Navigation

Inhaltsbereich

Dumonda Caviezel (Pitasch) concernent la cumposiziun futura da las autoritads tutelaras en il Grischun

Sessiun: 22.04.2008
Il nov dretg federal oblighescha ils chantuns d'adattar a partir da l'onn 2010 la cumposiziun, la cumpetenza e la funcziun da las autoritads tutelaras. Uschia vegnan fatgas pretensiuns minimalas a questas autoritads. Lur grondezza futura e lur cumposiziun pon vegnir cumparegliadas cun in'autoritad spezialisada e premettan in intschess d'almain 15'000 fin 20'000 abitantas ed abitants. In studi ch'è vegnì fatg per la conferenza da las autoritads tutelaras chantunalas discurra schizunt d'in intschess da 50'000 fin 100'000 abitantas ed abitants. L'autoritad tutelara duai avair 9 fin 12 commembras e commembers che ston occupar las suandantas disciplinas professiunalas: dretg, geriatria, psichiatria d'uffants e da persunas creschidas, lavur sociala, pedagogia sociala, psicologia, sectur da la furmaziun, finanzas e contabilitad (fatgs fiduziars/administraziun da la facultad) e cumpetenza interculturala. Tras questas pretensiuns vegnan ils custs dals fatgs tutelars a s'augmentar considerablamain. En connex cun las mesiras da spargn avain nus stritgà l'onn 2003 las contribuziuns chantunalas che vegnivan pajadas als circuls per ils custs dals fatgs tutelars. Quai è stà ina mesira B2. Suenter quest pass han intgins circuls organisà da nov las avugadias uffizialas. Dapi l'onn 2007 han ils tschintg circuls da la Surselva ina suletta avugadia uffiziala sco er ina suletta autoritad tutelara. Qua tras n'han ils custs per ils circuls dentant betg pudì vegnir reducids. Ina giada ch'il nov dretg federal è entrà en vigur, stoi vegnir fatg quint ch'ils custs vegnian puspè a s'augmentar massivamain pervia da questa occupaziun professiunala. Igl è er intschert, sch'ins po insumma anc chattar en questa furma mandatarias e mandataris en tut las regiuns. Grazia a la scolaziun ed a la cussegliaziun da las autoritads ha la qualitad dals fatgs tutelars pudì vegnir augmentada ils ultims onns. Noss chantun ha oz fatgs tutelars che funcziunan bain e ch'èn concepids tenor ils basegns da noss chantun. Svilups che mainan a fatgs tutelars surdimensiunads e fitg spezialisads – sco quai che la confederaziun pretenda – ston vegnir franads tras las parlamentarias federalas e tras ils parlamentaris federals sco er tras la regenza.

È la regenza pronta da render attent las parlamentarias federalas ed ils parlamentaris federals a quests puncts critics?

La regenza vegn supplitgada da respunder las suandantas dumondas:

1. Co e cura vegnan orientadas las autoritads tutelaras e co sa preschenta l'urari?

2. Èsi imaginabel d'occupar las autoritads tutelaras, er sch'il presidi na vegn betg surpiglià d'ina giurista u d'in giurist, pia mo cun ina giurista u cun in giurist sco commembra resp. sco commember da l'autoritad?

3. Quant gronds èn en l'avegnir ils intschess da las autoritads tutelaras en il Grischun (dumber d'abitantas e d'abitants) e tgi surpiglia ils custs?

4. Tge mesiras prevesa la regenza per evitar in augment dals custs?

5. Sin tge stgalim ha la regenza l'intenziun d'organisar las autoritads spezialisadas?

Cuira, ils 22 d'avrigl 2008

Name: Caviezel (Pitasch), Hardegger, Zanetti, Arquint, Augustin, Barandun, Berther (Mustér), Bezzola (Zernez), Bischoff, Blumenthal, Brandenburger, Brüesch, Buchli, Bühler-Flury, Bundi, Caduff, Candinas, Casparis-Nigg, Castelberg-Fleischhauer, Casutt (Falera), Cavigelli, Conrad, Darms-Landolt, Dermont, Fasani, Feltscher, Florin-Caluori, Geisseler, Hartmann (Cuira), Hartmann (Champfèr), Jenny, Keller, Kessler, Krättli-Lori, Kunz (Cuira), Märchy-Michel, Marti, Mengotti, Meyer-Grass (Claustra Vitg), Möhr, Nick, Niederer, Noi-Togni, Parolini, Peer, Perl, Pfäffli, Pfister, Plozza, Ratti, Rizzi, Stoffel, Thurner-Steier, Toschini, Troncana-Sauer, Tuor, Vetsch (Pragg Jenaz), Wettstein, Casutt-Derungs (Falera), Engler, Foffa, Furrer-Cabalzar, Kunz (Fläsch)

