Navigation

Inhaltsbereich

Dumonda Rathgeb concernent in'utilisaziun optimala da la forza idraulica en il chantun Grischun

Sessiun: 23.04.2008
Sut il titel "Aufbruchstimmung bei Kraftwerksgesellschaften" è vegnida publitgada en il "Bündner Tagblatt" dal 1. da mars 2008 ina survista da projects actuals da forza idraulica en il Grischun. Per quest intent è il schurnalist sa basà sin in document da l'uffizi d'energia e da traffic dals 30 da schaner 2008. En vista al fatg ch'i vegn pussibilità da producir energia persistenta ed ecologica en lieus grischuns, sto la renaschientscha da la forza idraulica grischuna vegnir beneventada grondamain.

Igl è chaussa da las vischnancas da dar concessiuns per utilisar la forza idraulica. La lescha davart il dretg da las auas dal chantun Grischun (LDAG) prevesa dentant ch'ils interess da las vischnancas e dal chantun vegnian coordinads per garantir che las forzas idraulicas possian vegnir cumplettadas en ina moda ch'è raschunaivla per l'economia e giustifitgabla per l'ambient. En quest reguard exista consequentamain ina tscherta tensiun. L'art. 4 da la lescha federala davart il dretg da las auas (LDA) determinescha en quest connex che las autoritads chantunalas hajan in dretg d'approvaziun tar la concessiun dals dretgs d'utilisaziun e possian refusar ina concessiun, sche l'utilisaziun previsa cuntrafaschess als interess publics u a l'utilisaziun raziunala da las auas.

Perquai ch'igl èn evidentamain avant maun numerus projects, stoi vegnir evità che singuls projects pitschens pudessan impedir projects d'ovras idraulicas pli grondas ch'èn relevantas per il provediment d'electricitad ed uschia per il maun public. Blers projects pitschens pudessan chaschunar ina sparpagliada betg giavischada e pauc raschunaivla che sto vegnir evitada ord vista chantunala, sch'ils potenzials da la forza idraulica ch'èn avant maun duain vegnir utilisads en moda optimala. Sin basa dals numerus projects da cumplettaziun e da construcziun sa tschentan las sutsegnadras ed ils sutsegnaders la dumonda, tenor tge concept ch'il chantun haja l'intenziun da garantir ch'ils potenzials da la forza idraulica ch'èn avant maun vegnian utilisads en moda optimala en il senn dal dretg chantunal e federal davart las auas.

Cuira, ils 23 d'avrigl 2008

Name: Rathgeb, Bleiker, Loepfe, Barandun, Berni, Bezzola (Samedan), Bezzola (Zernez), Bondolfi, Brandenburger, Brüesch, Buchli, Castelberg-Fleischhauer, Casty, Christoffel-Casty, Claus, Clavadetscher, Conrad, Dudli, Hasler, Heinz, Keller, Kessler, Krättli-Lori, Kunz (Cuira), Mani-Heldstab, Märchy-Michel, Meyer-Grass (Claustra Vitg), Thomann, Toschini, Vetsch (Pragg-Jenaz), Wettstein, Zanetti, Furrer-Cabalzar

Session: 23.04.2008
Vorstoss: rg Anfrage


Resposta da la regenza

La lescha federala davart l'utilisaziun da las forzas d'aua (lescha davart il dretg da las auas; LDA) ha la finamira da promover e da segirar l'utilisaziun raziunala da las forzas d'aua en l'entira Svizra (art. 5 LDA). Sin basa da quai vegn questa finamira precisada tras la lescha davart il dretg da las auas dal chantun Grischun (LDAG), e quai tranter auter uschia, ch'i sto vegnir garantì che la forza idraulica indigena vegnia utilisada raziunalmain a favur da las vischnancas, da las regiuns e dal chantun. Ultra da quai duai vegnir pussibilità d'optimar e d'augmentar la prestaziun da las ovras idraulicas existentas sco er da cumplettar las forzas idraulicas en ina moda ch'è raschunaivla per l'economia e giustifitgabla per l'ambient. L'utilisaziun da la forza idraulica vegn resguardada sco raziunala, sch'ina part uschè gronda sco pussaivel dal potenzial legalmain permess sin in traject d'auas vegn tratga a niz e transfurmada en energia, sche ulteriurs potenzials d'utilisaziun en il territori vischin vegnan integrads en l'utilisaziun planisada, premess ch'els na possian betg vegnir utilisads independentamain en il rom d'auters projects, e la finala sche ovras situadas ina suenter l'autra vegnan manadas uschia, che lur producziun d'energia è accordada uschè bain sco pussaivel (art. 13 da l'ordinaziun tar la lescha davart il dretg da las auas dal chantun Grischun [ODAG]).

En connex cun l'inoltraziun da projects da forza idraulica pretenda il chantun – sin basa da las disposiziuns numnadas qua survart – che las petentas e ch'ils petents motiveschian lur projects tranter auter a norma da l'utilisaziun raziunala da la forza idraulica. Plinavant ston las petentas ed ils petents cumprovar ch'ina ovra planisada correspundia – sco implant general – a l'utilisaziun raziunala da las forzas d'aua. En il rom d'ina procedura d'approvaziun d'ina concessiun resp. d'in project vegni correspundentamain examinà tar mintga project concret, sch'el ademplescha il criteri da l'utilisaziun raziunala da la forza idraulica. Plinavant vegni sclerì, sch'ina ovra restrenscha pli tard in'utilisaziun raziunala d'in intschess resp. pussibilitescha in'utilisaziun cumplessiva ed optimala.

Ultra da quai stoi vegnir menziunà ch'il plan directiv chantunal (PDChant), ch'è liant per las autoritads, cuntegna – sco determinaziuns – las utilisaziuns existentas da la forza idraulica e – sco opziuns – differentas zavradas per utilisaziuns futuras pussaivlas (agiunta 3.V1 e 4 dal PDChant).

Planisaziuns da vischnancas, da regiuns, dal chantun, da la confederaziun sco er da vischinas e da vischins sa midan permanentamain e s'adattan cuntinuadamain a las relaziuns actualas ed als novs basegns. La necessitad da coordinar e d'accordar è pervia da quai ina incumbensa permanenta. Pia sto er il plan directiv vegnir examinà ed adattà periodicamain. Gist en vista al svilup dinamic en il sectur da l'energia ed en vista ad in interess pli grond vi d'implants per la producziun d'energia ils ultims onns examinescha il chantun, sch'igl è necessari da far in'adattaziun generala da la part da l'energia en il PDChant.

Da quai poi vegnir concludì ch'il chantun disponia – cun las basas legalas existentas sco er cun il PDChant – gia d'instruments avunda per garantir in'utilisaziun optimala dals potenzials da la forza idraulica ch'èn avant maun.

Datum: 3 da fanadur 2008