Navigation

Inhaltsbereich

Incumbensa Troncana-Sauer concernent il cumenzament da las lavurs da construcziun per il sviament da Silvaplauna

Sessiun: 22.04.2008
Cun las ultimas protestas dal schaner 2008 pertutgant il project da construcziun per il sviament da Silvaplauna n'èsi betg pli vegnì recurrì al tribunal federal ed uschia n'impedescha ussa – dal puntg da vista giuridic – nagut pli da realisar il project. La suprastanza communala da Silvaplauna ha intervegnì il mars tar l'uffizi da construcziun bassa per vegnir a savair dapli davart l'urari dal project da construcziun per il sviament da Silvaplauna. Cun sgarschur e cun ina gronda dischillusiun ha la suprastanza communala stuì prender enconuschientscha dal fatg che in cumenzament immediat da las lavurs da construcziun na vegn betg en dumonda per l'uffizi da construcziun bassa dal Grischun (empermischiun suenter la finiziun dal sviament da Flem). Sin dumonda è quest fatg vegnì confermà en ina brev a la vischnanca da Silvaplauna; en il fratemp chattan tut las deputadas e tut ils deputads questa conferma en il rapport davart il program da construcziun da vias 2009 - 2012. Il cumenzament da las lavurs da construcziun vegn collià ussa cleramain ed avertamain cun la reclassificaziun da la via sco via naziunala. Il zercladur 2006 ha il deputà Ratti renvià en sia dumonda a la tema da la populaziun da l'Engiadin'ota. Sias supposiziuns èn daventadas oz cumplaina realitad. L'uffizi da construcziun bassa ha admess directamain ch'il destin dal sviament da Silvaplauna giaschia en auters mauns, sche la via vegn reclassifitgada; las Engiadinaisas ed ils Engiadinais stoppian far valair lur interess tar las parlamentarias federalas e tar ils parlamentaris federals, q.v.d. concretamain per ellas e per els: las tribulaziuns cumenzan da nov. Il problem per Silvaplauna e per l'Engiadin'ota n'è betg mo il volumen da traffic, mabain er il privel che vegn chaschunà dal traffic pesant (traject fitg pendent cun ina storta rectangulara al cumenzament dal vitg) e l'impediment che resulta en l'entira Engiadin'ota per il traffic public da bus, perquai che la via sa staupa causa la stretga a Silvaplauna. I na po e na dastga betg esser che l'Engiadin'ota ed en spezial che Silvaplauna ston spetgar ulteriurs 20 onns sin in sviament, mo perquai che la cumpetenza dals patruns da construcziun sa mida.

Las sutsegnadas ed ils sutsegnads supplitgeschan la regenza:
- Da tegnair sia empermischiun ch'i vegnia cumenzà cun las lavurs da construcziun per il sviament da Silvaplauna immediatamain suenter la finiziun dal sviament da Flem. Nus pretendain l'emprima badigliada dal tunnel e betg mo lavurs da planisaziun.
- Da contractar cun la confederaziun cun l'intent d'impegnar la confederaziun da cumenzar cun las lavurs da construcziun per il sviament da Silvaplauna immediatamain suenter che la via è vegnida reclassifitgada (las lavurs da planisaziun ston vegnir terminadas l'onn 2009), u da permetter al chantun da prefinanziar la via, che vegn surpigliada da la confederaziun suenter la reclassificaziun.
- Per il cas che la confederaziun n'è betg pronta da prestar ina tala garanzia, envidain nus la regenza da cumenzar cun la construcziun dal sviament da Silvaplauna l'onn 2010 e d'integrar in import correspundent en il preventiv 2010.