Session: 22.04.2008
Vorstoss: rg Anfrage


Resposta da la regenza

Ils 28 da zercladur 2006 ha il cussegl federal relaschà la missiva tar la revisiun totala dal dretg tutelar. Il cussegl dals chantuns ha deliberà ils 27 da settember 2007 quest project cun tschertas midadas. La cumissiun per dumondas giuridicas dal cussegl naziunal ha terminà l'avrigl 2008 la tractativa detagliada dal project ed ha surpiglià ils puncts principals dal cussegl dals chantuns. Il cussegl naziunal vegn probablamain a tractar il project en la sessiun d'october.
En sia posiziun – ch'era vegnida tramessa er a las parlamentarias ed als parlamentaris grischuns – aveva la regenza rendì attent gia a chaschun da la procedura da consultaziun a la situaziun topografica e linguistica speziala ed aveva refusà ch'i vegnia stgaffida ina dretgira spezialisada interdisciplinara. A medem temp aveva ella rendì attent ch'i stoppia vegnir tegnì quint meglier da las relaziuns chantunalas u schizunt regiunalas.

1. Il pli tard suenter las votaziuns finalas en il cussegl naziunal ed en il cussegl dals chantuns davart la midada dal cudesch civil svizzer (protecziun da las persunas creschidas, dretg da persunas e dretg dals uffants) vegn l'uffizi da fatgs da polizia e da dretg civil ad elavurar in concept general ed in urari per las lavurs chantunalas da legislaziun. La dretgira chantunala sco autoritad da surveglianza e la federaziun tutelara dal Grischun duain vegnir integradas en furma adattada. Ultra da quai datti las pussaivladads da cooperar en il rom da la legislaziun.

2. Tenor l'art. 440 dal sboz dal CCS è l'autoritad da protecziun da las persunas creschidas in'autoritad spezialisada interdisciplinara che sa cumpona d'almain trais commembras u commembers. Las commembras ed ils commembers che ston vegnir tschernids sin basa da lur enconuschientschas spezialisadas ston avair – tut tenor la situaziun che ha da vegnir giuditgada – ina scolaziun giuridica, psicologica, sociala, pedagogica, fiduziara, medicinala u ina scolaziun dal dretg d'assicuranzas. Ina giurista u in giurist sto esser responsabel ch'il dretg vegnia applitgà correctamain (FF 2006 7073). Il dretg federal na prescriva betg che questa persuna stoppia er surpigliar il presidi, cumbain ch'il presidi è responsabel per la direcziun da la procedura e la finala per l'entira lavur da l'autoritad da protecziun da las persunas creschidas.

3. La grondezza resp. ils intschess da las autoritads tutelaras en il Grischun na sa laschan betg anc determinar per il mument. Partind dals dumbers da cas necessaris fa la conferenza svizra da las autoritads tutelaras chantunalas quint cun in intschess da 50'000 fin 100'000 abitantas ed abitants per avair in manaschi effizient. Sin basa da las cundiziuns geograficas e linguisticas dastgassan ils intschess dal Grischun dentant esser pli pitschens. Fin ussa vegnivan ils custs dals fatgs tutelars surpigliads da las vischnancas sur il deficit dal circul. Per l'avegnir na pon vegnir fatgas anc naginas indicaziuns liantas en quest connex. L'obligaziun da surpigliar ils custs dependa cunzunt dal fatg, sin tge stgalim statal che las incumbensas vegnan plazzadas. Per ils fatgs tutelars na prevesa il project da la NGF grischuna ni in spustament da las incumbensas ni in spustament dals custs.

4. La professiunalisaziun dals fatgs tutelars duai purtar in augment ed ina garanzia da qualitad, quai che na sa lascha probablamain betg realisar senza chaschunar custs. En il rom da las prescripziuns dal dretg federal e tenor sias cumpetenzas da giuditgar vegn la regenza dentant a sa stentar da limitar l'augment dals custs uschè bain sco pussaivel, cur ch'ella concepescha la legislaziun.

5. Per il mument na pon anc vegnir fatgas naginas indicaziuns davart la dumonda, sin tge stgalim che las autoritads spezialisadas duain vegnir organisadas.

Datum: 10 da fanadur 2008