Las analisas individualas DNA ch'ins ha fatg posteriurmain han mussà ch'en Surselva vivan per il mument na mo in, mabain dus lufs masculins da derivanza taliana.

Duas provas d'excrements ch'èn vegnids chattads ils 31 da december 2002 a Breil, resp. ils 21 da schaner 2003 a Danis, na derivan betg dal medem animal. Las examinaziuns èn vegnidas fatgas en in labor da l'universitad da Losanna ch'è spezialisà per analisas DNA. Il resultat da l'analisa discurra cler e net da dus differents individis.
Emprimas indicaziuns han rendì attent gia la stad passada a la preschientscha d'in luf en Surselva. Pliras observaziuns directas da chatschaders e pasturs e pli ch'ina dunsaina da nursas stgarpadas han cumprovà il suspect ch'in luf saja preschent.
La cumprova scientifica ch'i sa tractia d'in luf, è succedida il schaner passà. Analisas ch'èn vegnidas fatgas posteriurmain cun la finamira da distinguer singuls lufs a moda individuala, mussan ch'en Surselva vivan per il mument dus lufs.

Gremi: uffizi da chatscha e pestga
Funtauna: rg uffizi da chatscha e pestga