Navigation

Inhaltsbereich

Dumonda Trepp concernent las faussas deposiziuns da la polizia chantunala, formulars pregiuditgants, l'arbitrariadad da l'accusaziun, la violaziun dal secret d'uffizi e da la protecziun da datas en chaussa Waldau

Sessiun: 16.06.2009
Areguard la chaussa penibla Waldau sa tschentan in pèr dumondas a las differentas instanzas responsablas, numnadamain dumondas ch'èn d'ina tscherta impurtanza or dal puntg da vista da la politica da stadi.

1. Co declera la stimada regenza il fatg ch'ella ha rut ses pled (tenor in artitgel da gasetta) da betg denunziar las visitadras ed ils visitaders dal center d'expulsiun da la Waldau?

2. Tge basa legala devi il mument che l'apero ha gì lieu per decretar in scumond da visita sin l'areal Waldau? È la situaziun actuala autra u constat la deposiziun da Jonas Montani, pledader da l'uffizi federal da migraziun, vinavant ch'in dretg da visita na dastga betg vegnir refusà, perquai ch'ina basa legala per far quai n'exista betg?

3. È la regenza pronta da midar il formular pregiuditgant da la polizia chantunala, nua ch'igl ha num: delinquent xy e.u.v.? Ins pudess – quai mo sco proposta utila – scriver per exempel: atgisà respectivamain atgisada.

4. Senza insumma cuvrir ils nums hai jau survegnì il protocol da l'accusaziun da la polizia chantunala, cun il bul da la procura publica dals 19 da december 2008 dal president cirquital Knobel ch'era anc en uffizi da quel temp. En quest protocol èn menziunads tuttas mias uschenumnadas "cundelinquentas" e tut mes uschenumnads "cundelinquents" ch'èn vegnids pigliads da la polizia en moda arbitraria cun lur professiuns e cun ils nums da lur geniturs e da lur consortas.

Tge va quai tiers a mai, tgi tut ch'è insumma vegnì interrogà da la polizia? Tge va quai tiers a mai, co che las mammas ed ils babs da mias uschenumnadas "cundelinquentas" e da mes uschenumnads "cundelinquents" han num?

Qua èn vegnidas tradidas d'ina autoritad uffiziala – e quai en moda e maniera impertinenta ed dilettanta – infurmaziuns che suttastattan a la protecziun da las datas a persunas che n'han betg il dretg da survegnir questas infurmaziuns.

Tge di la regenza, tge di la procura publica, tge di l'incumbensà per la protecziun da datas da talas violaziuns eclatantas da la lescha tras il maun public?

5. Tenor tge criteris ha la polizia chantunala tschernì las sis persunas ch'èn vegnidas accusadas d'in delict uffizial? Numerusas persunas, ils nums da las qualas la polizia chantunala ha er registrà, han bandunà l'areal bler pli tard che las persunas accusadas, in pèr d'ellas schizunt sco ultimas.

6. Tgi è – concernent ils puncts ch'èn vegnids menziunads qua survart sco er concernent las faussas deposiziuns da la polizia chantunala – cumpetent da far l'accusaziun?

7. È la regenza pronta d'instradar ina inquisiziun independenta da quests fatgs, quai vul dir da laschar far questa inquisiziun tras persunas spezialisadas extrachantunalas, e d'instradar immediatamain las correcturas che pon vegnir fatgas gia ussa?

8. È la regenza pronta da far responsablas las persunas che han inizià questa acziun dilettanta che n'ha gì strusch in auter senn che da tementar in pèr participantas ed in pèr participants da l'apero.

Sin giavisch pon la regenza, las commembras ed ils commembers dal cussegl grond empustar – sco orientaziun dals fatgs en in urden cronologic – las suandantas actas dal sutsegnader: denunzia da la polizia chantunala (PC), protocol da l'interrogaziun da la PC (ils nums vegnan cuvrids dal scrivent), brevs a la procura publica ed al president cirquital Knobel cun las respostas respectivas, la sentenzia dal president cirquital ed in artitgel da gasetta che porta il titel "Nagina denunzia da las visitadras e dals visitaders da Waldau".

