Navigation

Inhaltsbereich

Incumbensa da la fracziun da la PS concernent il sustegn da la capacitad da cumpra tras l'extensiun dal sistem chantunal per reducir las premias da la cassa da malsauns sco mesira da conjunctura (emprim sutsegnader Trepp)

Sessiun: 21.04.2009
Er la Svizra chamina vers la crisa economica. Ultra d'in augment dramatic da la dischoccupaziun ston ins displaschaivlamain er far quint cun ina perdita considerabla da la capacitad da cumpra da la populaziun cun activitad da gudogn, cunzunt da la classa mesauna. Quai lascha collabir il consum privat, la pitga la pli impurtanta da la conjunctura, e chaschuna ina spirala conjuncturala negativa. Er la ministra da l'economia publica Doris Leuthard, PCD, ed il secretariat da stadi per l'economia (SECO) ch'è suttamess ad ella, averteschan cun insistenza da quest scenari.

Ina part da la perdita da la capacitad da cumpra ch'è da spetgar en Svizra è displaschaivlamain chaschunada sezza. Cunzunt l'augment da las premias da l'assicuranza da malsauns, ch'è vegni annunzià e che vegn ad esser massiv (ins parta d'ina augment da passa 10%), vegn a sa mussar sco veritabel «stenschentader» da la capacitad da cumpra.

La politica è ussa er dumandada en il Grischun. Mesiras per sustegnair il consum privat èn urgentas, ston dentant vegnir prendidas là, nua che la quota da consum è spezialmain auta, pia tar las classas d'entrada bassas e mesaunas. Mesiras da distgargia per persunas ritgas na rendan dentant nagut en temps da recessiun.

Perquai ston las mesiras conjuncturalas vegnir prendidas tar il sistem per reducir las premias da la cassa da malsauns. Quest sistem è sa cumprovà fitg bain per sustegnair persunas assicuradas en relaziuns economicas modestas e duess vegnir extendì en vista a la crisa economica a favur da la classa mesauna bassa e da la classa mesauna. Qua tras po vegnir cumbattì l'augment da las premias ch'è da spetgar; e per sustegnair la conjunctura po vegnir prestada ina contribuziun impurtanta. Plinavant sa mussi che la confederaziun vegn ad augmentar sias contribuziuns per la reducziun da las premias – er quai pleda a favur d'in agir decidì da vart da la regenza.

En quest senn vegn la regenza incumbensada da reveder la lescha davart l'assicuranza da malsauns e la reducziun da las premias (LARP) uschia, che naginas chasadas en il Grischun ston impunder dapli che 8% da lur entradas imputablas per l'assicuranza da malsauns.


Cuira, ils 21 d'avrigl 2009

Trepp, Arquint, Baselgia-Brunner, Bucher-Brini, Frigg-Walt, Gartmann-Albin, Jaag, Jäger, Menge, Meyer Persili (Cuira), Peyer, Pfenninger, Pfiffner-Bearth, Thöny, Locher Benguerel, Michel (Cuira)

Session: 21.04.2009
Vorstoss: rg Auftrag

Resposta da la regenza

La reducziun da la tariffa maximala da la resalva persunala ad 8 pertschient – che vegn prendida en mira cun l'incumbensa da fracziun qua avant maun – avess en emprima lingia in effect per las famiglias da la classa mesauna.

Las famiglias da la classa mesauna èn vegnidas distgargiadas fermamain en il rom da la revisiun parziala da la lescha davart l'assicuranza da malsauns e la reducziun da las premias (LARP) ch'è entrada en vigur il 1. da schaner 2007. Sin basa da questa revisiun vegnan las premias d'uffants e da persunas giuvnas creschidas en scolaziun reducidas d'ina vart per 100 pertschient fin ad entradas imputablas da 65'000 francs, e sur quai – per ina procentuala ch'è graduada en moda degressiva – fin ad entradas imputablas dad 80'000 francs. Da l'autra vart è vegnida reducida la tariffa maximala da la resalva persunala da 12 a 10 pertschient. La tariffa maximala da la resalva persunala da 10 pertschient s'effectuescha gia a partir d'entradas imputablas da 40'000 francs e dapli.

