Tenor la Constituziun dal chantun Grischun stoi vegnir controllà periodicamain, sche las incumbensas publicas èn necessarias, efficazias e finanziablas. L'examinaziun periodica e sistematica da las incumbensas statalas duai per l'ina procurar ch'i vegnia desistì d'incumbensas nunnecessarias, e per l'autra garantir che las incumbensas necessarias vegnian ademplidas en moda effectiva ed effizienta. En il center da l'interess stat la dumonda, co che las resursas persunalas e finanzialas che stattan a disposiziun pon vegnir impundidas en moda raschunaivla ed efficazia. In'examinaziun critica da las incumbensas statalas e dal basegn da resursas correspundentas è ultra da quai er stada il cuntegn da differentas intervenziuns en il Cussegl grond.
L'onn 2022 ha la Regenza fatg in'examinaziun cumplessiva da las incumbensas e da las prestaziuns (EIP) e deliberà tut en tut 193 mesiras d'optimaziun per l'ulteriura elavuraziun. La gronda part da las mesiras è vegnida dada liber per ina realisaziun directa. Tschertas mesiras, cunzunt mesiras che cumpiglian pliras organisaziuns, dovran dentant in'examinaziun pli detagliada per effectivamain pudair vegnir realisadas. Las unitads administrativas cumpetentas vegnan a far l'analisa respectiva fin mez da l'onn 2023. Las mesiras ch'èn lura vegnidas valitadas sco degnas, vegnan realisadas silsuenter.
Mesiras pli pitschnas e mesiras operativas che pon vegnir implementadas svelt e senza bler temp da preparaziun, vegnan realisadas immediatamain. Singulas mesiras pretendan ina midada da l'ordinaziun u schizunt da la lescha e dovran perquai ina fasa da realisaziun pli lunga. En tals cas pon ins eventualmain er s'imaginar da las realisar en il rom dal Program da la Regenza 2025–2028.
La Regenza considerescha l'examinaziun da las incumbensas e da las prestaziuns chantunalas da princip sco incumbensa directiva permanenta. L'ultim temp èn perquai gia vegnidas realisadas cuntinuadamain meglieraziuns, optimaziuns dals process u reorganisaziuns. Da numnar èn per exempel restructuraziuns tar l'Uffizi da migraziun e da dretg civil, tar la Procura publica u tar l'Uffizi per la scola populara ed il sport. Ultra da quai èn vegnids digitalisads differents andaments e process entaifer l'administraziun. Da menziunar è en quest connex cunzunt il project «Ulteriur svilup da las relaziuns commerzialas (GEVER)» che vul digitalisar per gronda part las relaziuns commerzialas internas da l'administraziun chantunala. Cun quai vul el contribuir ad ina collavuraziun pli effizienta e pli simpla tranter ils differents posts da servetsch.
Infurmaziuns detagliadas davart la EIP èn cuntegnidas en ils documents menziunads qua sutvart.
«Rapport davart l'examinaziun da las incumbensas e da las prestaziuns (EIP)»
Agiunta 1 «Examinaziuns da las incumbensas resp. optimaziuns fatgas entaifer ils ultims 5 onns»
Agiunta 2 «Mesiras d'optimaziun da l'examinaziun da las incumbensas e da las prestaziuns (EIP)»