Navigation

Inhaltsbereich

Incumbensa da la fracziun da la PS concernent il sustegn da la conjunctura cun in program d'investiziuns per la viafier retica (emprim sutsegnader Peyer)

Sessiun: 09.02.2009
La crisa finanziala è daventada ina crisa economica fitg gravanta. Ultra da l'acziun da salvament ch'è ida a favur da la UBS e che ha custà milliardas, èsi inevitabel per la confederaziun da concepir programs da conjunctura d'ina summa da milliardas a favur da l'economia reala. Perquai che la confederaziun sezza n'ha betg avunda agens projects che pon vegnir realisads a curta vista, èn dumandads ils chantuns.

Er la regenza grischuna ha vis il basegn d'agir. Las mesiras ch'ella propona èn dentant anc memia pauc concretas. Igl è però evident, ch'i resulta per exempel ina grevezza finanziala, sch'ins vul mantegnair la substanza da la rait da la viafier retica gist tuttina sco renovar il material rullant da tala. Il program da conjunctura è pia ina schanza per avair a disposiziun dapli meds finanzials. Questa schanza na sa repeta betg uschè svelt. Igl è però necessari che la regenza procedia svelt ed en moda decisa. Quai per ils suandants motivs:

1. A la sessiun da Flem è vegnì augmentà il 9avel credit general (2007-2010) per las interpresas da transport concessiunadas (ITC) tenor l'art. 56 da la lescha federala da viafier, e quai da 600 sin 800 milliuns francs. Pervia da la curta perioda iniziala da las viafiers, n'han ils meds finanzials supplementars betg pudì vegnir exaurids dal tuttafatg. Ils emprims dus onns n'è betg vegnida duvrada ina summa da 60 milliuns francs. Il cussegl federal na dastga betg laschar crudar quest import. El sto vegnir dà liber, eventualmain schizunt vegnir augmentà, en il rom dal program da conjunctura. Da quest import po la viafier retica far valair ina part considerabla.

2. Per la viafier retica èsi d'ina impurtanza centrala da mantegnair la substanza. Quai vala tant per il sectur da l'infrastructura (rait) sco er per ils sectur dal traffic (material rullant). Per quest intent pon vegnir impundids per ils onns 2009 e 2010 en tut almain 90 milliuns francs.

3. La sanaziun dal tunnel da l'Alvra è il project il pli grond da la viafier retica, che serva per mantegnair la substanza. El è urgent e sto vegnir tractà separadamain. Almain in'emprima purziun sto dentant vegnir finanziada en il rom dal program da conjunctura (p.ex. 30 milliuns francs, l'onn 2010).

4. Er l'uniun dals transports publics (UTP) promova mesiras da conjunctura en quest sectur. La UTP ha surdà al SECO, la fin da november 2008, ina glista cun passa 50 projects ch'èn pronts per vegnir realisads en il sectur dal traffic public, e quai ensemen cun la dumonda d'als realisar svelt, per pudair rinforzar la conjunctura.

5. Plinavant èsi da supponer, che la confederaziun vegnia ad iniziar ulteriurs programs da conjunctura, q.v.d. er per ils onns suenter l'onn 2010 vegnan puspè a star a disposiziun meds finanzials che pon vegnir dads libers per projects persistents.

Perquai vegn la regenza incumbensada, en il senn da las explicaziuns precedentas, d'inoltrar a la confederaziun immediatamain tut ils projects ch'èn pronts per vegnir realisads ils proxims onns e che servan a mantegnair la substanza da la viafier retica en il sectur da l'infrastructura ed en il sectur dal traffic.

Cuira, ils 9 da favrer 2009

Peyer, Arquint, Baselgia-Brunner, Bucher-Brini, Frigg-Walt, Gartmann-Albin, Jaag, Jäger, Menge, Meyer Persili (Cuira), Pfenninger, Pfiffner-Bearth, Thöny, Trepp, Locher Benguerel

