Navigation

Inhaltsbereich

Dumonda Trepp concernent l'effizienza da l'agid social respectivamain l'abus da l'agid social

Sessiun: 12.02.2008
Decisivs per ina lavur sociala professiunala ed intenziunada èn – ultra da lavureras socialas e da lavurers socials che han ina buna scolaziun ed experientscha e ch'èn motivads – il dumber e la cumplexitad dals cas ch'ina persuna spezialisada sto elavurar. Las pretensiuns e las exigenzas che vegnan fatgas a la lavur sociala èn plitost creschidas ils ultims onns. Er en il Grischun è il dumber dals cas plinavant s'augmentà marcantamain.

En differents chantuns vegnan actualmain discutads fermamain l'effizienza, ma er l'abus pussaivel en il sectur da l'agid social. La citad da Berna per exempel vul amplifitgar las controllas entaifer l'uffizi ed augmentar il persunal per quest intent. Il dumber da cas (dossiers) per mintga lavurera sociala u per mintga lavurer social na duai betg surpassar 80. Uschiglio na sajan controllas e scleriments pli intensivs betg pussaivels. En la citad da Turitg ha ina lavurera sociala u in lavurer social da s'occupar da var 150 cas, pia da bunamain il dubel da Berna. Las inspecturas socialas ed ils inspecturs socials ch'èn vegnids engaschads là da nov han – tar 8450 cas d'agid social – pudì cumprovar in abus social en 21 da 100 cas, nua ch'i vegniva suspectà ch'i vegnia fatg abus da l'agid social. I vegn stimà che la quota d'abus en la citad da Turitg importia var 4 – 5%.

En quest connex vulessan las sutsegnadras ed ils sutsegnaders tschentar las suandantas dumondas a la regenza:

1. Da quantas clientas e da quants clients sto ina lavurera sociala respectivamain in lavurer social s'occupar tar ils servetschs socials regiunals en il chantun Grischun? Co è il dumber da las clientas e dals clients assistids sa sviluppà ils ultims 20 onns?

2. È il dumber da lavureras socialas e da lavurers socials actualmain grond avunda per assister er en moda creativa las persunas che retschaivan agid social sco er per las accumpagnar ensemen cun auters posts ch'èn eventualmain involvids (eventualas patrunas ed eventuals patruns, centers regiunals per intermediaziun da lavur, AI, manageras e managers da cas, medias e medis e.u.v.) sin ina via persistenta a la reintegraziun ed a l'independenza?

3. È la regenza pronta d'examinar, sch'ins cuntanschess eventualmain – cun dapli persunal spezialisà – soluziuns pli effizientas ed a lunga vista schizunt pli favuraivlas?

4. Quant gronda è stada ils ultims onns la fluctuaziun dal persunal e quantas absenzas pli lungas pervia da malsogna hai dà tar ils servetschs socials regiunals?

5. Quant gronda stima la regenza la quota d'abus en il chantun Grischun?

6. Examinescha la regenza la pussaivladad d'engaschar inspecturas socialas ed inspecturs socials er en il Grischun, e quai eventualmain ensemen cun las vischnancas? Sche gea, fin cura ha ella l'intenziun da realisar quai? Sche na, nua ha ella ses dubis?

Cuira, ils 11 da favrer 2008

Name: Trepp, Jäger, Baselgia-Brunner, Arquint, Bucher-Brini, Frigg-Walt, Gartmann-Albin, Jaag, Menge, Pfenninger, Pfiffner-Bearth, Thöny, Locher Benguerel, Monigatti

