L'Italia è represchentada en Svizra tras l'ambassada e sia secziun consulara a Berna, tras consulats generals a Basilea, a Genevra, a Losanna, a Lugano ed a Turitg, tras in consulat a Son Gagl sco er tras agenturas consularas a Cuira, a Frauenfeld, a Neuchâtel, a Rapperswil, a Sion ed a Wettingen. La rait consulara è la colliaziun la pli impurtanta tranter las burgaisas ed ils burgais talians en Svizra e las autoritads en Italia. Ella è activa en secturs sco il register d'annunzias, ils fatgs socials, la naziunalitad, l'obligaziun da far servetsch militar, il notariat, il biro d'elecziun, ils passaports, las rentas, il stadi civil, il studi e l'adopziun. Ultra da quai porscha ella servetschs per interpresas talianas e svizras en cas d'activitads commerzialas transcunfinalas.

Ils fatgs consulars talians èn vegnids refurmads differentas giadas ils ultims onns. Tranter auter è il consulat a Cuira vegnì reclassifitgà ad in'agentura consulara. La consequenza da quai è che l'agentura a Cuira n'ha betg pli ina partiziun da visums e da scola. Il zercladur 2009 ha il ministeri da l'exteriur da l'Italia preschentà in ulteriur project da refurma per reorganisar ils fatgs consulars talians. Tenor quel èn pertutgads sin tut il mund 22 indrizs d'ina reorganisaziun u d'ina serrada. En Svizra vegnì intenziunà da serrar l'agentura consulara a Cuira fin l'onn 2010 ed il consulat general a Losanna fin l'onn 2011 sco er da reclassifitgar il consulat general a Basilea ad in consulat. Motivà vegn quest project da refurma cun mesiras da spargn necessarias.

En il Grischun vivevan l'avust 2009 circa 11'200 burgaisas burgais talians. En questa cifra n'èn betg resguardadas las persunas natiralisadas ch'èn immigradas. Cun l'entrada en vigur da las cunvegnas bilateralas tranter la Svizra e la UE èn s'augmentads tant il dumber da las cunfinarias e dals cunfinaris sco er il dumber da las interpresas ch'èn activas sur ils cunfins or. La serrada da l'agentura consulara a Cuira fiss ina gronda perdita tant per numerusas burgaisas e per numerus burgais talians sco er or da l'optica da l'economia grischuna e taliana. Burgaisas e burgais talians che vivan en il Grischun stuessan en il futur viagiar fin a Son Gagl per reglar lur fatschentas uffizialas. En spezial per Talianas e per Talians che han lur domicil en in territori perifer fiss quai in grond engrevgiament. Da la serrada da l'agentura consulara patissan er il barat cultural e las relaziuns economicas tranter il Grischun e l'Italia. Tant en il Grischun sco er en l'Italia caracteriseschan las interpresas pitschnas e mesaunas (IPM) la structura economica. Gist per questas interpresas, mabain er per bleras cunfinarias e per blers cunfinaris è ina partiziun consulara en il Grischun in post da contact impurtant. La finala perdess il Grischun cun l'agentura consulara in toc internaziunalitad ed attractivitad sco lieu da staziunament.

La regenza respunda las dumondas sco suonda:

1. La regenza n'è betg vegnida infurmada sin via uffiziala davart la serrada intenziunada da l'agentura consulara taliana a Cuira. Scleriments han mussà che er l'agentura consulara taliana n'ha anc survegnì nagina communicaziun uffiziala, ch'ella parta dentant dal fatg da vegnir infurmada il decurs dals mais settember/ october 2009 davart l'ulteriur proceder.

2. La gestiun da represchentanzas consularas suttastat sulettamain a la cumpetenza da decider dal stadi ester. Quella na po vegnir influenzada directamain ni da la confederaziun, ni dals chantuns. Pervia da l'impurtanza da l'agentura consulara taliana tant per las burgaisas e per ils burgais talians che han lur domicil en il Grischun, per las relaziuns economicas tranter l'Italia ed il chantun Grischun sco er per l'internaziunalitad dal Grischun sco lieu da staziunament, s'engascha la regenza dal chantun Grischun en enclegientscha cun il departament federal d'affars exteriurs (DFAE) en ina brev al ministeri da l'exteriur da l'Italia, per che l'agentura consulara vegnia mantegnida a Cuira.

3 da settember 2009