1. La protecziun chantunala dal stadi n'elavura actualmain naginas datas da deputadas e da deputads en il chantun Grischun. Concernent datas federalas da la protecziun dal stadi n'è la regenza betg autorisada da dar scleriments. Tenor l'art. 18 da la lescha federala davart mesiras per mantegnair la segirezza interna (LMSI; CS 120) è l'incumbensà federal per la protecziun da datas e per la transparenza responsabel per quai. Nagin vegn registrà pervia d'activitads politicas; igl è dentant permess d'elavurar infurmaziuns, sche la persuna cun in mandat politic è activa en ina moda ch'è relevanta per la protecziun dal stadi, sco per exempel sch'ella tgira il contact cun ina gruppaziun che figurescha sin la glista d'observaziun dal cussegl federal.

2. La polizia chantunala n'elavura en nagin cas datas da persunas che s'engaschan politicamain en in rom democratic e legal.

3. La protecziun federala dal stadi vegn ademplida en il rom dal LMSI e cumpiglia las incumbensas dal servetsch d'infurmaziun en Svizra cun la finamira d'identifitgar svilups che pericliteschan la constituziun e d'iniziar mesiras preventivas u repressivas. En quest rom lavura il chantun per incumbensa da la confederaziun (art. 6 LMSI). Sia incumbensa è quella da procurar, d'elavurar e da derasar independentamain novitads en ils secturs ch'èn relevants per la protecziun dal stadi sin il territori dal chantun (art. 11 s. LMSI).

Tenor l'art. 2 lit. c da la lescha da polizia (DG 613.000) vegnan las incumbensas che concernan la protecziun dal stadi en il chantun Grischun ademplidas da la polizia chantunala. En quest connex sa tracti d'observar ils champs ch'èn relevants per la segirezza chantunala, per ch'i possian cumenzar a temp retschertgas da la polizia giudiziala u ch'i possian vegnir prendidas mesiras concernent la defensiun cunter privels. Decisivas èn – en quest connex – incaricas singulas (art. 6 LMSI) ed incaricas d'infurmaziun generalas da la confederaziun (art. 11 al. 1 LMSI), la glista d'observaziun dal cussegl federal (art. 11 al. 2 s. LMSI) sco er las controllas da segirezza da las persunas (art. 19 ss. LMSI). Vitiers vegnan basegns chantunals che sa refereschan a la segirezza interna, sco per exempel l'observaziun da l'extremissem local da dretg e da sanester, dal hooliganissem local u da persunas dispostas a la violenza en il senn da l'art. 28 LPol.

Il servetsch d'analisa e prevenziun (SAP) da l'uffizi federal da polizia, che ademplescha l'incumbensa da la protecziun federala dal stadi, è en correspundenza directa cun il commando da polizia. Entaifer la polizia chantunala è il servetsch d'infurmaziun responsabel per la collavuraziun cun il SAP. Las incumbensas e las cumpetenzas dal servetsch d'infurmaziun èn regladas en instrucziuns da servetsch ed en descripziuns da las plazzas. La polizia chantunala vegn indemnisada per las prestaziuns a favur da la confederaziun.

4. Las datas ch'èn relevantas per la protecziun dal stadi e che vegnan registradas da la polizia chantunala vegnan elavuradas – separadamain da datas chantunalas – en il sistem informatisà per l'elavuraziun da datas areguard la protecziun dal stadi (ISIS) da la confederaziun. L'elavuraziun da las datas e la protecziun da datas succedan tenor dretg federal (art. 15 fin 18 LMSI) e tenor l'ordinaziun ISIS (CS 120.3).

Questas datas da persunas pon ultra da quai er vegnir registradas en il sistem d'elavuraziun da datas da la polizia chantunala. En quest cas vegnan quellas elavuradas tenor las disposiziuns davart la protecziun da datas dals art. 27 fin 29 da la lescha da polizia e dals art. 37 ss. da l'ordinaziun da polizia (DG 613.100) ch'èn formuladas en moda pli restrictiva che talas da la confederaziun.

5. La regenza n'enconuscha nagin basegn d'agir. Las incumbensas e las cumpetenzas dal servetsch d'infurmaziun sco er la collavuraziun cun il SAP èn regladas e funcziuneschan. Ils champs chantunals d'observaziun èn definids e la scheffa dal departament da giustia, segirezza e sanadad vegn infurmada periodicamain davart las enconuschientschas.

5 da november 2008