Session: 09.02.2009
Vorstoss: rg Auftrag

Resposta da la regenza

Il basegn da far investiziuns da la viafier retica è e resta grond tant pertutgant l'infrastructura sco er pertutgant il traffic. En il sectur da l'infrastructura han la confederaziun ed il chantun creà cun il 9avel credit general ina basa da finanziaziun limitada ed impurtanta. Dal fatg da mantegnair la substanza e da modernisar il material rullant è la confederaziun dentant sa retratga per gronda part ed ha surlaschà a las viafiers da finanziar las grondas investiziuns. Il chantun Grischun ha concedì a la viafier retica gia l'onn 2007 in sustegn impurtant per quest intent, e quai en la furma d'ina contribuziun unica da 22 milliuns francs or dals meds extraordinaris da la banca chantunala grischuna.
Areguard ils giavischs e las pretensiuns da l'incumbensa vegni prendì posiziun sco suonda:

1. Cun augmentar ils meds finanzials per l'onn 2009 per 90 milliuns francs (60 milliuns francs per liquidar il rest dal credit 2007 e 30 milliuns francs per investiziuns anticipadas) ha il parlament federal sclerì en il fratemp la situaziun da finanziaziun. Er il chantun vegn a sa participar a questas investiziuns, sch'i dat projects ch'èn pronts per vegnir realisads.

2. En il sectur d'infrastructura èn avant maun projects d'investiziun tar la viafier retica e lur finanziaziun è segirada per gronda part. En il rom dal program federal da stabilisaziun èn vegnids garantids ulteriurs 22 milliuns francs a la viafier retica per l'onn 2009. Quests meds finanzials èn vegnids garantids sin fundament d'ina dumonda da la viafier retica, en la quala èn vegnids inditgads projects anticipads ch'èn pronts per vegnir realisads concretamain fin l'onn 2009 e che fan part dal plan d'investiziun per il material rullant. Per sia part d'ina dimensiun da 3.3 milliuns francs ha il chantun concludì sco prestaziun equivalenta gia la dumonda d'in credit posteriur per mauns da la CdG. En il sectur dal traffic (cunzunt material rullant e sistems da TI) è dentant cumprovà in grond basegn d'investiziun. Il stadi actual dal material rullant sco er ils engrondiments da la capacitad pervia dal martgà pretendan ina substituziun ed ina renovaziun da la flotta da vehichels. Da sia vart sustegna il chantun en moda decisiva la viafier retica en la sparta dal traffic, cun quai ch'el desista dapi onns da la restituziun annuala dals emprests ch'el ha concedì per il material rullant. Da l'autra vart conceda il chantun er contribuziuns à fonds perdu che sa refereschan al project sin las investiziuns en il material rullant.

3. Il tunnel da l'Alvra ha ina impurtanza strategica per la viafier retica. Ina renovaziun da l'ovra da 100 onns è absolutamain necessaria. Actualmain elavura la viafier retica la basa da decisiun necessaria per las variantas sanaziun u construcziun nova. Ils resultats duain vegnir discutads proximamain cun la confederaziun e cun il chantun. Tenor las enconuschientschas ch'èn oz avant maun na poi dentant betg vegnir fatg quint cun il cumenzament da las lavurs da construcziun per propi vi dal tunnel da l'Alvra avant la mesadad da l'onn 2011. Ultra da las lavurs da projectaziun vegn quest termin fixà en moda decisiva dals termins d'approvaziun federals. La finanziaziun speziala da 30 milliuns francs per l'onn 2010 che vegn proponida en l'incumbensa è pia memia tempriva. Er ord vista da la regenza resti dentant decisiv ch'i sto vegnir chattada ina soluziun cun agid d'ina finanziaziun speziala tras la confederaziun e tras il chantun per renovar il tunnel da l'Alvra.

4. Tant la sparta da l'infrastructura sco er la sparta dal traffic genereschan investiziuns persistentas e pussibiliteschan ina situaziun da gudogn tant per la viafier retica sco er per l'economia. Questas investiziuns èn pia colliadas cun ina valur agiuntada persistenta en il chantun Grischun ed en Svizra. Areguard projects persistents en il sectur da l'infrastructura vegn la viafier retica anc a stuair far in urden da preschentaziun correspundent en il rom da ses process da fixar il preventiv per ils onns 2010 e 2011. Per il sectur dal traffic speran la viafier retica ed il chantun ch'ils novs programs federals per stabilisar la conjunctura possian metter a disposiziun ulteriurs meds finanzials.

Uschenavant ch'ils giavischs n'èn betg gia ademplids u uschenavant ch'els n'èn betg gia in object dals scleriments che vegnan fatgs actualmain, è la regenza pronta d'acceptar l'incumbensa.

6 da matg 2009