Navigation

Inhaltsbereich

Dumonda Menge concernent il fieu bacterial

Sessiun: 12.02.2008
Il fieu bacterial, ina malsogna bacteriala dals pumers, è actualmain in grond tema. Pertutgadas èn culturas da pumers ed uschia er culturas da plantas cun bist aut en tut la Svizra, ma cunzunt en la Svizra orientala ed en la Svizra centrala. Sco osps intermediars ils pli sensibels valan tschertas spezias da cudognasts (cotoneasters). L'existenza da bain inquala producenta e da bain in¬qual producent da puma è periclitada tras la dimensiun da l'infestiun. Igl è chapaivel ch'i ston vegnir tratgas en consideraziun mesiras drasticas en ina tala situaziun, p.ex. il diever d'antibiotics u l'eliminaziun da l'entir effectiv da pumers inclusiv las ragischs. L'uffizi federal d'agricultura ha ussa permess da duvrar l'antibiotic streptomicin sut tschertas cundiziuns. Intgins circuls pertutgads, p.ex. l'associaziun svizra da puma, pretendan d'abolir en general il scumond da duvrar antibiotics en Svizra. Da l'autra vart datti grondas resalvas envers il diever d'antibiotics, e quai er da vart da circuls spezialisads agriculs e medicinals. Cunzunt Bio Suisse, a la quala blers manaschis en il Grischun èn associads, n'ha nagina chapientscha per questa decisiun. Antibiotics da la medema gruppa da substanzas activas vegnan numnadamain applitgads er en la medischina umana e veterinara ed uschia exista il privel ch'i sa furmian resistenzas. En Germania èn vegnidas chattadas restanzas en il mel d'avieuls, suenter che l'antibiotic era vegnì utilisà cunter il fieu bacterial. Tenor l'avis da Bio Suisse sto il mel d'avieuls perquai vegnir analisà areguard eventualas restanzas e ses consum sto eventualmain vegnir scumandà.
Tras il diever da streptomicin na po il problem dal fieu bacterial betg vegnir schlià en moda persistenta. Las experientschas da l'exteriur mussan ch'il fieu bacterial na po betg vegnir tegnì sut controlla en moda cuntentaivla cun agid da l'antibiotic. Per la pumicultura biologica n'è il diever d'antibiotics cunter il fieu bacterial insumma betg in tema da discussiun, e quai sin basa da ponderaziuns specificas ed or da persvasiuns internas. Per l'agricultura biologica resulta in success mo tras strategias cumplessivas. Latiers tutgan la prevenziun, meds alternativs e la perscrutaziun sistematica.
Tar la prevenziun tutga vinavant ina controlla uffiziala cumpletta dal fieu bacterial en tut ils territoris periclitads. Uschia pon plantas infestadas vegnir identifitgadas fitg baud ed i pon vegnir prendidas mesiras optimalas (p.ex. tagliar enavos). Quai gida ad evitar runcadas dolurusas. Sut naginas circumstanzas na dastgan las controllas uffizialas dal fieu bacterial vegnir restrenschidas pervia dal diever d'antibiotics.

En quest connex supplitgesch jau la regenza da respunder las suandantas dumondas:
1. Quants donns èn vegnids registrads en il chantun Grischun e co è organisà il sistem d'annunzia resp. da registraziun?

2. Tenor tge concept ageschan ils posts chantunals cumpetents?

3. Èsi previs da far ina controlla sistematica en las vischnancas?

4. Quant ditg dura il temp d'intervenziun tranter l'annunzia e la mesira?

5. Basta quest temp ord vista da las expertas e dals experts per evitar ina derasaziun?

6. Tgi giuditgescha definitivamain l'infestiun da las plantas?

7. Survegnan las puras ed ils purs pertutgads ina indemnisaziun per las runcadas e per la dismessa da plantaschas e da plantas singulas infestadas?

