Navigation

Inhaltsbereich

Incumbensa Mani-Heldstab concernent il screening mammografic en il chantun Grischun (program da prevenziun cunter il cancer dal sain)

Sessiun: 09.12.2008
Situaziun da partenza:

Per incumbensa da l'uffizi federal da sanadad publica e da la conferenza svizra da las directuras e dals directurs chantunals da sanadad ha Oncosuisse sviluppà il program naziunal cunter il cancer per la Svizra 2005 – 2010. Ina da las finamiras è da meglierar la diagnosa tempriva dal cancer. Cun agid da tests da la diagnosa tempriva duai in tumor vegnir identifitgà, avant ch'ils sintoms sa fan valair. En il rom d'in program da screening mammografic cun qualitad controllada appartegna la mammografia a las controllas da la diagnosa tempriva che sa refereschan a la populaziun e ch'èn perscrutadas il meglier. Pli baud che midadas malignas en il tessì dal sain da las dunnas vegnan scuvertas e main engrevgiants ch'ils tractaments èn, e meglras che las schanzas d'ina guariziun èn. La diagnosa tempriva dal cancer dal sain cun agid da la mammografia po sbassar la mortalitad relativa da la gruppa en mira, q.v.d. da las dunnas tranter 50 e 70 onns, per ca. 20%. Cun passa 1400 mortoris per onn è il cancer dal sain in dals problems principals da la sanadad publica.

La reducziun da la quota da mortalitad n'è dentant betg il sulet criteri per giuditgar l'efficacitad d'in tal program. La reducziun da la quota da tumors avanzads – ed uschia l'impediment da lungas operaziuns, da chemoterapias pli intensivas e dad irradiaziuns pli extendidas – èn medemamain effects giavischads.

L'onn 1999 ha il cussegl federal deliberà l'ordinaziun davart la garanzia da qualitad dals programs per diagnostitgar a temp il cancer dal sain cun agid da la mammografia, e dapi il 1. da fanadur 1999 ston las controllas da prevenziun en il rom dal screening mammografic vegnir surpigliadas da las cassas en l'assicuranza fundamentala. Las controllas ston ademplir pretensiuns da qualitad correspundentas. Cun la midada da l'ordinaziun dal departament federal da l'intern (DFI) davart las prestaziuns da l'assicuranza obligatorica per la tgira da malsauns dals 21 da november 2007 è l'obligaziun da la cassa bain vegnida prolungada, dentant betg definitivamain, mabain mo per 2 onns, q.v.d. fin ils 31 da december 2009. A medem temp ha il DFI dentant intimà ils chantuns d'introducir tals programs cun qualitad controllada.
Gia en plirs chantuns svizzers, cunzunt en Svizra romanda, èn vegnids introducids dapi intgins onns programs da prevenziun per diagnostitgar a temp il cancer dal sain. Per il mument n'han las dunnas da la Svizra orientala – cun excepziun da Son Gagl a partir da l'onn 2009 – betg anc access a tals programs. Ellas vegnan assegnadas ad ina mammografia sin atgna dumonda ubain sin recumandaziun da lur media resp. da lur medi da chasa u da lur ginecologa resp. da lur ginecolog. Quest uschenumnà screening opportunistic sto vegnir pajà da las cassas da malsauns mo, sche la mamma, sch'ina figlia u sch'ina sora ha gì cancer dal sain.

En il senn d'ina prevenziun en atgna responsabladad ed en il senn da l'egualitad da las schanzas duessan – er en il Grischun – tut las dunnas da la gruppa da vegliadetgna da 50 fin 70 onns pudair profitar dals avantatgs da la prevenziun medicinala sistematica, e quai independentamain dal fatg, sch'igl ha gia dà in tal cas en famiglia, ed independentamain da lur lieu da domicil e da lur situaziun finanziala.

Incumbensa:

Las sutsegnadas ed ils sutsegnads envidan perquai la regenza da sviluppar e da realisar in program da prevenziun cunter il cancer dal sain cun qualitad controllada per il chantun Grischun.

