Incumbensa da la fracziun da la PS concernent l'installaziun d'ina cumissiun chantunala per cas da direzza (emprim sutsegnader Menge)
Sessiun: 10.02.2009
L'ultim temp è la posiziun dals sans papiers che sa trategnan dapi onns en Svizra stada il motiv per discussiuns en las medias ed en vasts circuls da la populaziun sco er per la critica visavi las autoritads da migraziun. L'exempel il pli giuven è l'occupaziun da la baselgia dals predicaturs a Turitg che ha intimà il chantun Turitg d'examinar l'installaziun d'ina cumissiun per cas da direzza.
Tenor l'art. 14 al. 2 LAsil po il chantun conceder – cun il consentiment da l'uffizi federal da migraziun – la permissiun da dimora ad ina persuna, sche quella viva en Svizra almain 5 onns dapi l'inoltraziun da la dumonda d'asil, sche ses lieu da dimora è adina stà enconuschent a las autoritads e sch'igl è avant maun – pervia da l'integraziun progredida – in cas persunal da direzza. Dapi l'ultima revisiun da la lescha d'asil pon ils chantuns conceder – cun il consentiment da la confederaziun (che vegn dà per regla) – uschenumnadas permissiuns da cas da direzza. Ina pratica unitara per cas da direzza n'exista betg en Svizra.
Persunas ch'èn admessas provisoricamain e che sa trategnan gia dapi passa 5 onns en Svizra han schizunt in dretg ch'è fixà en la lescha che lur dumonda da cas da direzza ch'ellas han inoltrà vegnia examinada pli detagliadamain.
En il chantun Grischun pon ins constatar che la pratica da l'uffizi da fatgs da polizia e da dretg civil dal Grischun è cleramain restrictiva. Mintgatant capiti che l'uffizi renviescha exclusivamain a l'art. 14 al. 1 LAsil, tenor il qual i na possia vegnir introducida nagina procedura per conceder ina permissiun da dimora dal mument ch'ina dumonda d'asil è vegnida inoltrada fin a la partenza, nun ch'igl existia in dretg ad ina tala concessiun.
L'onn 2007 è vegnì permess in cas da direzza d'in requirent d'asil e l'onn 2008 dus (dumondas: 15 / refusas: 13).
Ed er tar las 274 persunas ch'èn admessas provisoricamain e che sa trategnan dapi passa 5 onns en Svizra, èn vegnidas chattadas mo 68 regulaziuns per cas da direzza.
La pratica da l'uffizi da fatgs da polizia e da dretg civil dal Grischun divergescha en quest sectur considerablamain d'auters chantuns. La gronda libertad da decider ch'ils uffizis chantunals da migraziun han per giuditgar cas da direzza maina adina puspè a decisiuns che pudessan avair – en spezial en cas da persunas estras ch'èn integradas bain e che vivan dapi onns en Svizra – ina basa pli lada. Singuls chantuns sco Lucerna, Basilea-Citad e Neuchâtel han pervia da quai installà per quest intent ina cumissiun chantunala per cas da direzza.
Concretamain ha ina tala cumissiun l'incumbensa d'accumpagnar la realisaziun chantunala da la lescha d'asil e da gidar en cas ch'i dat problems. Ella examinescha ils dossiers da las persunas che fan ina dumonda d'asil ed elavura recumandaziuns ed expertisas preliminaras per las autoritads federalas. Ella po examinar ils dossiers da persunas estras cun il status N ed F e proponer in'admissiun provisorica resp. ina permissiun B pervia d'ina cas persunal da direzza.
A Lucerna per exempel èn – da las 72 dumondas da cas da direzza ch'èn vegnidas drizzadas a la cumissiun per cas da direzza dapi che la nova lescha d'asil è entrada en vigur l'onn 2007 – vegnidas approvadas gia 22 da l'uffizi da migraziun sez e spedidas vinavant a l'uffizi federal da migraziun. Las ulteriuras 50 dumondas ch'èn vegnidas inoltradas per circa la mesadad da persunas ch'èn admessas provisoricamain èn er vegnidas examinadas da la cumissiun per cas da direzza. En 17 cas ha il gremi proponì l'approvaziun; en 10 cas ha l'uffizi da migraziun dà suatientscha a questa recumandaziun ed ha tramess las dumondas a Berna.
Er en il chantun Grischun pudess ina tala cumissiun sa mussar sco utila en il sectur dals cas da direzza. Ina cumissiun per cas da direzza che ha in vast sustegn rinforza la confidenza en l'autoritad ch'è cumpetenta per las persunas estras repartend las decisiuns sin pliras spatlas e diminuind uschia il squitsch politic.
Pervia da quai vegn la regenza incumbensada da stgaffir ina cumissiun chantunala per cas da direzza. Quella stuess resguardar in vast circul da persunas e cumpigliar tranter auter er represchentanzas da las baselgias chantunalas e d'ovras d'agid.