8. Sustegna la regenza il diever da l'antibiotic streptomicin?

9. Vegnan las controllas dal fieu bacterial fatgas almain en la medema dimensiun sco fin ussa, er en cas ch'i vegn duvrà streptomicin, u vegnan las controllas schizunt intensivadas?

Cuira, ils 12 da favrer 2008

Name: Menge, Arquint, Baselgia-Brunner, Bondolfi, Bucher-Brini, Caviezel (Pitasch), Christoffel-Casty, Dermont, Fasani, Frigg-Walt, Gartmann-Albin, Jaag, Jäger, Kleis-Kümin, Kunz, Niederer, Pedrini, Peer, Pfäffli, Pfenninger, Pfiffner-Bearth, Pfister, Tenchio, Thöny, Thurner-Steier, Trepp, Locher Benguerel, Monigatti

Session: 12.02.2008
Vorstoss: rg Anfrage



Resposta da la regenza

Perquai ch'il fieu bacterial è sa derasà en il Grischun cunzunt a partir da l'onn 2005, han ils posts spezialisads "pumicultura" e "protecziun da las plantas" dal center da furmaziun e cussegliaziun agricula Plantahof (CFCA Plantahof) elavurà in concept per cumbatter il fieu bacterial. Quest concept è vegnì repassà la fin da l'onn 2006 ed è ussa vegnì modifitgà il mars 2008. Las dumondas concretas sa laschan respunder sco suonda:

1. Quants donns èn vegnids registrads en il chantun Grischun e co è organisà il sistem d'annunzia resp. da registraziun?
En il chantun Grischun è il fieu bacterial vegnì constatà l'onn 2007 en 63 vischnancas. I sa tractava da 223 mailers cun bist aut, da 953 mailers en plantaschas, da 375 pairers cun bist aut, da 191 pairers en plantaschas, da 108 cudogners, da 10 cudognasts cun feglia da salesch (cotoneaster salicifolius), da 661 m² cudognast da Dammer (cotoneaster dammeri) che cuvra il terren, da 15 chagliastretgs, da 2 culaischens, da 2 figniclers, da 3 spinatschs cotschens e dad 1 "chaenomeles".
En cas d'in suspect da fieu bacterial vegnan en funcziun las controlladras ed ils controlladers communals dal fieu bacterial che fan las controllas correspundentas.

2. Tenor tge concept ageschan ils posts chantunals cumpetents?
Sco menziunà èn la strategia ed il concept vegnids sviluppads l'onn 2005 e cumplettads dapi lura cun novas persunas ch'èn incumbensadas cun la controlla. Da princip datti ina controlladra u in controllader per mintga vischnanca ch'è pertutgada dal fieu bacterial. Actualmain èn en funcziun 62 controlladras e controlladers dal fieu bacterial; ellas ed els èn vegnids scolads dal CFCA Plantahof.

3. Èsi previs da far ina controlla sistematica en las vischnancas?
En las vischnancas ch'èn pertutgadas da l'infestiun – en la Val dal Rain, en il Partenz, en la Tumleastga, en Schons, en il Scanvetg ed en Surselva – èn vegnids instruids controlladras e controlladers dapi ils emprims cas da fieu bacterial. Tar la controlla en passond fan las emploiadas ed ils emploiads communals, ch'èn pli savens en viadi, stim dals sintoms dal fieu bacterial. Tar la controlla groppa vegnan fatgas las controllas en las vischnancas infestadas per lung da las vias e da las sendas; en vischnancas betg infestadas vegnan controlladas 10% da las plantas ospitantas. Tar la controlla detagliada controlleschan las cultivaturas ed ils cultivaturs da plantaschas da puma tut las plantas ospitantas en in conturn da 250 meters, entant che las controlladras e ch'ils controlladers dal fieu bacterial controlleschan ils ulteriurs conturns.