Cuira, ils 9 da december 2008

Mani-Heldstab, Bühler-Flury, Darms-Landolt, Barandun, Berther (Mustér), Bezzola (Zernez), Bischoff, Bleiker, Blumenthal, Brüesch, Bucher-Brini, Buchli, Bundi, Butzerin, Cahannes Renggli, Campell, Casparis-Nigg, Castelberg-Fleischhauer, Casutt, Caviezel-Sutter (Tusaun), Cavigelli, Christoffel-Casty, Dudli, Fasani, Federspiel, Felix, Feltscher, Frigg-Walt, Gartmann-Albin, Geisseler, Giovanoli, Hardegger, Hartmann (Cuira), Hartmann (Champfèr), Hasler, Heinz, Jaag, Jeker, Kleis-Kümin, Koch, Krättli-Lori, Kunz (Cuira), Menge, Mengotti, Meyer Persili (Cuira), Meyer-Grass (Claustra Vitg), Michel (Tavau Monstein), Möhr, Nigg, Noi-Togni, Parolini, Parpan, Pedrini, Perl, Pfäffli, Pfiffner-Bearth, Pfister, Plozza, Portner, Ragettli, Ratti, Righetti, Rizzi, Sax, Stiffler, Stoffel, Thomann, Thöny, Troncana-Sauer, Valär, Zanetti, Caluori, Cattaneo, Clalüna, Engler, Furrer-Cabalzar, Hartmann (Küblis), Hauser, Jecklin-Jegen, Kunz (Fläsch), Märchy-Caduff (Domat), Michel (Cuira), Patt

Session: 09.12.2008
Vorstoss: rg Auftrag

Resposta da la regenza

Mammografias da prevenziun en il rom da controllas da seria cun qualitad controllada – ils uschenumnads screenings mammografics – vegnan recumandadas per dunnas en la vegliadetgna da 50 fin 70 onns, perquai che la ristga da survegnir cancer dal sain è la pli gronda en questa vegliadetgna.

Tenor l'ordinaziun davart las prestaziuns per la tgira da malsauns ston mammografias da prevenziun en cas da dunnas da 50 fin 70 onns vegnir pajadas da l'assicuranza obligatorica per la tgira da malsauns, sch'ellas han lieu en il rom da programs chantunals cun qualitad controllada. Las assicuranzas da malsauns ston surpigliar ils custs directs per la prestaziun tecnica da la mammografia sco er per la prestaziun medicinala da la diagnosa. Ils chantuns ston finanziar ils custs che na vegnan betg surpigliads da las cassas da malsauns, vul dir ils custs per la logistica dal program e per il manaschament da la qualitad sco er ils custs per controllar l'efficacitad da l'entir program. Ils 21 da november 2007 ha il cussegl federal prolungà fin la fin da l'onn 2009 l'obligaziun da las assicuranzas da malsauns da surpigliar ils custs per il screening mammografic che ha lieu en il rom da programs chantunals. Questa obligaziun era limitada fin ils 31 da december 2007. Durant quest temp duai la confederaziun adattar las prescripziuns da qualitad. La confederaziun ha appellà als chantuns d'introducir programs per il screening mammografic. Uschia ha ella dà d'enconuscher ch'i saja previs che las assicuranzas da malsauns surpiglian ils custs per il screening mammografic er suenter l'onn 2009.

Tant la qualitad dals screenings sco er la qualitad da las diagnosas dependan fermamain da l'experientscha specifica dal persunal medicinal-tecnic ed oravant tut da l'experientscha da la radiologa u dal radiolog. Ina rolla centrala gioga en quest connex la pratica tras uschè bleras mammografias sco pussaivel, las qualas vegnan legidas regularmain. Las prescripziuns da qualitad ch'èn cuntegnidas en l'ordinaziun dal cussegl federal davart la garanzia da qualitad dals programs per diagnostitgar a temp il cancer dal sain cun agid da la mammografia e che valan per las medias e per ils medis che mainan tras e che legian mammografias, tegnan quint da quest aspect.

En l'ura da dumondas da la sessiun da december 2007 ha la regenza menziunà che ella saja pronta d'examinar la dumonda d'introducir in program per il screening mammografic en il Grischun sin basa da las enconuschientschas ch'èn actualmain avant maun.

Sin basa da las enconuschientschas ch'èn actualmain avant maun ston ins partir dal fatg che la diagnosa tempriva dal cancer dal sain cun agid da la mammografia è ina da las paucas metodas per diagnostitgar a temp il cancer, las qualas pon sbassar cumprovadamain la mortalitad. La premissa è che la mammografia haja lieu en il rom da programs da screening cun qualitad segirada, ils quals èn organisads tras e tras. Correspundentamain ha l'uffizi da sanadad cumenzà cun lavurs concepziunalas per introducir il screening mammografic en collavuraziun cun la lia grischuna cunter il cancer e cun l'ospital chantunal dal Grischun. La regenza vegn a proponer al cussegl grond da metter a disposiziun ils meds finanzials ch'èn necessaris per realisar il program per il screening mammografic, e quai – tut tenor l'avanzament da las lavurs – en il preventiv 2010 u eventualmain en il rom d'in credit posteriur per l'onn current. Ils custs unics ston vegnir calculads cun 200'000 fin 500'000 francs, ils custs periodics cun 300'000 fin 400'000 francs per onn. Indicaziuns pli exactas pon vegnir fatgas pir, suenter che l'incumbensa d'installar e da manar il program per il screening mammografic per il chantun è vegnida publitgada.

La regenza propona d'acceptar questa incumbensa.

18 da mars 2009