Navigation

Inhaltsbereich

Dumonda Michel concernent las consequenzas da la crisa finanziala per la cassa da pensiun chantunala (CP) en quai che reguarda l'independenza concludida

Sessiun: 17.06.2009
Ils 13 da mars 2009 ha la direcziun da la cassa da pensiun chantunala dal Grischun infurmà sias persunas assicuradas davart las consequenzas da la crisa finanziala actuala.

Tranter auter èsi vegnì communitgà che la CP haja in grad da garanzia da 92.8 % per ils 31 da december 2008. La reserva en cas da midadas da la valur, ch'era vegnida accumulada dapi la finanziaziun restanta l'onn 2005, ha stuì vegnir dissolvida. Ultra da la reducziun dal tschains tecnic a 3.5 % e da la sbassada da la tariffa da conversiun per 0.2 % vul la cumissiun administrativa desister da pass da sanaziun per il mument.

Tenor il conclus dal cussegl grond dals 2 d'october 2000 sto l'independenza giuridica ed organisatorica vegnir surdada a la CP per il 1. da schaner 2012. La garanzia chantunala croda cun quest termin. In deficit da garanzia sto vegnir gulivà fin il pli tard ils 31 da december 2011.

L'onn 2005 han il chantun e las vischnancas finanzià cumplettamain il deficit da la CP. La vischnanca da Tavau ha pajà contribuziuns da 5.3 milliuns francs – daners ch'èn vegnids pajads cun l'opiniun ch'i na resultian naginas ulteriuras pretensiuns fin a l'independenza da la CP.
Sin basa da la situaziun ch'è enconuschenta oz supplitgain nus la regenza da respunder las suandantas dumondas:

1. Co giuditgescha la regenza il svilup dal grad da garanzia da la CP fin ils 31 da december 2011?

2. Tge mesiras èn eventualmain planisadas per evitar ina sutgaranzia per ils 31 da december 2011?

3. Sch'i fiss tuttina avant maun ina sutgaranzia per ils 31 da december 2011, vegnan las vischnancas alura previsiblamain puspè obligadas da finanziar il deficit? Sche gea, quant gronda fiss questa quota tenor las enconuschientschas actualas?

4. Exista confurm al senn eventualmain schizunt l'obligaziun d'accumular u da pajar fin l'onn 2015 la reserva da 15 % en cas da midadas da la valur?

Puschlav, ils 17 da zercladur 2009

Michel, Valär, Arquint, Berther (Sedrun), Bezzola (Samedan), Blumenthal, Buchli, Butzerin, Campell, Casparis-Nigg, Casty, Casutt (Falera), Caviezel (Pitasch), Christoffel- Casty, Clavadetscher, Conrad, Felix, Geisseler, Hardegger, Hartmann (Cuira), Hartmann (Champfèr), Jeker, Jenny, Kessler, Kleis-Kümin, Koch, Kollegger, Krättli-Lori, Kunz, Loepfe, Mani-Heldstab, Märchy-Michel (Malans), Marti, Menge, Mengotti, Meyer-Grass (Claustra Vitg), Möhr, Noi-Togni, Parolini, Peer, Perl, Pfäffli, Pfister, Portner, Quinter, Ragettli, Rizzi, Sax, Stiffler, Stoffel, Thomann, Thurner-Steier, Toschini, Troncana-Sauer, Tscholl, Tuor, Vetsch (Claustra Vitg), Vetsch (Pragg-Jenaz), Wettstein, Zanetti, Candinas (Mustér), Casutt-Derungs (Falera), Gunzinger, Locher Benguerel

Session: 17.06.2009
Vorstoss: rg Anfrage

Resposta da la regenza

Cun il conclus dals 2 d'october 2000 ha il cussegl grond incumbensà la regenza da procurar per la finanziaziun restanta da la cassa da pensiun chantunala dal Grischun (CP) fin il pli tard ils 31 da december 2011 e da surdar a la CP l'independenza per il 1. da schaner 2012. La finanziaziun restanta ha pudì vegnir terminada gia l'onn 2005. Ils 12 da zercladur 2007 ha il cussegl grond approvà ina revisiun parziala da la lescha davart la CP, realisond uschia l'independenza giuridica ed organisatorica da la CP. Dapi il 1. da schaner 2008 è la CP in institut independent da dretg public dal chantun.
La garanzia chantunala limitada, ch'è vegnida concedida a la CP per accumular reservas en cas da midadas da la valur, scada ils 31 da december 2015. La data dals 31 da december 2011, che vegn menziunada pliras giadas en la dumonda, n'ha pia nagina relevanza pli per la CP.

