Dumonda Thöny concernent l'applicaziun da l'ordinaziun davart las substanzas privlusas per l'ambient (ordinaziun davart las substanzas, Osubst)
Sessiun: 21.04.2008
Tenor la "SonntagsZeitung" dals 30 da december 2007 na correspundevan – a chaschun da las controllas da manaschi tar sfradentaders en il chantun da Basilea-Champagna – las datas dals sfradentaders cun CFC (idrocarbons totalmain alogenads) ch'eran vegnidas annunziadas en 85 pertschient dals cas betg a las valurs effectivas al lieu. Bunamain in terz da las persunas responsablas aveva schizunt fatg indicaziuns fallidas al legislatur davart il schelentader ch'el aveva duvrà. Las controlladras ed ils controlladers han plinavant chattà novs sfradentaders che n'eran betg vegnids annunziads a las autoritads da las gesturas e dals gesturs.
Schelentaders cun CFC valan sco materias che sminueschan la stresa d'ozon. Cun excepziuns èsi scumandà d'als duvrar. Schelentaders cun CFC vegnan duvrads per exempel tar apparats staziunars sco en ospitals, en chasas da tgira ed en manaschis da l'industria che elavura victualias. Apparats cun dapli che 3 kg CFC èn suttamess a l'obligaziun d'annunzia e da dumandar ina permissiun. En l'ordinaziun federala davart las substanzas ha il cussegl federal reglà il tractament dals schelentaders che sminueschan la stresa d'ozon.
En quest connex tschentan las sutsegnadras ed ils sutsegnaders las suandantas dumondas:
1. Maina il chantun Grischun in register d'annunzias per schelentaders che sminueschan la stresa d'ozon?
2. Tgi è cumpetent per controllar tals apparats?
3. Co ed en tge ritmus vegnan las controllas organisadas ed exequidas?
4. Quant grond è il dumber da las reclamaziuns che vegnan fatgas a chaschun da controllas en il Grischun?
5. Da tge gener èn questas reclamaziuns?
6. Co vegnan tschertgads gesturas e gesturs pussaivels da tals apparats e con vegnan ellas ed els fatgs attents a lur obligaziun d'annunzia?
Cuira, ils 21 d'avrigl 2008
Name: Thöny, Pfenninger, Arquint, Baselgia-Brunner, Bucher-Brini, Frigg-Walt, Gartmann-Albin, Jaag, Jäger, Menge, Peyer, Pfiffner-Bearth, Trepp, Locher Benguerel, Michel (Cuira)
Session: 21.04.2008
Vorstoss: rg Anfrage
Resposta da la regenza
L'ordinaziun dals 19 da zercladur 1986 davart las substanzas n'è betg pli en vigur. Ella è vegnida remplazzada tras l'ordinaziun dals 18 da matg 2005 davart la reducziun da las ristgas en connex cun l'utilisaziun da tschertas substanzas, da preparats e d'objects particularmain privlus (ordinaziun davart la reducziun da las ristgas en connex cun substanzas chemicas, ORRChem) ch'è en vigur dapi il 1. d'avust 2005. L'utilisaziun da schelentaders è reglada en l'agiunta 2.10 da la ORRChem. Ultra dals schelentaders che sminueschan la stresa d'ozon (idrocarbons totalmain e parzialmain alogenads; CFC, HCFC) èn suttamess er ils schelentaders ch'èn stabils en l'aria (fluorocarbons; FC, HFC) a l'agiunta 2.10. Tut questas substanzas èn gas cun effect da serra. L'utilisaziun da substanzas che sminueschan la stresa d'ozon è scumandada cun paucas excepziuns. Per apparats novs cun dapli che 3 kg schelentaders ch'èn stabils en l'aria exista dapi il 1. da schaner 2004 l'obligaziun da dumandar ina permissiun (agiunta 2.10 cifra 3.3 ORRChem). Apparats vegls cun dapli che 3 kg schelentaders che sminueschan la stresa d'ozon u ch'èn stabils en l'aria ston vegnir annunziads a l'autoritad chantunala cumpetenta, en il Grischun a l'uffizi per la natira e l'ambient (agiunta 2.10 cifra 5 ORRChem).
Dumonda 1
L'uffizi per la natira e l'ambient maina in cataster cun tut ils apparats permess ed annunziads che cuntegnan dapli che 3 kg schelentaders. Quests apparats (fin oz passa 4'500) èn marcads cun ina vignetta chantunala.
Dumonda 2
Las possessuras ed ils possessurs d'apparats cun dapli che 3 kg schelentaders che sminueschan la stresa d'ozon u ch'èn stabils en l'aria ston laschar controllar regularmain – almain a chaschun da mintga intervenziun u da mintga mantegniment – che lur apparats sajan ermetics. Sch'i vegn constatà ch'ils apparats n'èn betg ermetics, ston las possessuras ed ils possessurs als laschar reparar immediatamain.
Dumonda 3
Las possessuras ed ils possessurs d'apparats che cuntegnan dapli che 3 kg schelentaders ston procurar ch'i vegnia manà in carnet da mantegniment (agiunta 2.10 cifra 3.5 ORRChem). En quest carnet sto la spezialista u il spezialist che controlla l'apparat documentar tut las lavurs ch'èn vegnidas fatgas sco er il resultat da la controlla da l'ermeticitad. Tenor in mussavia da l'uffizi federal d'ambient (UFAM) vegn fatga l'emprima controlla da l'ermeticitad per regla suenter dus onns. Suenter sto vegnir controllà annualmain.
Dumonda 4
Il dumber da reclamaziuns che vegnan fatgas a chaschun da controllas n'è betg enconuschent al UNA. In'obligaziun d'annunziar las mancanzas na datti betg. Las mancanzas ch'èn vegnidas constatadas ston dentant vegnir eliminadas immediatamain tras ina spezialista u tras in spezialist (cf. dumonda 2). Oramai ch'in apparat che n'è betg ermetic na funcziuna insumma betg, han las possessuras ed ils possessurs da l'apparat in grond interess che l'apparat vegnia reparà.
Dumonda 5
Il UNA na sa betg exactamain, da tge gener che las mancanzas èn, ma el sa che la quantitad da schelentaders ch'è effectivamain vegnida emplenida po esser differenta da quella ch'è vegnida inditgada en la dumonda.
Dumonda 6
L'infurmaziun uffiziala davart l'obligaziun d'annunzia e davart l'obligaziun da dumandar ina permissiun è vegnida publitgada en il fegl uffizial dal chantun dals 12 da matg 2005. Las firmas spezialisadas ch'èn activas en il chantun annunzian al UNA quellas frestgeras che n'èn betg anc marcadas cun ina vignetta.
Previs èsi che las controlladras e ch'ils controlladers da victualias dal USVA examineschian en il rom da lur activitad usitada tut las frestgeras e tut ils magasins dals manaschis da gastronomia e dals negozis da victualias e ch'els annunzian ils apparats senza vignetta al UNA.
Datum: 25 da zercladur 2008