Cuira, ils 10 da favrer 2009
Menge, Arquint, Baselgia-Brunner, Bucher-Brini, Frigg-Walt, Gartmann-Albin, Jäger, Meyer Persili (Cuira), Peyer, Pfenninger, Pfiffner-Bearth, Thöny, Trepp, Locher Benguerel
Session: 10.02.2009
Vorstoss: rg Auftrag
Resposta da la regenza
Cun installar ina cumissiun chantunala per cas da direzza duai il giudicament da las dumondas per conceder ina permissiun da dimora, en spezial per persunas dal sectur d'asil, vegnir suttamess ad in gremi spezial. La cumissiun avess da giuditgar dumondas per conceder permissiuns da dimora umanitaras a persunas, da las qualas la dumonda d'asil è pendenta dapi passa tschintg onns (permissiun N) u è vegnida refusada cun vigur legala pir suenter dapli che tschintg onns u che sa trategnan dapi passa tschintg onns en Svizra sin basa d'ina admissiun provisorica (permissiun F).
Questas permissiuns da dimora vegnan concedidas tenor la pratica constanta da l'uffizi da fatgs da polizia e da dretg civil dal Grischun (UPDC), e quai d'uffizi u sin dumonda; en mintga cas basegna la concessiun da la permissiun da dimora dentant l'approvaziun da l'uffizi federal da migraziun (UFM). L'approvaziun ha caracter constitutiv e vegn fatga dependenta da l'adempliment da differentas premissas ch'èn vegnidas concretisadas en la circulara dal UFM dal 1. da schaner 2007 sco er en directivas. Las premissas per conceder talas permissiuns èn – ultra da la preschientscha da tschintg onns en Svizra – per exempel la cumprova da l'autonomia economica, la cumprova da l'identitad cun documents da viadi, ina conduita irreproschabla sco er ina buna integraziun professiunala e linguistica. Las premissas per conceder ina permissiun da dimora umanitara èn vegnidas circumscrittas e sviluppadas vinavant ils ultims onns tras la pratica dal tribunal federal.
Il UPDC ha tractà l'onn 2008 totalmain 207 dumondas per conceder ina permissiun da dimora umanitara. Da quellas èn 128 dumondas vegnidas suttamessas al UFM per l'approvaziun. 53 dumondas ha el refusà e 26 proceduras èn anc pendentas. En il rom da questas proceduras èn vegnidas concedidas l'onn 2008 permissiuns da dimora permanenta a 120 persunas cun ina permissiun F (2007: 41) ed a duas persunas cun ina permissiun N (2007: 1).
Sco ch'ins po vesair a maun da la pratica da conceder permissiuns, vegn er fatg diever en il chantun Grischun da la pussaivladad da conceder permissiuns da dimora umanitara. Giuditgond la pratica da permissiun stoi vegnir tegnì quint da l'effectiv da persunas che vegn insumma en dumonda per questa regulaziun da dimora. Per il mument adempleschan en il chantun Grischun circa 230 persunas cun ina permissiun F e circa 40 autras persunas dal sectur d'asil – almain areguard il temp – las premissas per ina permissiun da dimora umanitara. Sch'ins cumpareglia questa cifra cun las permissiuns ch'èn effectivamain vegnidas concedidas na poi – tenor l'opiniun da la regenza grischuna – betg vegnir discurrì d'ina pratica da permissiun memia restrictiva. L'execuziun da la legislaziun federala davart ils esters ed ils fatgs d'asil è ina incumbensa suverana dal sectur da responsabladad da la regenza e da l'administraziun. En il rom da l'execuziun da questa incumbensa han las autoritads cumpetentas tschertas libertads d'agir. Sin basa da las cifras qua avant maun na datti tenor l'opiniun da la regenza nagin motiv per presumar che questas libertads na vegnian betg duvradas en moda correcta u ch'ellas vegnian duvradas en moda unilaterala. Uschia na resulta ni il basegn ni la necessitad d'engaschar terzas persunas d'ordaifer l'administraziun per exequir questas libertads u d'installar entaifer l'administraziun ina cumissiun respectiva per cas da direzza.
Er en il chantun Grischun – sco en blers auters chantuns – è l'installaziun d'ina cumissiun chantunala per cas da direzza vegnida pretendida e discutada differentas giadas. Cun excepziun dal chantun Turitg, nua ch'ina reinstallaziun d'ina cumissiun per cas da direzza vegn tractada proximamain en il parlament na datti en nagins auters chantuns da la Svizra orientala ed er betg en la maioritad dals auters chantuns ina tala cumissiun per cas da direzza. En il passà ha la regenza grischuna refusà repetidamain la pretensiun d'installar ina cumissiun per cas da direzza. En il rom da sia posiziun tar la petiziun "SOS umanitad" ha er il cussegl grond refusà l'avust 2008 ina supplica respectiva da las petentas e dals petents (cf. protocol dal cussegl grond, avust 2008, p. 84 ss.). Dal puntg da vista da la regenza na datti nagin motiv per installar ina cumissiun speziala per giuditgar cas da direzza presumptivs.
La regenza propona perquai da refusar l'incumbensa.
8 da matg 2009