La Fundaziun per promover l'artisanat grischun ha concedì quest onn gia per la quarta giada in premi da renconuschientscha da 3'000 francs, dus premis da promoziun da mintgamai 10'000 francs sco er ina contribuziun da scolaziun da 5'000 francs.
Il premi da renconuschientscha va ad Anita Misani da Cuira per sias prestaziuns extraordinarias en il sectur da retgams sin saida. Ricarda Müller da Favugn survegn in premi da promoziun per cuntinuar a sviluppar sias pitschnas serias d'artitgels da lain cun intarsias. Ina contribuziun da promoziun survegnan medemamain Hugo Zumbühl ed Esther Krättli (Favugn e Cuira) per il project innovativ "teppi grischun". Materias primas indigenas sco launa da nursas e da chauras vegnan elavuradas ad in tarpun da design d'auta valur. Sonia Luck da Pragg-Jenaz survegn ina contribuziun per sa scolar sco tessunza en favur dal project "teppi grischun".

Gremi: Fundaziun per promover l'artisanat grischun
Funtauna: rg Uffizi da cultura