Il Succurs grischun d'enviern ha per finamira da mitigiar las consequenzas da la paupradad en noss chantun. Er umans cun pussaivladads finanzialas modestas duain pudair finanziar sezs lur existenza ed organisar lur vita sco ch'els vulan.

Quant impurtanta che questa incumbensa è anc adina, quai cumprova la situaziun economica actuala. Il boom en il sectur da finanzas, d'informatica e da reclama è passà, l'industria resenta la nauscha conjuctura mundiala. Il dumber dals dischoccupads crescha puspè cleramain. En emprima lingia èn spezialists e glieud da cader pertutgads da las midadas negativas. En questa situaziun economica pegiurada pateschan dentant il pli fitg puspè persunas cun qualificaziuns professiunalas bassas, dunnas cun relaziuns da lavur intschertas, impiegiads a temp parzial cun obligaziuns famigliaras.

Gist tals umans gida la fundaziun Succurs grischun d'enviern cun cussegl ed agid. Ella surpiglia quints per expensas imprevisas, metta a disposiziun gratuitamain letgs, vestgadira e chalzers e pussibilitescha cun meds finanzials cumpras urgentamain necessarias. Las prestaziuns dal succurs d'enviern pon esser nunspectacularas. Per ils pertutgads è il sustegn finanzial ed emoziunal cun agid concret ed in'ureglia averta da fitg gronda valita.

Er en noss chantun han fitg bleras persunas che vivan sulettas e famiglias problems existenzials. Per ch'il Succurs grischun d'enviern possia er vinavant gidar a moda nunbirocratica, è la fundaziun dependenta da donaziuns. L'ovra d'agid renconuschida da ZEWO rimna daners a partir dals 21 fin ils 26 d'ocotber 2002. Il Succurs grischun d'enviern engrazia a tut las fauturas ed a tut ils fauturs per lur confidenza ed empermetta d'utilisar la donaziun a moda adequata.

Gremi: Uffizi dal servetsch social
Funtauna: rg Uffizi dal servetsch social