Puschlav, ils 16 da zercladur 2009

Trepp, Peyer, Baselgia-Brunner, Arquint, Bucher-Brini, Frigg-Walt, Gartmann-Albin, Jaag, Jäger, Menge, Pfiffner-Bearth, Thöny, Locher Benguerel, Zurfluh

Session: 16.06.2009
Vorstoss: rg Anfrage

Resposta da la regenza

1. Cunter las visitadras e cunter ils visitaders da la Waldau n'ha la regenza betg purtà plant pervia da violaziun da domicil. Pervia da quai na poi betg vegnir rinfatschà ad ella ch'ella haja violà ses pled. Cuntrari a la violaziun da domicil ch'è in delict che vegn persequità sin plant è la malobedientscha cunter la polizia (art. 25 PP) in delict uffizial che sto vegnir persequità d'uffizi da las autoritads da persecuziun penala, senza ch'i saja vegnì purtà plant. Pervia da quai n'ha la regenza gnanc pudì dar explicaziuns correspundentas. Sche la regenza avess dà il cumond da desister d'ina procedura penala pervia da malobedientscha cunter la polizia, s'avess ella exposta a la renfatscha da l'abus d'uffizi e da la favurisaziun.

2. L'access a l'areal sco er l'utilisaziun dals containers d'abitar vegnan reglads en il rom da l'urden da chasa che dastga vegnir relaschà dal chantun sco locatari da l'areal e sco gestiunari da la Waldau. Vi dal scumond general da visita n'è sa midà nagut dapi che l'instituziun è vegnida averta. Tenor dumonda è Jonas Montani s'exprimì en moda generala davart la dumonda dal dretg da visita en cas da requirentas e da requirents d'asil refusads e betg en spezial davart il dretg da visita en il center minimal Waldau, perquai che la gestiun da structuras d'agid d'urgenza suttastat a la cumpetenza dal chantun e betg da l'uffizi federal da migraziun.

3. Cun l'introducziun dal nov sistem da rapportar per il 1. d'avrigl 2009 na vegn betg pli duvrada la noziun "delinquenta" u "delinquent" en ils rapports da polizia. Dapi lura vegni tegni quint da la terminologia ch'è previsa en il cudesch da procedura penala svizzer futur ed i vegn duvrada la noziun "inculpada" u "inculpà".

4. La dumonda implitgescha ch'i haja dà violaziuns da leschas. Latiers na po la regenza dar absolutamain naginas explicaziuns. Pervia dal secret d'uffizi na s'exprima la procura publica betg davart proceduras penalas pendentas e na po betg respunder la dumonda per betg s'exponer a la renfatscha ch'ella pregiuditgeschia eventualas sentenzias giudizialas. Tenor l'art. 2 al. 2 lit. c da la lescha federala davart la protecziun da datas en cumbinaziun cun l'art. 1 al. 4 da la lescha chantunala davart la protecziun da datas na vegn la lescha da datas betg applitgada en cas da proceduras penalas pendentas. Tenor l'art. 76 lit. c PP po il dretg da prender invista da las actas vegnir restrenschì en cas motivads. Per regla vegnan las actas consegnadas cumplettamain. Quest princip po vegnir restrenschì, sch'igl èn tangads dretgs persunals da terzas persunas che n'han nagin connex direct cun il delict da las persunas inculpadas.

5. Igl èn vegnidas registradas las persunalias da las persunas che n'han betg obedì al cumond da la polizia chantunala da bandunar l'areal da la Waldau. Questas persunas n'èn betg vegnidas tschernidas tenor criteris spezials. Entant che la polizia chantunala ha registrà las persunalias, han in pèr visitadras e visitaders bandunà l'areal e n'han pervia da quai betg pli pudì vegnir registrads. Denunziadas èn vegnidas persunas che n'han betg obedì a la spedida da la polizia chantunala e che n'han betg bandunà l'areal da la Waldau.

6. La dumonda na cuntegna naginas indicaziuns, tge faussas deposiziuns ch'èn eventualmain manegiadas. In'accusaziun fiss chaussa da la procura publica.

7. Na, per iniziar ina inquisiziun na datti nagin motiv.

8. Na, per la regenza na datti per il mument nagin motiv per far responsabel insatgi.

1 da settember 2009