Navigation

Inhaltsbereich

Dumonda Kessler concernent la taxaziun pauschala

Sessiun: 21.04.2009
La lescha federala davart las taglias directas 1 permetta da suttametter persunas bainstantas a la taglia tenor expensas, sche questas persunas èn domiciliadas en Svizra e n'han nagina activitad da gudogn. Burgaisas e burgais esters han quest dretg senza ina limitaziun temporala. Burgaisas e burgais svizzers che prendan per l'emprima giada u puspè domicil u dimora en Svizra pon medemamain far diever da quest gener da taglia durant la perioda fiscala currenta.

La taxaziun pauschala datti gia dapi passa 70 onns. Ella deriva dal basegn da simplifitgar, e quai en vista a las difficultads praticas ch'èn sa mussadas per eruir correctamain la summa da differentas entradas estras u da facultads estras. Las entradas che quellas persunas obtegnan a l'exteriur vegnan suttamessas là a la taglia tenor las leschas localas.

Pir dacurt è vegnida abolida la taxaziun pauschala en il chantun Turitg. Quai ha gì per consequenza che la discussiun concernent la taxaziun pauschala è puspè vegnida messa en il center.

Ils puncts principals che vegnan crititgads èn d'ina vart, che persunas, las qualas vegnan suttamessas a la taglia pauschala, pajassan memia pauca taglia en relaziun cun lur pussaivladads finanzialas, e da l'autra vart, ch'ellas vegnissan en la medema situaziun privilegiadas envers la pajataglia ed il pajataglia svizzer.

Er en il Grischun èn domiciliadas persunas che vegnan suttamessas a la taglia pauschala. Perquai resultan en quest connex ed er sut l'aspect d'ina iniziativa dal chantun ch'è vegnida inoltrada dal chantun Son Gagl e che pretenda l'aboliziun da la taxaziun pauschala per l'entira Svizra, las suandantas dumondas a la regenza:

1. Tge impurtanza dat la regenza a la taxaziun pauschala per l'economia publica e per il turissem dal chantun Grischun?

2. Quantas persunas, che vegnan suttamessas a la taglia pauschala, vivan en il Grischun?

3. Quant autas èn las entradas fiscalas che pervegnan da quellas persunas?

4. Quant auta è la media da las entradas fiscalas per persuna che vegn suttamessa a la taglia pauschala en il Grischun?

5. Quant auta è la media da las entradas fiscalas per persuna natirala, ch'è obligada da pajar la taglia ordinaria en il Grischun?

6. Datti retschertgas davart las dumondas, schebain e co che persunas, las qualas èn suttamessas a la taglia pauschala, sa participeschan a lavur d'utilitad publica (fundaziuns, cultura e.u.v.)?

7. Datti retschertgas davart las dumondas, en tge dimensiun che quellas persunas fan diever da prestaziuns da servetsch ed en tge dimensiun ch'ellas fan investiziuns?

Cuira, ils 21 d'avrigl 2009

Kessler, Jeker, Sax, Barandun, Berther (Sedrun), Bezzola (Samedan), Bezzola (Zernez), Bleiker, Buchli, Bühler-Flury, Bundi, Butzerin, Cahannes Renggli, Casparis-Nigg, Casty, Cavigelli, Christoffel-Casty, Claus, Clavadetscher, Conrad, Dermont, Donatsch, Fasani, Federspiel, Felix, Feltscher, Geisseler, Giovanoli, Hartmann (Cuira), Hartmann (Champfèr), Jenny, Kleis-Kümin, Koch, Kollegger, Krättli-Lori, Kunz, Loepfe, Mani-Heldstab, Marti, Meyer-Grass (Claustra Vitg), Michel (Tavau Monstein), Nick, Nigg, Parolini, Pedrini, Pfäffli, Portner, Quinter, Ragettli, Ratti, Rizzi, Stiffler, Stoffel, Thomann, Thurner-Steier, Toschini, Valär, Vetsch (Claustra Vitg), Vetsch (Pragg-Jenaz), Wettstein, Zanetti, Casutt-Derungs (Falera), Furrer-Cabalzar, Gunzinger

Resposta da la regenza

La regenza vul mantegnair la taxaziun pauschala. Quella serva al Grischun sco chantun turistic ed è in argument impurtant per giasts da vacanzas da l'exteriur che prendan domicil en il chantun. Las dumondas fatgas pon vegnir respundidas sco suonda:

1. Las persunas che vegnan suttamessas a la taxaziun pauschala han ina impurtanza considerabla per l'economia publica e per il turissem dal chantun Grischun. En differentas regiuns turisticas fan ellas part dal motor che tegn en moviment las economias publicas regiunalas. Ellas han gist en ils lieus da cura pli nobels ina gronda attracziun ed augmentan l'attractivitad dal lieu. Ellas stimuleschan tant il martgà d'investiziuns sco er il martgà da consum en moda considerabla.

2. Actualmain (stadi a la fin da matg 2009) vivan en il Grischun 264 persunas ch'èn suttamessas a la taxaziun pauschala. Da quellas vegnan ils conjugals ed ils uffants che vegnan suttamess a la taglia ensemen cun quels registrads mo sco ina persuna.

3. L'onn fiscal 2008 han las pajataglias ed ils pajataglias – da quel temp 258 – furnì ina prestaziun fiscala da totalmain 28,3 milliuns francs (confederaziun = 7,9 milliuns francs; chantun = 11,1 milliuns francs; vischnancas = 9,3 milliuns francs).

4. La media da las entradas fiscalas da las persunas che vegnan suttamessas a la taxaziun pauschala importan ca. 43'000.– francs per la taglia chantunala e 109'700.– francs per tut las trais suveranitads fiscalas.

5. La media da las entradas fiscalas da las persunas natiralas che vegnan suttamessas a la taglia ordinaria cun domicil en il chantun importan ca. 3'400.– francs per la taglia chantunala. Per las pajataglias e per ils pajataglias limitads (persunas cun abitaziun secundara en il chantun) fiss la media ca. 850.– francs. Las cifras sa basan sin ils onns fiscals 2006 e 2007, perquai ch'i n'èn anc betg vegnids taxads definitivamain avunda pajataglias per l'onn fiscal 2008.

6. I n'existan naginas retschertgas davart l'engaschi d'utilitad publica da las persunas ch'èn suttamessas a la taxaziun pauschala. I dat dentant differentas persunas ch'èn suttamessas a la taxaziun pauschala che s'engaschan en il sectur da la cultura u che sustegnan instituziuns en il chantun Grischun tras fundaziuns.

7. I n'existen naginas retschertgas davart il diever da prestaziuns da servetsch u davart investiziuns impundidas. Il volumen d'investiziun da las persunas ch'èn suttamessas a la taxaziun pauschala è considerabel e da gronda impurtanza per il Grischun sco chantun turistic. Per motivs dal secret fiscal na pon dentant betg vegnir fatgas indicaziuns pli detagliadas en chaussa. 

15 da zercladur 2009