Investiturs privats vegnan a surpigliar ina participaziun maioritara vi da la NetCom Grischun SA. Ensemen cun els e cun la Tele Rätia Sa ha la regenza pudì fixar l'ulteriura procedura e la strategia futura da las duas interpresas Tele-Rätia SA e NetCom Grischun.

La NetCom Grischun SA è ina filiala da la Tele-Rätia SA. La Tele-Rätia SA è vegnida fundada 1980 per proveder cun programs da televisiun esters quellas parts dal chantun che na disponan betg d'in cabel da televisiun. La purschida actuala da la Tele-Rätia na po betg pli satisfar ils basegns actuals da la populaziun. Perquai ha decis la Tele-Rätia l'onn 1999 da fundar la NetCom Grischun SA e d'incablar cun ella parts dal chantun. La NetCom ha entschavì sias lavurs d'avertura en las vischnancas da Panaduz, Razén, Tumein e San Murezzan.

Strategia nova
La Tele-Rätia SA è sa drizzada la primavaira 2001 a la regenza cun la strategia da metter cabels en l'entir chantun. L'examinaziun dals plans da fatschenta ed il svilup tecnologic han chaschunà ina midada da la strategia. La finamira resta quella da proveder il chantun a moda optimala e sin l'entir territori cun servetschs da telecommunicaziun e d'augmentar uschia l'attractivitad dal lieu. La strategia cumplessiva da las duas interpresas NetCom Grischun SA e Tele-Rätia SA na consista dentant betg pli exclusivamain da l'incablament, mabain ellas han d'accordar l'incablament cun la tecnologia DVB-T senza cabel en ina maniera che fa senn. En las regiuns fitg populadas èsi da persequitar la pussaivladad d'ina extensiun limitada da la rait da cabels a bindel lad, en las autras regiuns èsi da garantir il provediment da radio e televisiun senza cabel via il provediment DVB-T (digital video broadcasting terrestrial).

Consorzi d'investiturs
La primavaira 2001 ha concludì la regenza d'avrir la NetCom Grischun SA per investiturs privats, premess che tals èn avant maun. En il fratemp han ins pudì chattar investiturs cumpetents per l'incablament. Quai èn:
- Fischer Management Consulting SA, Lucerna
- PizCom SA, San Murezzan
- aurax SA, Glion
- Südostschweiz Newmedia SA, Cuira
Quest consorzi d'investiturs privats stat sut la direcziun da Leo Fischer, il pionier svizzer da la televisiun da cabel ed anteriur CEO da la Cablecom. El ha vastas experientschas sin il sectur da l'incablament. Il preschent concept prevesa ch'il consorzi surpiglia ina participaziun maioritara e renda accessibel en in emprim pass dudesch vischnancas per il cabel. La regenza sustegna questa procedura e sa resalva in'opziun per ina participaziun minoritara.

Extensiun dal provediment senza cabel
A medem mument duai vegnir examinà ensemen cun la Tele-Rätia SA e SRG SSR idée suisse l'extensiun dal provediment existent senza cabel ad ina purschida cumpetitiva da televisiun e radio. En discussiun è qua l'uschenumnada tecnologia DVB-T (digital video broadcasting terrestrial).

Sustegn tras il chantun
La regenza è pronta da sustegnair la strategia. En il rom da la futura revisiun da la lescha davart il promover l'economia publica duain vegnir elavuradas propostas correspundentas.

Gremi: regenza
Funtauna: rg departament da l'intern e da l'economia publica dal Grischun