnir contribuziuns. Questas pretensiuns minimalas chaschunan in pèr dumondas areguard la garanzia da qualitad ed areguard il profil d'exigenzas – che vegnan pretendids da la federaziun svizra da las cussegliadras per mammas e da la federaziun da las patrunas e dals patruns da la cussegliaziun per mammas e per babs – per ina spezialista en la cussegliaziun per mammas e per babs. Ultra da quai è ina regulaziun uschè minimala – er cumpareglià cun auters chantuns e cumpareglià cun las finamiras da la scolaziun ch'èn prevesidas sin plaun federal – fitg surprendenta e problematica.
La scolaziun terziara da tgirunza u da tgirunz vegn purschida en tut la Svizra en il futur mo pli sco scolaziun da basa generala, vul dir senza ina spezialisaziun per uffants.
La federaziun professiunala e la federaziun da las patrunas e dals patruns da la cussegliaziun per mammas e per babs sco er la OdA santé tar il UFFT (organisaziun dal mund da lavur "sanadad") pretendan pervia da quai cleramain in diplom supplementar specific per l'activitad sco cussegliadra per mammas. Mo uschia pon vegnir garantidas las grondas pretensiuns ad ina spezialista da la cussegliaziun per mammas e per babs. Quella na duai betg mo avair cumpetenzas concernent la cussegliaziun, mabain er l'abilitad da percepir svelt la situaziun psichica, fisica e sociala da l'uffant. En quest connex sa basa ella sin ina vasta savida e pratica davart il svilup psichic, fisic e social da l'uffant, davart la cussegliaziun da famiglias che s'orientescha vi da soluziuns sistemicas, davart il sistem da famiglia cun ses conturns e.u.v.
La qualitad e l'efficacitad da la cussegliaziun per mammas e per babs ha in connex stretg cun la qualitad da la scolaziun. Pervia da quai èsi indispensabel d'engaschar mo persunal spezialisà ch'è scolà correspundentamain e ch'è en cas da realisar ad ura crisas e ristgas. Sch'i na vegn betg intervegnì ad ura ed en moda cumpetenta tar deficits e tar problems, resultan custs consecutivs che pon daventar fitg gronds per il stadi. Mo ina gronda cumpetenza professiunala da las cussegliadras garantescha in effect persistent da la cussegliaziun per il bainstar da l'uffant.
En quest connex tschentan las sutsegnadras ed ils sutsegnaders las suandantas dumondas a la regenza:
1. Co pensa la regenza da garantir la qualitad da la cussegliaziun per mammas e per babs, sch'i vegn pretendì mo pli in diplom renconuschì sco tgirunza u sco tgirunz ed ina furmaziun supplementara en cussegliaziun ch'è renconuschida da l'uffizi da sanadad?
2. Tge è per la regenza ina furmaziun supplementara en cussegliaziun e tge moduls cumpiglia questa furmaziun supplementara?
3. Per cumparegliar:
- Il chantun Turitg prescriva per tut las cussegliadras per mammas che lavuran en il chantun obligatoricamain in diplom professiunal superiur (DPS) en la cussegliaziun per mammas e per babs.
- Il chantun Berna è londervi da concluder contracts da prestaziun, cun ils quals cussegliadras per mammas vegnan obligadas da s'acquistar il DPS en la cussegliaziun per mammas e per babs, sch'ellas lavuran dapli che 40% .
- Il chantun Argovia prescriva obligatoricamain il DPS specific il pli tard suenter in'activitad professiunala en la cussegliaziun per mammas e per babs da dus onns.
Enconuscha la regenza quest svilup ed è ella pronta d'examinar talas prescripziuns per garantir la qualitad?
4. Co po la regenza garantir l'artitgel 11 da la constituziun federala – "Uffants e giuvenils han il dretg d'ina protecziun particulara da lur integritad e d'ina promoziun da lur svilup." – areguard ils servetschs da la cussegliaziun per mammas e per babs, sch'il profil d'exigenzas en l'ordinaziun resta uschia sco ch'el è?
5. È la regenza er da l'avis che cussegliadras che n'èn betg scoladas suffizientamain sbassan la qualitad da la cussegliaziun ed uschia er l'effect preventiv da la cussegliaziun per mammas e per babs?
6. Federaziuns professiunalas, la federaziun da las patrunas e dals patruns da la cussegliaziun per mammas e per babs ed instituziuns sco p.ex. l'institut Marie Meierhofer da Turitg èn cleramain da l'avis che mo tgirunzas diplomadas e tgirunzs diplomads che han frequentà ina scolaziun posteriura da diplom en cussegliaziun per mammas e per babs dastgan survegnir la permissiun per pudair pratitgar la professiun sco cussegliadras e sco cussegliaders per mammas e per babs.
Tge posiziun ha la regenza visavi questa constataziun?
7. È la regenza pronta da discutar las dumondas davart ina scolaziun posteriura da diplom per daventar cussegliadra per mammas, davart la garanzia da qualitad, davart il standard e davart il profil d'exigenzas per cussegliadras per mammas, e quai ad ina uschenumnada "maisa radunda" cun represchentantas e cun represchentants da la federaziun svizra da las cussegliadras per mammas, da la federaziun svizra professiunala da las tgirunzas e dals tgirunzs, secziun dal Grischun e da la gruppa regiunala da las cussegliadras per mammas dal Grischun?

