Navigation

Inhaltsbereich

Incumbensa Dudli concernent il resguard da plazzas d'emprendissadi en cas da la surdada da lavur tras il maun public

Sessiun: 16.06.2009
Bunamain 70% dals giuvenils che sortan da la scola en il chantun Grischun tschernan la via d'in emprendissadi per cumenzar lur vita professiunala. Ch'i stettian a disposiziun suffizientamain plazzas d'emprendissadi decentralas è ina premissa indispensabla per dar a questas persunas giuvnas ina perspectiva per cumenzar lur vita professiunala. I sto esser en l'interess da l'economia publica e da la politica sociala dal chantun che las interpresas e las firmas porschan plazzas d'emprendissadi ed instrueschan emprendistas ed emprendists. En connex cun la crisa economica che sa manifestescha pli e pli er en il chantun Grischun è quai tant pli impurtant, perquai ch'i van permanentamain a perder plazzas da lavur e pia la finala er plazzas d'emprendissadi. Il chantun, sco in dals incumbensaders ed empustaders ils pli gronds, ha la pussaivladad da sustegnair e da promover manaschis d'emprendissadi, e quai en il rom da las leschas vertentas.

Per surdar servetschs, lavurs da construcziun e furniziuns vegn la regenza envidada d'incumbensar che ses uffizis envidian respectivamain resguardian, sch'els fan proceduras directas e proceduras d'invit, en emprima lingia las interpresas e las firmas cun plazzas da lavur en il Grischun che pon cumprovar ch'ellas porschan plazzas d'emprendissadi e/u ch'ellas instrueschan emprendistas ed emprendists. La premissa è sa chapescha ch'ils manaschis èn abels d'ademplir l'obligaziun.

Puschlav, 16 da zercladur 2009

Dudli, Geisseler, Felix, Arquint, Augustin, Baselgia-Brunner, Berther (Sedrun), Bleiker, Blumenthal, Bondolfi, Brantschen, Brüesch, Bucher-Brini, Buchli, Bühler-Flury, Bundi, Butzerin, Campell, Candinas (Rabius), Casparis-Nigg, Castelberg-Fleischhauer, Casty, Casutt (Falera), Caviezel (Pitasch), Caviezel-Sutter (Tusaun), Christoffel-Casty, Clavadetscher, Conrad, Donatsch, Fasani, Florin-Caluori, Frigg-Walt, Gartmann-Albin, Giovanoli, Hardegger, Hartmann (Cuira), Hartmann (Champfèr), Hasler, Jaag, Jäger, Jeker, Jenny, Keller, Kleis-Kümin, Koch, Kollegger, Krättli-Lori, Kunz, Loepfe, Mani- Heldstab, Märchy-Michel (Malans), Marti, Menge, Mengotti, Meyer Persili (Cuira), Meyer- Grass (Claustra Vitg), Michel, Möhr, Nick, Niederer, Noi-Togni, Parolini, Parpan, Pedrini, Perl, Peyer, Pfäffli, Pfiffner-Bearth, Plozza, Portner, Ratti, Righetti, Rizzi, Sax, Stiffler, Stoffel, Thöny, Thurner-Steier, Toschini, Tscholl, Tuor, Valär, Vetsch (Claustra Vitg), Vetsch (Pragg-Jenaz), Candinas (Mustér), Casutt-Derungs (Falera), Furrer-Cabalzar, Gunzinger, Hartmann (Küblis), Märchy-Caduff (Domat)

Session: 16.06.2009
Vorstoss: rg Auftrag

Resposta da la regenza

Il giavisch da resguardar plazzas d'emprendissadi en connex cun acquisiziuns publicas n'è betg nov. A chaschun da las tractativas davart ina nova lescha chantunala da submissiun (Lsub; DG 803.300) en la sessiun da favrer 2004 ha il cussegl grond decidì d'acceptar – en la glista betg definitiva da l'art. 21 Lsub – la scolaziun d'emprendistas e d'emprendists sco in eventual criteri d'agiudicaziun. Pia po vegnir resguardà dapi lura en il chantun Grischun cunzunt er il criteri da la scolaziun d'emprendistas e d'emprendists per valitar l'offerta economicamain la pli favuraivla.

L'admissiun giuridica dal criteri ester d'agiudicaziun "scolaziun d'emprendistas e d'emprendists" è dentant contestada en la giurisdicziun ed en la scienza. Singulas dretgiras administrativas chantunalas han acceptà quest criteri ester d'adgiudicaziun en quel senn, ch'el duai avair ina impurtanza subordinada. Tut las dretgiras constateschan dentant ch'il criteri da la scolaziun d'emprendistas e d'emprendists na dastgia en mintga cas betg avair per consequenza che singulas offerentas e che singuls offerents vegnian discriminads.

La regenza è da l'avis che las incumbensadras e ch'ils incumbensaders dal maun public possian resguardar, cun tscherner il circul d'offerentas e d'offerents en la procedura directa ed en la procedura d'invit, sche pussaivel interpresas che porschan plazzas d'emprendissadi en ina dimensiun adattada a la branscha ed a la grondezza dal manaschi. I correspunda bain als princips da las acquisiziuns publicas da preferir quellas interpresas che s'engaschan per ils interess da la scolaziun d'emprendistas e d'emprendists.

En connex cun proceduras directas u cun proceduras d'invit vegnan resguardads gia dapi onns en il cas singul – senza ch'in urden administrativ intern fiss vegnì dà – per la tscherna dal circul d'interpresas, ultra dal domicil fiscal e da la prestaziun er facturs sco la vegliadetgna da la firma (fundaziuns novas) u sco la structura d'occupaziun (scolaziun d'emprendistas e d'emprendists, engaschament da persunas cun impediments, recrutaziun da persunas pli attempadas). Quai duai d'ina vart promover las interpresas giuvnas e da l'autra vart renconuscher l'engaschament social demussà.

La regenza è perquai pronta d'ordinar ils posts chantunals d'acquisiziun da resguardar, cun tscherner il circul d'offerentas e d'offerents en la procedura directa ed en la procedura d'invit, sche pussaivel interpresas che porschan plazzas d'emprendissadi en ina dimensiun adattada a la branscha ed a la grondezza dal manaschi. Tuttina na duai quai betg dischavantagiar ils manaschis pitschens locals u las interpresas giuvnas che n'han betg la grondezza u la structura per scolar emprendistas u emprendists. La regenza propona d'acceptar l'incumbensa cun questa restricziun.

9 da settember 2009