A partir da 2004 vegni a dar en il Grischun be anc 12 organisaziuns da protecziun civila enstagl da las 43 da fin uss. La refurma da la protecziun civila en il Grischun è plinavant colliada cun ulteriuras adattaziuns marcantas da las structuras. A basa da las debattas en il cussegl naziunal ed il cussegl dals chantuns vegn la refurma da la protecziun civila probablamain ad entrar en vigur pir l'onn 2004 e betg l'onn 2003, sco ch'igl è stà planisà.

Ils effects da la refurma da la protecziun civila 200X vegnan a purtar adattaziuns considerablas da las structuras per la protecziun civila dal Grischun. Cun la reducziun da l'effectiv da fin uss da 8000 persunas obligadas al servetsch da protecziun civila ad in maximum da be anc 3000 dovri a medem mument in'adattaziun da las structuras d'organisaziun. Las 43 organisaziuns da protecziun civila (OPC) vegnan unidas en be anc 12 organisaziuns suenter l'entrada en vigur da la nova lescha federala davart la protecziun da la populaziun e la protecziun civila. Cun excepziun da l'organisaziun da protecziun civila da Tavau che vegn a restar independenta pervia da sia grondezza vegn furmada en il futur ina OPC per mintga district politic. L'effectiv da las singulas organisaziuns vegn a cumpigliar tranter 150 e 250 persunas.
La direcziun politica da las OPC vegn transferida da las singulas vischnancas al chantun che vegn er ad esser responsabel per l'elecziun dals cumandants da milissa da las novas organisaziuns da protecziun civila. Colliada cun quest pass è tranter auter er l'aboliziun dals posts da protecziun civila en las vischnancas. En cas d'ina midada da domicil ordaifer il district na munta quai betg pli automaticamain che la persuna obligada al servetsch da protecziun civila haja d'entrar en la OPC dal nov domicil. Tut tenor la distanza dal nov domicil a la OPC da fin uss vegnan las persunas obligadas al servetsch da protecziun civila a prestar vinavant lur servetsch en lur organisaziun oriunda.
Perquai ch'il cussegl dals chantuns n'ha betg pudì deliberar la missiva davart la revisiun totala da la legislaziun da la protecziun civila en occasiun da l'ultima sessiun, na vegn la nova lescha betg ad entrar en vigur il schaner 2003. Il departament federal da defensiun, protecziun da la populaziun e sport (DDPS) parta uss dal fatg che la nova basa legala da la confederaziun per la protecziun dal pievel e la protecziun civila vegnian ad entrar en vigur a medem mument sco quella da l'armada XXI, numnadamain pir il 1. da schaner 2004. A basa da quest retard valan fin la fin da l'onn 2003 anc las disposiziuns legalas da la refurma da la protecziun civila 95 e tras quai tranter auter er l'obligaziun da prestar servetsch fin il 50avel onn. La relaschada dals commembers da la protecziun civila da las annadas 1952-1962 ch'è stada previsa ed er gia annunziada pliras giadas per la fin da quest onn na po perquai betg avair lieu.
En vigur restan qua tras medemamain las disposiziuns da fin uss concernent il pajament da la taglia militara tras persunas obligadas al servetsch da protecziun civila fin a lur 42avel onn. Sch'ins po observar il nov urari da las refurmas currentas da l'armada e da la protecziun da la populaziun vala l'obligaziun al servetsch a partir da 2004 be anc fin al 30avel onn. Cun il project da lescha, sco ch'el è vegnì approvà en la missiva, dovri a partir da 2004 considerablamain dapli dis da servetsch da protecziun civila per vegnir dispensà da pajar la taglia militara. Da preschent sa reducescha la summa totala per di da servetsch per diesch, en il futur vegn questa reducziun a muntar be anc a quatter pertschient.

Gremi: uffizi per la protecziun civila e l'agid en cas da catastrofas dal chantun Grischun
Funtauna: rg uffizi per la protecziun civila e l'agid en cas da catastrofas