La cumissiun predeliberanta dal cussegl grond ha discutà davart il project d'ina lescha per la promoziun da la tgira d'uffants cumplementara a la famiglia ch'è vegnì suttamess da la regenza.

Ella è dal medem avis sco la regenza che la promoziun da la tgira d'uffants cumplementara a la famiglia tras il chantun e las vischnancas haja ina gronda impurtanza, e quai ord vista da la politica da famiglia sco er ord vista da la politica sociala ed economica. Ultra da quai muntia ella in instrument impurtant per l'egualitad tranter las schlattainas. Correspundentamain propona la cumissiun al cussegl grond d'acceptar il project, malgrà las finanzas chantunalas fitg precaras.

La cumissiun predeliberanta accentuescha en quest connex la constataziun che la promoziun da la tgira d'uffants cumplementara a la famiglia tras il chantun e las vischnancas na mida betg la responsabladad da la famiglia respectivamain da las persunas cun la pussanza dals geniturs per l'educaziun e l'assistenza da lur uffants. Ina minoritad da la cumissiun propona ina concretisaziun correspundenta da l'artitgel d'intent da la lescha. A la cumissiun predeliberanta pari d'esser impurtant, per ponderaziuns integrativas, che las purschidas da tgira d'uffants cumplementara a la famiglia vegnian sche pussaivel dumandadas al lieu da domicil. Ella propona correspundentamain d'integrar ina disposiziun en la lescha, tenor la quala la vischnanca da domicil po refusar sia contribuziun, sche las persunas cun la pussanza dals geniturs na fan betg diever da la purschida existenta en lur vischnanca.

La cumissiun predeliberanta dal cussegl grond stat sut il presidi da Clelia Meyer Persili (PS). Las discussiuns han gì lieu en preschientscha da cusseglier guvernativ Peter Aliesch.

Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond