Navigation

Inhaltsbereich

Incumbensa da la fracziun da la PS concernent in scumond da stgaudaments electrics (emprim sutsegnader Pfenninger)

Sessiun: 28.08.2008
Tranter ils differents purtaders d'energia che vegnan utilisads per producir energia da stgaudar è l'electricitad ina da las energias las pli contestadas. L'efficacitad per intents da stgaudar è nauscha. Mintga ura da kilowatt electricitad dovra trais giadas uschè blera energia da partenza. I na fa betg senn da stgaudar cun electricitad d'auta qualitad. Ils circa 240'000 stgaudaments electrics en Svizra èn magliadruns d'electricitad che na dastgan betg vegnir sutvalitads e che dovran tranter 9 e 14 % dal consum naziunal per onn. Mo durant ils mais d'enviern fraids, dal november fin il favrer, absorbeschan 6,7 % da las abitaziuns bunamain la mesadad da l'entira capacitad da las ovras atomaras. 14'660 stgaudaments electrics stgaudan cun energia electrica er en il Grischun circa 11,4 % da las abitaziuns. Questas abitaziuns dovran approximativamain fin 15 % dal consum d'electricitad dal Grischun. La part grischuna dals stgaudaments electrics da la Svizra è considerabla ed importa bundant 6 %.

Sut l'aspect da l'effizienza energetica e d'in consum spargnus e persistent da l'energia duessi vegnir desistì totalmain da construir novs stgaudaments electrics. Anc pli impurtant è in program da substituziun per ils stgaudaments electrics existents, dals quals blers èn passa 25 onns vegls. Da la problematica en connex cun las abitaziuns secundaras duai vegnir tegnì quint cun fixar termins transitorics correspundents il mument ch'i vegn realisada l'obligaziun da cumpensaziun. Igl è impurtant ch'i vegnia fatg diever da las pussaivladads actualas tar l'isolaziun er d'edifizis vegls, dentant er tar la tecnica da chasa. Questas pussaivladads reduceschan il consum d'energia sin in minimum. Il basegn d'energia restant po vegnir cuvrì cun ina tecnica da stgaudar (p.ex. pellets da lain) che satisfa er a las pretensiuns modernas. Dals stgaudaments electrics èn plinavant circa la mesadad installaziuns centralas che pon vegnir transfurmadas per regla prendend mesiras tecnicas moderadas.

Las mesiras da la confederaziun e dal chantun, cun lur programs d'acziun, èn orientadas cleramain a la promoziun da l'effizienza energetica. Pertutgant ils edifizis datti ils pli gronds potenzials. Quai duai vegnir realisà en moda consequenta. L'utilisaziun da stgaudaments electrics cuntrafa diametralmain a quest propiest.
A chaschun da la proxima revisiun totala da la lescha d'energia dal chantun Grischun stoi vegnir tegnì quint da la problematica descritta. Il scumond da stgaudaments electrics (installaziuns novas), tenor il nov model da prescripziuns (MoPEC 2008) da la conferenza da las directuras e dals directurs chantunals d'energia (CDEn), duai vegnir integrà en la lescha d'energia dal chantun Grischun.

En la nova lescha d'energia duai plinavant vegnir fixà che stgaudaments electrics existents na dastgan betg vegnir renovads e ch'els ston vegnir remplazzads cun auters sistems da stgaudar suenter l'entrada en vigur da la lescha d'energia. Ultra da quai duai vegnir previsa per tut ils stgaudaments electrics in'obligaziun da cumpensaziun cun in termin transitoric fin il pli tard l'onn 2030.

Cuira, ils 28 d'avust 2008

Pfenninger, Bucher-Brini, Baselgia-Brunner, Frigg-Walt, Gartmann-Albin, Jaag, Jäger, Menge, Meyer-Persili (Cuira), Peyer, Pfiffner-Bearth, Thöny, Trepp, Fischer, Locher Benguerel

Resposta da la regenza

La lescha federala d'energia (LEn) oblighescha ils chantuns da relaschar prescripziuns per in'utilisaziun spargnusa e raziunala da l'energia en edifizis (art. 9 LEn). En quest connex sa tracti en spezial da prescripziuns davart la quota admissibla maximala d'energias betg regenerablas per cuvrir il basegn da chalur per il stgaudament e per l'aua chauda, davart l'installaziun e davart il remplazzament da stgaudaments da resistenza electrics fixs, davart las finamiras che vegnan concludidas cun consuments gronds e davart il quint individual dals custs dal stgaudament e da l'aua chauda.

Per armonisar las legislaziuns chantunalas edescha la conferenza da las directuras e dals directurs chantunals d'energia (CDEn) in "Model da prescripziuns davart l'energia dals chantuns" (MoPEC) ch'è vegnì revedì l'ultima giada ils onns 2007/2008 e deliberà da la CDEn ils 4 d'avrigl 2008.

Concernent stgaudaments electrics da resistenza fixs prescriva il MoPEC il suandant: Da princip èsi scumandà d'installar novs stgaudaments da resistenza electrics fixs per stgaudar edifizis. Medemamain èsi scumandà da remplazzar stgaudaments electrics da resistenza fixs cun sistems da distribuziun da l'aua tras in nov stgaudament da resistenza fix. Er in stgaudament electric da resistenza fix na dastga betg vegnir duvrà sco stgaudament supplementar, e stgaudaments d'urgenza èn permess mo limitadamain. En las legislaziuns chantunalas ston vegnir precisadas questas disposiziuns; eventualas excepziuns ston vegnir definidas.
En la revisiun da la lescha d'energia dal chantun Grischun (LEG), che vegn actualmain elavurada, èsi previs da surpigliar da princip las disposiziuns dal MoPEC che concernan ils stgaudaments electrics da resistenza fixs.

En quest connex stoi dentant vegnir precisà, tge che appartegna exactamain als "stgaudaments electrics da resistenza fixs" e tge stgaudaments d'urgenza ch'èn permess en tge dimensiun. In'examinaziun pli profunda dovri er per sclerir, sche e tge stgaudaments electrics da resistenza che pon vegnir admess sco stgaudaments supplementars. I po per exempel esser raschunaivel d'utilisar stgaudaments electrics supplementars là, nua che l'applicaziun d'energias regenerablas po vegnir promovida u nua che l'effizienza energetica po vegnir meglierada. La finala ston vegnir resguardadas er las relaziuns topograficas e climaticas dal Grischun.
I duai er vegnir examinà detagliadamain, tge stgaudaments electrics da resistenza existents che dastgan eventualmain vegnir renovads e plinavant sche ed entaifer quant temp ch'igl è pussaivel d'introducir in'obligaziun da remplazzar ils stgaudaments.

Perquai che l'incumbensa da fracziun ha – areguard ils stgaudaments electrics – da princip las medemas finamiras sco la revisiun gia instradada da la lescha d'energia dal chantun Grischun, è la regenza pronta d'acceptar l'incumbensa per la suttametter ad in'examinaziun pli detagliada.

31 d'october 2008