Cuira, ils 12 da favrer 2008

Name: Bucher-Brini, Baselgia-Brunner, Trepp, Arquint, Brandenburger, Brüesch, Casty, Casutt, Caviezel-Sutter (Tusaun), Christoffel-Casty, Conrad, Darms-Landolt, Frigg-Walt, Gartmann-Albin, Jaag, Jäger, Jenny, Koch, Mani-Heldstab, Märchy-Michel, Menge, Meyer-Grass (Claustra Vitg), Niederer, Noi-Togni, Pfenninger, Pfiffner-Bearth, Portner, Thöny, Grendelmeier, Locher Benguerel, Monigatti

Session: 12.02.2008
Vorstoss: rg Anfrage


Resposta da la regenza

Tenor l'art. 31 lit. f da la lescha per promover la tgira da persunas malsaunas è la regenza autorisada da far prescripziuns als servetschs da cussegliaziun per mammas e per babs mo areguard la qualitad da las structuras. Latiers tutgan oravant tut prescripziuns areguard la qualificaziun da las collavuraturas e dals collavuraturs. Tenor la lescha per promover la tgira da persunas malsaunas èsi l'incumbensa da las instituziuns ch'èn responsablas per ils servetschs da cussegliaziun per mammas e per babs da garantir la qualitad dal process e dal resultat, q.v.d. da garantir in proceder raschunaivel, cun il qual las prestaziuns pon vegnir furnidas e cun il qual las finamiras che stuessan vegnir ademplidas cun las prestaziuns pon vegnir ademplidas sco er cun il qual la cuntentezza da las clientas e dals clients po vegnir cuntanschida.
La regenza ha formulà las pretensiuns a la scolaziun ed a la furmaziun supplementara da las collavuraturas e dals collavuraturs dals servetschs da cussegliaziun per mammas e per babs en l'ordinaziun tar la lescha per promover la tgira da persunas malsaunas aposta sco standard minimal ch'è tenor ella necessari per garantir la qualitad da las structuras. Grazia a questa formulaziun minimala han las organisaziuns da patrunas e da patruns uschè blera libertad d'agir sco pussaivel per engaschar lur collavuraturas e lur collavuraturs.

Resposta a las dumondas
1. La regenza parta dal fatg che la qualitad da las structuras tar la cussegliaziun per mammas e per babs vegnia garantida dal fatg ch'igl èn necessaris in diplom sco tgirunza u sco tgirunz sco er ina furmaziun supplementara en cussegliaziun ch'è renconuschida da l'uffizi da sanadad. Pervia da quai na vesa ella nagin basegn d'agir.

2. La concretisaziun da la furmaziun supplementara ch'è renconuschida ha la regenza surdà a l'uffizi da sanadad. Quel ha renconuschì la suandanta purschida per ina furmaziun supplementara en cussegliaziun: modul da cussegliaziun dal center per furmaziuns supplementaras per professiuns dal sectur da la sanadad, Aarau. Quest modul da cussegliaziun ha ina dimensiun da 60 lecziuns e tracta la rolla, ils fatgs caracteristics e la tenuta da basa da la cussegliadra u dal cussegliader. La cussegliaziun sco impuls per process da midada, furmas da la cussegliaziun, models da la cussegliaziun ed ils instruments respectivs sco er facturs che influenzeschan la situaziun da cussegliaziun ed ils cunfins da talas situaziuns.

3. La regenza ha enconuschientscha da las regulaziuns ch'ils auters chantuns han. Ultra da las regulaziuns che vegnan numnadas en la dumonda enconuscha la regenza er chantuns che na fan naginas directivas per engaschar cussegliadras e cussegliaders per mammas e per babs u che na pretendan per quai gnanc il diplom professiunal superiur en la cussegliaziun per mammas e per babs. La regenza è vegnida a la conclusiun che la qualitad da las structuras saja garantida avunda tras las pretensiuns a las collavuraturas ed als collavuraturs dals servetschs da cussegliaziun per mammas e per babs ch'ella ha fixà en l'art. 31 lit. a da l'ordinaziun tar la lescha per promover la tgira da persunas malsaunas.

4. La regenza na vesa nagin connex tranter l'artitgel cità da la constituziun federala e tranter la dumonda da la necessitad d'in diplom professiunal superiur en la cussegliaziun per mammas e per babs.

5. Gea. La regenza è – cuntrari a las sutsegnadras ed als sutsegnaders da la dumonda – persvasa che las pretensiuns – definidas en l'art. 31 da l'ordinaziun tar la lescha per promover la tgira da persunas malsaunas – a la scolaziun ed a la furmaziun supplementara da las collavuraturas e dals collavuraturs dals servetschs da cussegliaziun per mammas e per babs na sbassian betg la qualitad da questa cussegliaziun ed uschia er betg l'effect preventiv da la cussegliaziun per mammas e per babs.

6. Pervia dals motivs explitgads qua survart na po la regenza betg suandar questa deposiziun.

7. Il departament cumpetent è pront da discutar cun ils circuls interessads dumondas davart il profil d'exigenzas a las cussegliadras ed als cussegliaders per mammas e per babs.

Datum: 25 d'avrigl 2008