In'ulteriura distgargia han las famiglias sentì respectivamain vegnan ellas a sentir tras las revisiuns da la lescha da taglia ch'il cussegl grond ha concludì en la sessiun d'october 2006 ed en la sessiun da zercladur 2009. En il rom da questas duas revisiuns da la lescha da taglia èn la deducziun per uffants e la deducziun per la tgira d'uffants vegnidas augmentadas sco suonda:

Deducziun per uffants:
Per uffants da la vegliadetgna prescolara: augment da 2'400 francs sin 5'000 francs (per il 1. da schaner 2008) respectivamain sin 6'000 francs (per il 1. da schaner 2010);
per uffants minorens pli vegls sco er per uffants da la vegliadetgna da scola u d'emprendissadi: augment da 2'400 francs sin 8'000 francs (per il 1. da schaner 2008) respectivamain sin 9'000 francs (per il 1. da schaner 2010).

Deducziun per la tgira d'uffants:
Per mintga uffant sut 14 onns: augment da 2'000 francs sin maximalmain 6'000 francs (per il 1. da schaner 2008) respectivamain sin maximalmain 10'000 francs (per il 1. da schaner 2010).

L'augment da la deducziun per uffants e da la deducziun per la tgira d'uffants ha in effect dubel. Per l'ina ston las famiglias pajar damain taglia. Per l'autra survegnan ellas dapli contribuziuns per la reducziun da las premias, cunquai ch'i resultan – tar la calculaziun da la reducziun individuala da las premias (RIP) – entradas imputablas pli bassas sin basa dal fatg che la deducziun per uffants è pli gronda.

L'augment da las premias da circa 15 pertschient, che l'uffizi federal da sanadad publica (UFSP) ha annunzià per l'onn 2010 en il chantun, na chaschuna ni ina grevezza supplementara da las persunas che survegnan ina reducziun da las premias ni ina reducziun da lur capacitad da cumpra, sche las entradas imputablas restan sco quai ch'ellas èn. Tenor il sistem vertent da la reducziun da las premias surpiglia il chantun cumplainamain quest augment da las premias en il rom da la RIP. Il sistem vertent da la reducziun da las premias cuntegna in stabilisatur conjunctural automatic, analogamain a l'assicuranza cunter la dischoccupaziun.

Tenor ina calculaziun da model vegn il volumen da la RIP a s'augmentar l'onn 2010 – tras l'augment da las premias ch'è vegnì annunzià – per passa 20 milliuns francs. La circumstanza ch'il chantun surpiglia cumplainamain l'augment da las premias sur la RIP, sche las entradas restan sco quai ch'ellas èn, vegn ad avair per consequenza ch'il volumen da la RIP s'augmenta er ils proxims onns sur la media. A vista mesauna ed a lunga vista ston ins perquai temair che la RIP na saja betg pli finanziabla en sia concepziun actuala senza auzar la taglia. Ina reducziun da la tariffa maximala da la resalva persunala da 10 ad 8 pertschient augmentass – tenor la calculaziun da model – supplementarmain las contribuziuns per la reducziun da las premias per var 18 milliuns francs l'onn 2010.

Per realisar l'incumbensa da la fracziun da la PS stuess plinavant vegnir revedida la LARP. Tenor l'avis da la regenza duai dentant vegnir desistì da far a curta vista – pervia da la conjunctura – adattaziuns vi dal sistem cumprovà da la reducziun da las premias.

Renviond als meds finanzials supplementars ch'èn necessaris pervia da l'augment da las premias ch'è vegnì annunzià dal UFSP, al stabilisatur conjunctural automatic ch'è previs en il sistem vertent da las contribuziuns per la reducziun da las premias, als augments da la deducziun per uffants e da la deducziun per la tgira d'uffants ch'èn vegnids concludids dal cussegl grond e che han in effect positiv per las contribuziuns per la reducziun da las premias, sco er a las consequenzas finanzialas massivas propona la regenza da refusar l'incumbensa da la fracziun da la PS.

6 da fanadur 2009