La regenza vegn incumbensada d'elavurar – ensemen cun las vischnancas dal Scanvetg, cun la vischnanca da Tavau e cun la Viafier retica – in studi d'opportunitad e da realisabladad per ina colliaziun da viafier tranter il Scanvetg e la vischnanca da Tavau e da rapportar al cussegl grond davart ils resultats. Il studi duai ir a donn e cust dal credit per novas colliaziuns da traffic (colliaziuns da vals).

Ses cuntegn duai cumpigliar almain las suandantas tematicas: variantas dals trassés cun selecziun da la meglra varianta, coincidenzas cun la rait da la VR ad Arosa/Langwies ed a Tavau cun stimaziuns dals custs da +/-30 pertschient e stimaziuns dal potenzial per las lingias
• Basilea/Turitg – Cuira – Tavau
• Arosa/Langwies – Tavau – San Murezzan – Bernina – Tiran
• Arosa/Langwies – Claustra – Veraina – Engiadina bassa
• Tavau – Langwies – Cuira – Mustér – Andermatt

A medem temp ston vegnir resguardads ulteriurs aspects: consequenzas per il turissem e per l'economia publica en general, scleriments geologics, creaziun d'ina rait tras la colliaziun directa da viafier Scanvetg – Tavau (p.ex. en cas d'in incap relevant sin la lingia dal Partenz), ponderaziuns da manaschi, consequenzas per il trassè Cuira – Langwies, lingia tras la citad da Cuira e diever cuminaivel da la nova staziun a dus binaris sin la plazza da la staziun da Cuira sco er ulteriuras pussaivladads.

Gia pli baud èn vegnidas fatgas regularmain stentas per colliar il Scanvetg cun la vischnanca da Tavau. Nus vulain menziunar mo dus projects: 1. Ina viafier a roda dentada dad Arosa/Langwies sur ils pass dal Furgga/Strela a Tavau (conclus federal dals 21 da zercladur 1913). 2. In tunnel da via Langwies – Strela – Tavau (postulat Schaad, acceptà dal cussegl grond ils 17 da favrer 1970 cun 62 cunter 0 vuschs). Er en connex cun la consultaziun davart l'adattaziun dal plan directiv chantunal/MACC (program d'aglomeraziun) da l'october 2006 han las vischnancas dad Arosa e da Langwies beneventà expressivamain ina colliaziun tras in tunnel da viafier.

Igl è interessant per tut il Grischun che las vals vegnian colliadas meglier ina cun l'autra. Ina colliaziun da viafier directa Scanvetg – Tavau procurass per Arosa ina stretga colliaziun cun las destinaziuns turisticas Tavau/Claustra – Veraina – Engiadina bassa e Tavau – San Murezzan. Tavau survegniss ina colliaziun da viafier directa ed attractiva cun la chapitala Cuira che cumpigliass in temp da viadi da circa in'ura.

Ina colliaziun cun in tunnel Scanvetg – Tavau (da circa 7,7 kilometers) correspunda als projects da viafier Engiadina bassa – Vnuost sura e Mustér – Andermatt (sco project successiv da la Porta Alpina) ed als criteris dal credit da 10 milliuns francs ch'è vegnì concedì dal cussegl grond per novas colliaziuns da traffic (numnadas pli baud pli correctamain "colliaziuns da vals"). Cun in tunnel Scanvetg – Tavau vegni er tegnì quint dal transferiment dal traffic da la via sin ils binaris e pia dal factur ecologic.

Cuira, ils 21 d'october 2008

Jenny, Stiffler, Koch, Arquint, Berther (Sedrun), Bezzola (Samedan), Bezzola (Zernez), Blumenthal, Brandenburger, Bucher-Brini, Buchli, Butzerin, Caduff, Casparis-Nigg, Castelberg-Fleischhauer, Casty, Casutt, Cavigelli, Christoffel-Casty, Clavadetscher, Dermont, Donatsch, Federspiel, Feltscher, Giovanoli, Hardegger, Hartmann (Cuira), Jäger, Kessler, Kleis-Kümin, Kunz, Loepfe, Mani-Heldstab, Märchy-Michel, Marti, Menge, Mengotti, Michel (Tavau Monstein), Möhr, Peer, Pfenninger, Pfister, Portner, Rizzi, Stoffel, Tenchio, Thöny, Trepp, Valär, Vetsch (Claustra Vitg), Vetsch (Pragg-Jenaz), Bürkli-Wolf, Candinas (Mustér), Degonda, Furrer-Cabalzar, Grendelmeier, Züst

Session: 21.10.2008
Vorstoss: rg Auftrag