En la proxima sessiun dal cussegl grond vegn il parlament a sa fatschentar cun dus projects che concernan las acquisiziuns publicas. Latiers sa tracti da la participaziun a la cunvegna interchantunala revedida davart las acquisiziuns publicas sco er da la revisiun totala dals decrets chantunals da submissiun. A chaschun da sia sesida da mez schaner ha la cumissiun cumpetenta per economia, taxas e politica da stadi dal cussegl grond predeliberà - en preschientscha dal cusseglier guvernativ Stefan Engler - la missiva da la regenza per mauns dal cussegl grond.

Il project concernent la participaziun a la cunvegna interchantunala revedida davart las acquisiziuns publicas è stà incontestà. Tar diversas disposiziuns dal project davart la lescha chantunala da submissiun èn dentant stadas avant maun propostas da la cumissiun ch'èn vegnidas discutadas detagliadamain. Quellas han pertutgà l'exemziun da la subordinaziun da las activitads commerzialas ed industrialas dal maun public, l'avertura formala da l'agiudicaziun, l'obligaziun da far ina statistica tar la procedura directa e l'integraziun da la scolaziun d'emprendist(a)s en il catalog dals criteris d'agiudicaziun. Plinavant èn cunzunt vegnidas discutadas detagliadamain las limitas minimalas proponidas da la regenza; la cumissiun las ha la finala chattadas per bunas. Ina gronda discussiun ha er chaschunà la proposta da la maioritad che pretenda che purschiders che sa chattan en ina procedura d'accumodament duain vegnir exclus da la procedura.

Dal rest è la cumissiun suandada per gronda part las propostas da la regenza.
La missiva da la regenza è la finala vegnida deliberada per mauns dal cussegl grond.

Gremi: cumissiun per economia, taxas e politica da stadi
Funtauna: rg cumissiun per economia, taxas e politica da stadi