Navigation

Inhaltsbereich

Incumbensa Kunz concernent la gulivaziun da la progressiun fraida

Sessiun: 11.12.2008
Sch'ils salaris e sche las entradas vegnan adattads a l'inflaziun, creschan quels nominalmain. Pervia da quest augment nominal da las entradas vegnan las pajataglias ed ils pajataglias en ina progressiun fiscala pli auta, quai che chaschuna ina grevezza fiscala pli gronda. Quest proceder vegn numnà progressiun fraida. Malgrà che las pajataglias e ch'ils pajataglias n'han betg dapli daners en satg, ston ellas ed els pajar dapli taglia, quai che restrenscha la basa da lur entradas. Quest augment da taglia tutga tut las classas d'entrada.

Tenor l'art. 4 da la lescha da taglia vegn la progressiun fraida gulivada pir, cur che l'index naziunal dals pretschs da consum divergescha il fanadur d'in onn chalendar per 10 pertschient u per in import multipel dal stadi da la fin da december 2005. Tenor l'avis da las sutsegnadas e dals sutsegnads è ina differenza da 10 pertschient memia gronda. Resguardond la praticabladad da l'incassament da la taglia, vegn la regenza perquai incumbensada da formular da nov l'art. 4 da la lescha da taglia, per che l'adattaziun a la chareschia haja lieu pli svelt, e da suttametter questa nova formulaziun al cussegl grond sco midada da lescha. Tenor l'avis da las sutsegnadas e dals sutsegnads duess in'adattaziun avair lieu, cur che la differenza da l'index naziunal relevant importa 3 pertschient.

Cuira, ils 11 da december 2008

Kunz (Cuira), Dudli, Cahannes Renggli, Augustin, Bezzola (Zernez), Bleiker, Blumenthal, Brüesch, Bucher-Brini, Buchli, Bundi, Casparis-Nigg, Casty, Casutt, Caviezel (Pitasch), Cavigelli, Christoffel-Casty, Clavadetscher, Conrad, Fasani, Felix, Gartmann-Albin, Geisseler, Giovanoli, Hartmann (Cuira), Hartmann (Champfèr), Hasler, Jeker, Jenny, Kleis-Kümin, Koch, Krättli-Lori, Loepfe, Märchy-Michel (Malans), Marti, Mengotti, Meyer-Grass (Claustra Vitg), Michel (Tavau Monstein), Möhr, Nick, Niederer, Parolini, Parpan, Pedrini, Peer, Peyer, Pfäffli, Pfiffner-Bearth, Pfister, Plozza, Portner, Quinter, Ragettli, Righetti, Rizzi, Stiffler, Tenchio, Thomann, Thöny, Toschini, Troncana-Sauer, Tscholl, Tuor, Valär, Caluori, Cattaneo, Clalüna, Engler, Furrer-Cabalzar, Hartmann (Küblis), Hauser, Kunz (Fläsch), Michel (Cuira), Niederberger, Patt

Session: 11.12.2008
Vorstoss: rg Auftrag

Resposta da la regenza

Tenor il dretg vertent vegn la progressiun fraida gulivada, sche l'index naziunal dals pretschs da consum è s'augmentà per 10 pertschient u per in import multipel da quel. A la regenza para raschunaivla in'adattaziun en pass pli pitschens. Ella vegn perquai a proponer al cussegl grond – a chaschun da la proxima revisiun da la lescha da taglia – ina midada correspundenta da l'artitgel 4. En quest connex duai vegnir concludida ina regulaziun, cun la quala vegnian resguardads egualmain ils interess da las pajataglia e dals pajataglia, l'efficacitad da las mesiras e la praticabladad. L'index duai vegnir adattà pli svelt che oz. El duai dentant vegnir adattà pir, sche l'adattaziun ha er consequenzas evidentas per las singulas pajataglia e per ils singuls pajataglia. En cas d'ina adattaziun annuala da l'index na vegniss questa cundiziun betg ademplida. En spezial en il sectur da la taglia a la funtauna chaschunass quai per las patrunas e per ils patruns grevezzas administrativas supplementaras che na fissan betg necessarias. La limita da 3 puncts procentuals che vegn proponida en l'incumbensa, correspunda percunter als criteris numnads.

Er sin plaun federal vegn actualmain discutada in'adattaziun pli svelta da l'index. Il cussegl federal ha l'intenziun da proponer al parlament da gulivar anticipadamain la chareschia per l'onn fiscal 2010 ch'è vegnida cuntanschida fin a la fin da l'onn 2008. Plinavant propona ella da gulivar en l'avegnir la progressiun fraida, sche la chareschia accumulada ha cuntanschì 3 pertschient.

La regenza è pronta d'acceptar l'incumbensa e da proponer al cussegl grond la cumpensaziun da la chareschia en cas d'in augment da l'index naziunal dals pretschs da consum per mintgamai 3 pertschient.

25 da favrer 2009