1. Dapi ils 31 da december 2008 è il grad da garanzia da la CP sa revegnì in pau e sa chatta actualmain enturn 94 %. Indicaziuns exactas pon dentant vegnir fatgas pir a la fin da l'onn, cur che er retschertgas tecnicas d'assicuranza èn avant maun. Il grad da garanzia n'è dentant betg l'unic punct decisiv per giuditgar la situaziun finanziala d'ina cassa. Fitg impurtanta è er la structura d'ina cassa, per exempel la relaziun tranter persunas cun activitad da gudogn e persunas pensiunadas. Questa infurmaziun mussa, sch'ina cassa è abla da sa revegnir finanzialmain. Las schanzas respectivas da la CP èn intactas, cunquai ch'il dumber da persunas pensiunadas è relativamain pitschen (7'449 persunas cun activitad da gudogn, 2'875 persunas pensiunadas). Il studi dad ECOFIN ha analisà la fin da l'onn 2008 la situaziun finanziala da la CP ed ha giuditgà la strategia d'investiziun da la CP sco adattada per accumular reservas en cas da midadas da la valur. Il studi ha dà in bun attestat a la strategia d'investiziun tschernida. La regenza sustegna quest giudicament, na po dentant far naginas prognosas davart il svilup dal grad da garanzia fin ils 31 da december 2011. Ella è dentant da l'avis che las mesiras, ch'èn vegnidas iniziadas e planisadas da la cumissiun administrativa da la CP, sajan adattadas per stabilisar e per meglierar a vista mesauna la situaziun finanziala da la CP.

2. Gia il cumenzament da mars 2009 ha la cumissiun administrativa concludì in plan da mesiras che fixescha, tge mesiras che vegnan examinadas tar tge grad da garanzia per stabilisar la CP. Tut las persunas assicuradas èn vegnidas infurmadas davart quest plan da mesiras. El po vegnir consultà en l'internet (www.pk.
gr.ch). En il center stat – ultra da la reducziun da la tariffa da tschains tecnica – in tschains pli pitschen u nagin tschains per ils dabuns da vegliadetgna. La reducziun da la tariffa da tschains tecnica ha er gì per consequenza che las tariffas da conversiun èn vegnidas reducidas. A lunga vista ha questa mesira effects positivs per la situaziun finanziala da la CP. Giuridicamain admissibel fissi er d'incassar contribuziuns da sanaziun che stuessan dentant vegnir pajadas mintgamai per la mesadad tant da las patrunas e dals patruns sco er da las lavurantas e dals lavurants. Ord vista da la regenza na stat questa mesira betg en discussiun. Contribuziuns da sanaziun valan sco mesira radicala, perquai che las patrunas ed ils patruns ston pajar contribuziuns supplementaras ultra da las contribuziuns ordinarias, e perquai che las lavurantas ed ils lavurants ston per regla pajar lur contribuziuns en furma da deducziuns dal salari.

3. Tenor il dretg federal po ina cassa da pensiun, che ha ina sutgaranzia, sanar sezza questa sutgaranzia cun mesiras adequatas (art. 65d LPP). La finanziaziun restanta da la CP è vegnida terminada l'onn 2005. Ina "finanziaziun restanta proporziunala" u in pajament exclusiv da contribuziuns da sanaziun tras las patrunas e tras ils patruns (vischnancas, chantun, instituziuns) na vegni perquai betg pli a dar. Sco mesiras per sanar a vista mesauna la sutgaranzia vegnan en dumonda tschains pli pitschens u nagins tschains, contribuziuns da sanaziun u la sistida da supplements da chareschia ch'èn vegnids pajads voluntarmain a las persunas pensiunadas. Las contribuziuns da sanaziun vegnan per regla messas a quint en pertschients da la summa dals salaris assicurada. Sche la cumissiun administrativa da la CP concludess d'incassar ina contribuziun da sanaziun da 2 %, stuess ina patruna u in patrun cun ina summa dals salaris da 400'000.– francs pia pajar 4'000.– (1 %) per la sanaziun, entant che las lavurantas ed ils lavurants stuessan medemamain pajar tuts ensemen 4'000.– francs (1 %) per la sanaziun.

4. I n'exista nagina obligaziun d'accumular u da pajar fin l'onn 2015 ina reserva da 15 % en cas da midadas da la valur. La garanzia chantunala limitada (ch'è unicamain ina garanzia da perdita u da pajament) scada l'onn 2015, er sch'ina reserva correspundenta en cas da midadas da la valur n'è betg accumulada.

14 d'avust 2009