4. Quant ditg dura il temp d'intervenziun tranter l'annunzia e la mesira?
Las controlladras ed ils controlladers controlleschan entaifer in'emna las annunzias da suspects. Ellas ed els pon immediatamain laschar far ina runcada. Sche la diagnosa è intscherta, vegnan tramessas emprovas a la staziun da perscrutaziun Agroscope a Wädenswil. La resposta suonda per ordinari entaifer dus fin quatter dis e vegn immediatamain tramessa vinavant a las controlladras ed als controlladers per e-mail. Plinavant vegn la controlladra u il controllader cumpetent infurmà per telefon. La controlladra u il controllader resp. la vischnanca procura che la runcada vegnia fatga entaifer dus dis da lavur e controllescha ils proxims conturns.

5. Basta quest temp ord vista da las expertas e dals experts per evitar ina derasaziun?
La directiva 3 per cumbatter il fieu bacterial da l'uffizi federal d'agricultura (UFAG) dals 30 da zercladur 2006 prevesa – en cas d'ina infestiun cun il fieu bacterial – ina sanaziun tras l'allontanament da tut las plantas infestadas entaifer 14 dis. Igl è planisà da repassar questa directiva cun extender il termin a 30 dis. Las controlladras ed ils controlladers èn dal rest vegnids supplitgads il matg 2007 da controllar immediatamain las annunzias da suspects e d'organisar las runcadas en cas d'ina infestiun. Ils 3 d'avrigl 2008 èsi la finala vegnì preschentà a las controlladras ed als controlladers in nov test svelt per diagnostitgar il fieu bacterial al lieu.

6. Tgi giuditgescha definitivamain l'infestiun da las plantas?
En cas d'in suspect trametta la controlladra u il controllader in'emprova al labor per il fieu bacterial da l'Agroscope a Wädenswil. Quel communitgescha la diagnosa al CFCA Plantahof, e quai entaifer dus fin quatter dis.

7. Survegnan las puras ed ils purs pertutgads ina indemnisaziun per las runcadas e per la dismessa da plantaschas e da plantas singulas infestadas?
Las puras ed ils purs pertutgads vegnan indemnisads tenor il concept. Per il solit runcan ed elimineschan las vischnancas las plantas infestadas. Ellas survegnan pauschalas da 50.– fin 300.– francs per planta u per chaglia. Las puras ed ils purs sco er las pumiculturas ed ils pumiculturs vegnan indemnisads pir a partir da donns da 1'500.– francs.

8. Sustegna la regenza il diever da l'antibiotic streptomicin?
Valair valan las cundiziuns da la disposiziun generala dal UFAG dals 28 da schaner 2008. L'antibiotic streptomicin dastga vegnir duvrà mo en plantaschas da puma cun plantas cun bist bass. In attest d'autorisaziun è vegnì dumandà da dus pumiculturs cun plantaschas en las vischnancas da Maiavilla, da Jenins, da Malans e da Zizers. Il chantun ha plantaschas a Cazas, a Landquart ed a Cuira. Da quellas eran intginas er infestadas l'onn passà cun il fieu bacterial. Il chantun desista dentant da duvrar streptomicin a favur da la "desistenza d'antibiotics".

9. Vegnan las controllas dal fieu bacterial fatgas almain en la medema dimensiun sco fin ussa, er en cas ch'i vegn duvrà streptomicin, u vegnan las controllas schizunt intensivadas?
Las controlladras ed ils controlladers dal fieu bacterial èn vegnids preparads ils 3 d'avrigl 2008 per la nova funcziun, e quai tras expertas e tras experts dal CFCA Plantahof ed en preschientscha d'in represchentant da l'Agroscope. Il concept e la strategia na prevesan betg da reducir las controllas dal fieu bacterial. Igl è previs er vinavant da recrutar las controlladras ed ils controlladers dal fieu bacterial sin plaun communal e da scolar ellas ed els tar il CFCA Plantahof, uschespert ch'i dat in cas da fieu bacterial.

Datum: 11 d'avrigl 2008