La regenza grischuna ha inoltrà tar il departament federal da l'ambient, traffic, energia e communicaziun DATEC ina dumonda per la finanziaziun da la "porta alpina Sedrun".

Trais expertisas vegnan da princip a la conclusiun che la "porta alpina Sedrun" saja economicamain interessanta e realisabla areguard la construcziun ed il manaschi. La regenza grischuna propona perquai al cussegl federal da prender en funcziun l'onn 2013 a medem temp la "porta alpina Sedrun" ed il tunnel da basa dal Gottard. Ultra da quai duai il DATEC elavurar in project da finanziaziun per mauns da las chombras federalas.

Grond'impurtanza per la politica da traffic
La regenza grischuna dat a quest project ina grond'impurtanza or dal puntg da vista da l'economia publica e spetga en questa dumonda in ferm engaschament da la confederaziun. Il Grischun sco il chantun il pli grond da la Svizra ha adina puspè stuì far l'experientscha - tant tar la viafier orientala da las Alps sco er tar la tunnelisaziun da la viafier da Cuira ad Arosa ed ultimamain er tar la suspensiun temporala dal tunnel dal Hirzel - che sias dumondas da traffic n'èn betg vegnidas resguardadas.

Il tunnel da basa dal Gottard d'Erstfeld a Biasca è - sco part centrala da la NVTA - plainamain en construcziun. A Sedrun vegn fatga ina part tras ina fora d'ina profunditad da 800 meters. Al pe da la fora vegn installà in post multifuncziunal cun ina fermada d'urgenza integrada. Da la regiun da la Surselva deriva l'idea d'amplifitgar questa fermada d'urgenza ad ina fermada uffiziala regulara. Per sustegnair questa proposta èn vegnidas inoltradas il mars 2000 sin plaun naziunal ed il mars 2001 sin plaun chantunal intervenziuns parlamentaras ch'èn vegnidas acceptadas dal cussegl federal respectivamain da la regenza grischuna per l'examinaziun.

Links:
fegl da documentaziun
grafica

Gremi: regenza
Funtauna: rg chanzlia chantunala dal Grischun