Cuira, ils 22 d'avrigl 2008

Name: Troncana-Sauer, Hartmann (Champfèr), Ratti, Arquint, Berni, Bezzola (Samedan), Bezzola (Zernez), Bischoff, Brantschen, Campell, Casutt (Falera), Caviezel-Sutter (Tusaun), Conrad, Fallett, Fasani, Geisseler, Giovanoli, Hardegger, Hartmann (Cuira), Jäger, Koch, Kunz (Cuira), Mengotti, Möhr, Niederer, Nigg, Noi-Togni, Parolini, Pedrini, Peer, Perl, Pfäffli, Plozza, Ragettli, Thomann, Casutt-Derungs (Falera), Furrer-Cabalzar, Hartmann (Küblis)

Session: 22.04.2008
Vorstoss: rg Auftrag


Resposta da la regenza

La regenza enconuscha la situaziun sin il traject da la via dal Güglia che traversa il vitg da Silvaplauna. Suenter la finiziun dal sviament da Flem è vegnì integrà il sviament da Silvaplauna en il program da la regenza, e quai sco proxim project pli grond d'ina via principala. Las lavurs da projectaziun èn vegnidas promovidas en quest senn. Suenter che la dretgira administrativa dal Grischun ha refusà tut ils recurs cunter il project da sviament e suenter che las recurrentas e ch'ils recurrents han desistì da recurrer anc tar il tribunal federal, è il project pia approvà legalmain dapi il cumenzament da favrer 2008.

L'avrigl 2006 ha il cussegl federal concludì ina nova rait fundamentala (rait da vias naziunalas) en il rom dal plan secturial "traffic sin via". Questa rait cuntegna – supplementarmain a las vias naziunalas existentas dal Grischun – er il traject da la via principala Tusaun – Casti – Silvaplauna. Sche quest traject vegniss reclassifitgà, daventass la confederaziun sia proprietaria. La decisiun davart la reclassificaziun è chaussa da las chombras federalas e vegn spetgada per la fin da l'onn 2009. La decisiun vegn ad entrar en vigur probablamain il pli baud il cumenzament da l'onn 2011.

Sche las lavurs da construcziun vegnissan cumenzadas avant l'eventuala reclassificaziun da la via, avess quai per consequenza – tenor l'uffizi federal da vias – ch'il chantun stuess terminar tut ils projects a ses custs. Per projects pli pitschens u per projects cun in'etappaziun n'è quai betg problematic. Per projects gronds che chaschunan gronds custs ston dentant las consequenzas da questa cundiziun vegnir resguardadas obligantamain.

Independentamain da la dumonda d'ina reclassificaziun vegnan promovidas intensivamain las lavurs da projectaziun per il sviament da Silvaplauna. En emprima lingia sa tracti qua d'adattar il project a las pretensiuns augmentadas pertutgant la segirezza en ils tunnels e da rectifitgar il project cun la confederaziun. Suenter vegn cumenzada l'elavuraziun dal project d'execuziun per ch'i saja avant maun uschè svelt sco pussaivel in project ch'è pront per la publicaziun e per la construcziun. Quest project vegn ad esser avant maun il pli baud il cumenzament da l'onn 2010.

Davart las pretensiuns concretas prenda la regenza posiziun sco suonda:

- Igl è anc adina evidentamain l'intenziun da la regenza da cumplettar il sviament existent da Silvaplauna sur la via d'Engiadina cun in sviament da la via dal Güglia. Las lavurs da projectaziun per quest proxim project pli grond d'emprima prioritad vegnan promovidas. Areguard il termin dal cumenzament da las lavurs da construcziun ston vegnir resguardadas novas cundiziuns da basa che n'èn dentant betg stadas previsiblas fin ussa.

- La regenza è gia entrada en tractativas cun la confederaziun per chattar ina soluziun en il senn da l'incumbensa qua avant maun.

- Pervia da la situaziun existenta pari a la regenza indispensabel ch'i vegnia sclerì – avant che cumenzar cun las lavurs da construcziun – a tge rait ch'il traject da via en dumonda appartegna e las cumpetenzas respectivas. Ina finanziaziun dal sviament da Silvaplauna che appartegness eventualmain a la rait da vias naziunalas, ma ch'il chantun stuess surpigliar cumplettamain, na po betg vegnir responsada per motivs finanzials.

La regenza è pia pronta d'acceptar l'incumbensa, cun excepziun da la pretensiun da reservar meds finanzials en il preventiv da l'onn 2010 per realisar la construcziun dal sviament da Silvaplauna.

Datum: 3 da fanadur 2008