La regenza grischuna vul laschar construir per lung da la via
naziunala A13 en 15 vischnancas paraids da protecziun cunter la canera.
En ina brev al departament federal per ambient, traffic, energia e
communicaziun (DATEC) dumonda ella a la confederaziun da prender si las
mesiras da sanaziun da canera preschentadas en il program per la
construcziun da las vias naziunalas. Ils custs totals per il program da
sanaziun da canera proponì vegnan stimads sin 27 milliuns francs. Tenor
il dretg valaivel èn mesiras en furma da paraids da protecziun cunter la
canera realisablas mo sin paucas parts da la A13 perquai che la limita
d'immissiun decisiva vegn be surpassada tar singulas immobiglias.
Examinaziuns da las rutas da transit da las Alps han però mussà ch'ils
disturbis resentids da la populaziun concordeschan da princip mo fitg
mal cun las limitas da canera valaivlas. Il traffic da deviaziun sur la
ruta dal San Bernardin ha ultra da quai augmentà cleramain la
problematica da canera.
LISS: Suenter la votaziun dal pievel entschaiva la construcziun dal
center da furmaziun
Suenter la votaziun dal pievel da la dumengia passada ha la regenza
grischuna mess en vigur per il 1. da schaner 2003 la lescha davart ils
instituts da furmaziun per la sanadad ed ils fatgs socials LISS. Entras
l'acceptaziun dal pievel da quest project vegnan fatgas a partir dad oz
las preparativas per surpigliar la scola professiunala da sanadad e
tgira da malsauns, la scola interconfessiunala per sanadad e tgira da
malsauns, la scola grischuna da tgira sin il sectur psicosocial sco er
da partiziuns betg seminaristicas da la scola da dunnas dal Grischun e
per transferir quellas en il center da furmaziun.
En la fasa da transiziun che suonda vegni a sa tractar l'emprim da
cuntinuar cun la concentraziun operativa da las scolas, da prender en
maun la realisaziun sin plaun chantunal da las refurmas da furmaziun en
las professiuns da sanadad e socialas sco er da sviluppar vinavant
l'integraziun da las professiuns da sanadad e socialas en il departament
d'educaziun, cultura e protecziun da l'ambient. Per quest intent ha la
regenza numnà in cussegl da scola ad interim ed ina manadra da
fatschenta. Tut ils commembers dal cussegl da scola ad interim han gia
cooperà dapi l'onn 1999 en il rom dal project "Coordinaziun da furmaziun
per professiuns da sanadad CFS": Claudio Lardi, cusseglier guvernativ
(president), Béatrice Riesen, commembra da la cumissiun da cussegliaziun
per dumondas da la furmaziun da las dunnas, Ursina Valsecchi, presidenta
da la federaziun da las chasas ed ospitals dal Grischun, Urs Brasser,
secretari da finanzas, Gion Claudio Candinas, secretari dal departament
da sanitad e dals fatgs socials, Hermann Laim, secretari dal departament
d'educaziun. Sco manadra da fatschenta vegn numnada la manadra dal
project CFS d'enfin uss, Veronika Niederhauser.
Agid finanzial per la tgira d'uffants cumplementara a la famiglia:
pli paucs reglaments e gista repartiziun dals meds federals
La lescha federala davart l'agid finanzial per la tgira d'uffants
cumplementara a la famiglia vegn discutada en il parlament. Il program
d'impuls da la confederaziun duai esser limità sin otg onns (proposta
dal cussegl dals chantuns) e sustegnair da princip novas offertas da la
tgira d'uffants, las qualas èn vegnidas amplifitgadas considerablamain,
durant maximalmain trais onns. La regenza grischuna è ussa s'exprimida
davart il sboz da l'ordinaziun executiva correspundenta (impuls da
finanziaziun per posts d'assistenza cumplementara a la famiglia) visavi
al departament federal da l'intern. La regenza beneventa da princip ch'i
vegnia renunzià en l'ordinaziun ad in grad da reglamentaziun memia grond
per betg periclitar l'amplificaziun, giavischada explicitamain, da las
novas offertas. Plinavant duai mintga chantun avair la pussaivladad da
retrair durant ils impuls da finanziaziun ils daners federals
proporziunalmain a la part da sia populaziun.
Tar las singulas disposiziuns da l'ordinaziun executiva giavischa la
regenza ina clausula excepziunala en il sectur da las pretaisas
minimalas, sco p. ex. sin il champ dals plazs, da las uras da tgira per
emna u dals dis d'avertura per onn. Chantuns cun numerusas vischnancas
pitschnas e lungas distanzas duain en cas motivads pudair variar dal
standard minimal, cunquai che las offertas per la tgira d'uffants na
duajan betg mo vegnir realisads en centers geografics, mabain er al
domicil da la famiglia. Sco autoritad executiva prevesa il sboz da
lescha l'uffizi federal da las assicuranzas socialas.
Ulteriuras consultaziuns a la confederaziun
- Consultaziuns a l'uffizi federal d'ambient, guaud e cuntrada: La
regenza grischuna na fa naginas objecziuns cunter la recepziun da
l'uniun d'iniziativa da las Alps en la glista da las organisaziuns
legitimadas da far recurs.
- Posiziun a maun dal departament federal da l'economia publica: La
regenza considerescha l'augment dal limit da la valur en lita en
proceduras da la protecziun da consuments e da la concurrenza illoiala
da 8000 sin 20'000 francs sco giustifitgà. Ella po perquai approvar il
sboz.
Contribuziuns chantunalas a differentas organsaziuns ed instituziuns
- Al forum economic dal Grischun ha la regenza grischuna garantì
totalmain ina contribuziun da 120'000 francs per sia lavur generala
durant l'onn 2002 e per ils projects parzials "Concept directiv per
l'economia dal Grischun", "Cooperaziuns d'hotel e regulaziun da
successiun" sco er "Strategia da turissem dal Grischun".
- Per la federaziun forestala dal Grischun "Selva" ha la regenza
approvà per l'onn 2002 ina contribuziun da 80'000 francs per la
promoziun da l'economia forestala e l'economia da laina.
- Or dals meds da la lottaria interchantunala ha la regenza
grischuna garantì a l'uniun d'economia da chasa dal Grischun ina
contribuziun da 20'000 francs per ils emprims trais onns da gestiun e
per l'installaziun d'in servetsch da tegnairchasa.
- La regenza ha tractà 10 dumondas per contribuziuns da Sport-Toto
ed approvà per quellas ina summa totala da maximal 94'000 francs.
Or da vischnancas e regiuns
- La regenza grischuna è sa fatschentada cun la revisiun parziala da
la planisaziun locala da las vischnancas da Tujetsch, Tschlin e Says ed
ha approvà ils meds da planisaziun ch'èn vegnids inoltrads, cun
correcturas, resalvas, indicaziuns e recumandaziuns.
- La vischnanca da Poschiavo survegn per la realisaziun d'in passadi
da peduns per lung da la via dal Bernina a San Carlo ina contribuziun
chantunala maximala da circa 189'000 francs.
Persunal
- Marcel Suter è vegnì tschernì sco schef da stab da la polizia
chantunala dal Grischun. Marcel Suter è ozendi manader dal servetsch
giuridic da l'uffizi da construcziun bassa dal Grischun.
- Sco segund suppleant dal cumandant da la polizia chantunala dal
Grischun (schef persunal/scolaziun) è vegnì tschernì Robert Willi.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun