La gruppa da lavur administrativa interna "segirezza d'edifizis
publics e d'instituziuns publicas" aveva l'onn 2002 proponì en ses
rapport tranter auter da stgaffir in post central da cussegliaziun. Las
commembras ed ils commembras da las autoritads ch'èn confruntads cun
situaziuns da smanatscha duain pudair dumandar qua cussegl. L'uffizi dal
servetsch social è da lez temp vegnì incaricà cun l'installaziun dal
post.
La regenza ha ussa approvà l'installaziun d'in tal post da
cussegliaziun. Quel vegn integrà en il post da cussegliaziun "agid a
victimas" en l'uffizi dal servetsch social ed el è dotà dal persunal nà
cun 30 pertschient. El stat a disposiziun tant a l'administraziun
chantunala sco er a las vischnancas.
La surveglianza da la fundaziun è vegnida reglada da nov
La regenza ha approvà la revisiun totala da la "ordinaziun davart la
surveglianza da las fundaziuns". Ella remplazza la regulaziun d'enfin
ussa da l'onn 1947. Malgrà duas revisiuns dals onns 1994 e 1998 ha la
versiun actuala differentas largias. La surveglianza, en spezial er
d'instituziuns da prevenziun, è ord vista giuridica ozendi per part
problematica. Cun la revisiun totala da l'ordinaziun vegnan per
l'emprima giada regladas en spezial las cumpetenzas tranter l'uffizi da
dretg civil ed il departament da giustia, polizia e sanitad. En quest
connex surpiglia l'uffizi da dretg civil la responsabladad principala en
il rom da la surveglianza da fundaziun.
Mesiras da sanaziun per las cassas da pensiun: basegnaivel,
raschunaivel e funcziunal
La nauscha situaziun sin il martgà da finanzas fa problems a las
cassas da pensiun. La facultad da prevenziun na tanscha tar differentas
instituziuns da prevenziun betg pli per cuvrir tut las obligaziuns.
Ultra da quai n'èn las pussaivladads da la "lescha federala davart il
provediment professiunal" LPP per tschiffar en moda effizienta ina
sutgaranzia betg en mintga cas suffizientas.
Cun la revisiun da la LPP e cun ordinaziuns unitaras vul la
confederaziun mitigiar la situaziun actuala. Concretamain duain las
cassas da pensiun avair la pussaivladad da pretender contribuziuns per
dismetter la sutgaranzia tant tar ils lavurants sco er tar ils patruns;
questas contribuziuns duain er restar tar la cassa da pensiun en cas
d'in midament dal post da lavur da la persuna assicurada. Ils dabuns da
vegliadetgna duain pudair vegnir tschainsì cun ina tariffa da tschains
pli bassa che la tariffa da tschains minimala e persunas pensiunadas
duain er stuair prestar ina contribuziun temporalmain limitada per
dismetter la sutgaranzia.
La regenza grischuna considerescha las mesiras proponidas dal
cussegl federal sco basegnaivlas, raschunaivlas e funcziunalas, er sche
quellas èn dolurusas per persunas assicuradas e per persunas
pensiunadas. Las mesiras han mo alura in effect suffizient, sch'ellas
vegnan duvradas ensemen.
Nov'ordinaziun da las schefmedias e dals schefmedis entra en vigur
il 1. da schaner 2004
Il 1. da schaner 2004 entra en vigur la nova "ordinaziun davart las
cundiziuns d'engaschament per ils schefmedis ed ils medis directurs dals
ospitals cun dretg da contribuziuns en il chantun Grischun". L'element
central da l'ordinaziun revedida è la reglamentaziun nova da las
pretensiuns d'onurari dals schefmedis e dals medis directurs tenor la
tariffa da tarmed. Tarmed è ina structura da tariffa unifitgada per
l'entira Svizra che divida consequentamain tut las prestaziuns en ina
part tecnica ed en ina part prestaziuns dal medi. La part prestaziuns
dal medi furma en l'avegnir la basa per ils onuraris dals medis
d'ospital.
La regenza ha concludì ussa, suenter la consultaziun, l'entrada en
vigur da la nova ordinaziun.
Da vischnancas e regiuns
- L'instrucziun instrumentala e l'instrucziun da chant da la scola
chantunala grischuna a Cuira vegn dada en il futur en scolas da musica
da l'associaziun da las scolas da chant e da musica ACMG.
- La regenza ha approvà la planisaziun revedida da las vischnancas
da Vaz (cumplettaziun dal plan general d'avertura "part aua ed
ennavada"), Tschlin (lescha da construcziun, midada da zona "Sur
Quadras") e Fideris (lescha da construcziun).
- La chasa d'attempads e da tgira Casa Falveng a Domat vegn renovada
ed engrondida. La regenza ha approvà il project. Var la mesadad dals
custs imputabels vegn purtada dal chantun.
- Fuldera e Domat survegnan mintgamain ina nova fermada d'auto da
posta. La regenza ha approvà tuts dus projects e deliberà ina
contribuziun chantunala da totalmain var 120'000 francs.
Contribuziuns chantunalas a differentas instituziuns
- Per l'engrondimenta da la chasa da scola "Puntraschins sur" a
Puntraschigna ha la regenza approvà ina contribuziun chantunala da var
37'000 francs.
- Il project per la meglieraziun dal deposit da laina existent sin
l'areal dal lavuratori d'emprendissadi a Samedan è vegnì approvà
definitivamain. La tariffa maximala da la contribuziun chantunala
importa var 88'000 francs.
- Ovras da Remo Alig, Heiner Kielholz, Urs Lüthi e Paul Stöckli
vegnan a decorar en il futur las localitads da l'administraziun
chantunala. Per quest intent vengnan mess a disposiziun var 20'000
francs.
- En il sectur da la promoziun da la cultura ha la regenza deliberà
var 70'000 francs per ils projects en il museum retic "Grandhotel
Bregaglia", Promontogno, e "L'histoire c'est moi. 555 offizielle
Versionen der Schweizer Geschichte". Ultra da quai presta il chantun ina
contribuziun finanziala per fundar l'uniun grischuna d'orchester da
giuvenils.
Persunal
Albert Gabriel, Claustra, è vegnì elegì sco manader dal project
economia da manaschi en l'uffizi da sanadad dal Grischun.
chanzlia chantunala dal Grischun
Gremi: regenza
Funtauna: rg chanzlia chantunala dal Grischun