La sessiun d'avrigl n'han – per mancanza da temp – differentas intervenziuns parlamentaras betg pudì vegnir liquidadas dal cussegl grond, schebain che las respostas e las propostas da vart da la regenza e da vart da l'administraziun èn vegnidas elavuradas cun blera lavur e fissan stadas avant maun. Pervia da quai essan nus da l'avis che l'urden da gestiun dal cussegl grond stoppia vegnir adattà a la realitad en quai che concerna las dumondas parlamentaras e las incumbensas. La regenza duai avair dapli temp – vul dir pliras sessiuns – per dar sia resposta. Uschia po la chargia da lavur vegnir reducida oravant tut per il parlament, dentant er per la regenza e per l'administraziun. Il medem mument pudess quai esser il cumenzament per planisar las fatschentas successivamain suror las sessiuns.

Tenor la lescha davart il cussegl grond (LCG) e tenor l'urden da gestiun dal cussegl grond (UGCG) da l'onn 2006 han las commembras ed ils commembers dal cussegl grond er vinavant la garanzia da pudair intervegnir a curt termin. Per l'ina cun l'ura da dumondas, perquai che las dumondas ston vegnir inoltradas in'emna avant che la sessiun cumenza, per l'autra sin basa da las disposiziuns da l'art. 66 UGCG, tractament urgent, e da l'art. 50 LCG, proposta da prender in conclus direct. Dentant è la regenza er libra da respunder intervenziuns parlamentaras impurtantas uschè svelt sco pussaivel u da suttametter incumbensas, dumondas concernent fatschentas sumegliantas e missivas en moda coordinada al parlament.

Cun la finamira da reparter meglier las fatschentas che ston vegnir tractadas sin las singulas sessiuns proponan las sutsegnadras ed ils sutsegnaders ch'ils art. 67 e 70 da l'urden da gestiun dal cussegl grond vegnian midads sco suonda:

Art. 67 al. 1

La regenza fa in rapport en scrit e fa ina proposta tar l'incumbensa al cussegl grond il pli tard en la quarta sessiun suenter l'inoltraziun.

Art. 70 al. 1

La regenza respunda las dumondas en scrit il pli tard en la quarta sessiun suenter l'inoltraziun.

Puschlav, ils 16 da zercladur 2009

Heinz, Quinter, Marti, Bleiker, Castelberg-Fleischhauer, Casty, Caviezel-Sutter (Tusaun), Christoffel-Casty, Conrad, Hartmann (Champfèr), Hasler, Keller, Koch, Mani-Heldstab, Märchy-Michel (Malans), Montalta, Nigg, Parolini, Pfister, Ragettli, Stoffel, Thurner-Steier, Tscholl, Hartmann (Küblis)