Session: 12.02.2008
Vorstoss: rg Anfrage



Resposta da la regenza

I constat che las pretensiuns e ch'ils dretgs per la cussegliaziun sociala èn s'augmentads dapi ils onns novanta. Il chantun ademplescha questa incumbensa dapi ditg cun expertas e cun experts da la lavur sociala che han per gronda part ina lunga experientscha professiunala. L'effizienza per concepir la purschida da cussegliaziun sociala è vegnida e vegn examinada regularmain. Il sistem grischun da la cussegliaziun sociala, nua che las rollas dals servetschs socials dal chantun – sco instanza che sclerescha ils cas e che inoltrescha las dumondas – e da las vischnancas – sco autoritads che decidan – èn spartidas, garantescha dentant ina controlla fitg gronda. Ultra da quai funcziuna la controlla sociala en las relaziuns grischunas meglier ch'en l'anonimitad d'ina citad gronda. D'intensivar la controlla da l'abus en ils agids socials è en emprima lingia en l'interess da las vischnancas ch'èn cumpetentas per las contribuziuns da l'agid social e che portan er la responsabladad e la plipart dals custs.

En il rom da la nova concepziun grischuna da la gulivaziun da finanzas e da la repartiziun da las incumbensas (NGF) èsi previs da surdar il sectur da l'agid social e da la cussegliaziun sociala cumplettamain a las vischnancas. La controlla da l'abus è er per quest motiv ina incumbensa che sto vegnir surpigliada da las vischnancas.

Resposta a las dumondas
1. Il dumber da cas che ston vegnir assistids pro plazza a temp cumplain en ils servetschs socials regiunals (senza il post da cussegliaziun per l'agid a victimas/post spezialisà per la protecziun da l'uffant) è sa sviluppà ils ultims onns suandantamain: 2003: 96; 2004: 97; 2005: 96; 2006: 94; 2007: 93.

2. La chargia dals cas da servetsch socials regiunals è stada auta ils onns 2006 e 2007, er sch'il dumber dals cas èn sa reducids. Cun constantamain pli pauc che 100 cas per 100 pertschients da plazzas è quai dentant ina relaziun ch'ins po responsar. Il team dal quartier Hard en la citad da Turitg assista, per cumparegliar, 150 dossiers per 100 pertschients da plazza. La cumissiun da gestiun da la citad da Turitg valitescha questa proporziun sco memia auta. Sche l'integraziun da retschavidras e da retschaviders d'agid social gartegia u betg, na dependa dal rest betg mo da l'engaschament dals servetschs socials, mabain er da las schanzas e da las pussaivladads ch'il martgà da lavur e che l'entir ambient porschan a las retschavidras ed als retschaviders d'agid social.
La collavuraziun dals servetschs socials cun ils auters partenaris da la collavuraziun interinstituziunala è vegnida intensivada dapi l'onn 2007. Las experientschas èn positivas.

3. Na. Ina tala examinaziun è colliada cun grondas expensas, a lunga vista forsa er anc cun supposiziuns speculativas. La chargia e l'effect da las intervenziuns da cussegliaziun dals servetschs socials vegnan però examinadas cuntinuadamain cun ils instruments d'enfin ussa.

4. En ils servetschs socials regiunals han cumpiglià las absenzas ils onns 2005 – 2007 circa ina plazza da lavur annuala sin totalmain 43 plazzas da lavur annualas. Absenzas pli lungas hai dà principalmain tras congedis da maternitad, en dus cas per consequenza da surchargia da lavur. La media da la rata da fluctuaziun è stada ils ultims trais onns tar il servetsch social (plazzas tenor il plan da plazzas) 7,87% (valur da cumparegliaziun cun l'entira administraziun: 5.95%).

5. L'onn 2007 han ils servetschs socials regiunals registrà 10 annunzias da cas d'abus. La regenza suppona che la quota d'abus saja – pervia da la partiziun da las rollas tranter ils servetschs socials e las vischnancas – bainquant pli bassa ch'en ils chantuns-citad.

6. La controlla da l'abus è chaussa da las vischnancas. Tut tenor la grondezza e la furma da la vischnanca è questa controlla differenta. En structuras survesaivlas funcziuna ella senza controllas supplementaras er en il rom da las elavuraziuns administrativas usitadas dals cas. En vischnancas pli grondas èsi raschunaivel da far emprovas da controlla sistematicas.

Datum: 11 d'avrigl 2008