La regenza ha approvà da princip il plan directiv regiunal "concept implants da golf Surselva". Cun quai è dada la basa per stgaffir en la Surselva ina regiun da golf communabla cun totalmain fin trais novs implants da golf. En il conclus d'approvaziun da la regenza davart quest concept dal plan directiv vegn garantì in ulteriur proceder coordinà cun cundiziuns e pretensiuns per las proceduras successivas. En quel conclus vegnan er scleridas anc las dumondas avertas.
La finamira dal plan directiv regiunal "concept implants da golf Surselva" da la corporaziun da vischnancas Surselva è da stgaffir ina regiun da golf communabla cun pliras plazzas da golf che vegnan coordinadas en lur realisaziun e commerzialisadas communablamain. La colliaziun da differents purschiders duai promover il turissem durant la stagiun da stad e trair a niz meglier ils letgs e l'infrastructura existenta. Il concept dal plan directiv cumpiglia, sper l'implant da golf existent a Selva/Sedrun, projects per novs implants da golf a Sursaissa - Flond, Breil e Sagogn - Schluein.

La collavuraziun regiunala è segirada cun in contract
En la Surselva è il tema implants da golf gia dapi il 1993 ina part dal plan directiv regiunal. Il 2001 ha la regiun cumenzà cun ina examinaziun concepziunala e cun ina reelavuraziun da quest plan directiv per garantir la coordinaziun regiunala. La coordinaziun e fixaziun dals lieus en il plan directiv regiunal dattan la premissa per approvar la planisaziun d'utilisaziun da las vischnancas tenor il project. Ils 8 da december 2001 ha la radunanza da delegads da la corporaziun da vischnancas Surselva concludì il nov concept per ils implants da golf cun 60 a 0 vuschs. La collavuraziun entaifer la regiun da golf è - en questa furma per l'emprima giada - concretisada tras ina cunvegna tranter la regiun ed ils purtaders dal project e garantida cun in contract. Las vischancas da las plazzas da golf han parallel cun la planisaziun directiva gia instradà preparativas per la revisiun da la planisaziun d'utilisaziun e per sclerir la dumonda da la cumpatibilitad ecologica areguard il project.
La fixaziun en il plan directiv mussa co che las activitads cun effect sin il territori èn coordinadas. La premissa per questa fixaziun è in potenzial presumabel da la retschertga, in'examinaziun exacta dals lieus adattads, la realisaziun dal project en general sco er la garanzia da la collavuraziun e coordinaziun en las proceduras sutordinadas.

Discurs cun las organisaziuns per la protecziun da l'ambient
Per l'emprima giada ha l'uffizi da planisaziun organisà in hearing en il rom da la procedura d'approvaziun. Quel ha servì sco basa da discussiun supplementara per tractar la critica e las resalvas che las organisaziuns per la protecziun da l'ambient avevan fatg cunter quest concept dal plan directiv en il rom da l'exposiziun publica, per preschentar ils differents interess e per meglierar l'infurmaziun vicendaivla. Quest hearing mussa ch'ils partenaris participads sa stentan da chattar ina via vers ina schliaziun vicendaivla.
En la consideraziun generala dals interess è la regenza vegnida a la conclusiun che la coordinaziun da tut il terrirori sin il plan directiv saja garantida. En differents puncts datti anc in per dumondas ch'ins vegn a stuair concretisar confurm al stgalim. Sper las dumondas da la cumpatibilitad ecologica dals singuls projects, las mesiras da cumpensaziun ecologica e las mesiras substitutivas sco er sper las influenzas sin l'agricultura sto anc sa mussar l'efficacitad areguard l'economia dal manaschi da mintga singula plazza da golf. Per realisar la regiun da golf è la stretga collavuraziun decisiva. Il concept dal plan directiv è vegnì approvà da la regenza cun resalvas e cundiziuns precisantas per las proceduras successivas. La regiun vegn a surpigliar la coordinaziun per cuntinuar il svilup intenziunà e per sclerir las dumondas anc avertas. Quai sto funcziunar cun gruppas da lavur spezialisadas al tema; participadas èn las organisaziuns per la protecziun da l'ambient, ils uffizis chantunals e l'agricultura. La regiun procura che las lavurs vegnian coordinadas.

Gremi: uffizi da planisaziun
Funtauna: rg uffizi da planisaziun