La violenza a chasa duai avair per consequenza che delinquents possian vegnir exclus da l'abitaziun cuminaivla. Quai propona la cumissiun per dumondas giuridicas dal cussegl naziunal. En il cudesch civil svizzer CCS duai perquai vegnir integrà in nov artitgel 28b. La cumissiun propona ultra da quai als chantuns d'installar posts d'infurmaziun e da cussegliaziun per la protecziun cunter la violenza a chasa. Che la regenza grischuna sustegnia da princip l'introducziun d'in nov artitgel en il CCS, scriva ella en sia consultaziun al departament federal da giustia e polizia.

En il Grischun è vegnì inizià l'onn 2003 in project d'intervenziun cunter la violenza a chasa. La nova lescha chantunala da polizia dat medemamain pussaivladads a la polizia da bandegiar delinquents violents or da chasa.

La regenza è per transparenza tar ils onuraris da direcziuns e da cussegls administrativs
Commembers da direcziuns e da cussegls administrativs d'interpresas ch'èn quotadas a la bursa duain stuair palesar lur indemnisaziuns; maximalmain però en il medem rom sco che quai è il cas en auters stadis. Per quai che l'adattaziun proponida dal dretg d'obligaziuns na dastga avair naginas influenzas negativas per la Svizra sco lieu economic, scriva la regenza en sia consultaziun al departament federal da giustia e polizia. Gista è er la finamira da distinguer tranter ils commembers dal cussegl administrativ ed ils commembers da la direcziun. Tar commembers da la direcziun basta l'indicaziun da la summa totala; il cussegl administrativ fixescha quella e fa correspundentamain ina tscherta controlla. Perquai ch'il cussegl administrativ decida sez las atgnas indemnisaziuns, sto el declerar quellas en moda cumplettamain transparenta. Commembers da direcziuns e da cussegls administrativs ston ultra da quai palesar lur participaziun a la societad.

Consultaziun dal "product secundar animal" fin al chip da chauns
La regenza grischuna è da princip d'accord - malgrà in pèr remartgas criticas - cun ils sbozs per la revisiun da quatter ordinaziuns dal dretg davart epidemias d'animals e davart l'igiena da charn: la "ordinaziun davart la dismessa da products secundars animals ODPA", la "ordinaziun davart epidemias d'animals OFE", la "ordinaziun davart l'import, il transit e l'export d'animals e da products animals OITE" e la "ordinaziun davart la controlla da charn OCC".

La nova ODPA regla confurm a la EU co che las dismessas d'animals, ils uschenumnads "products secundars animals", dastgan vegnir utilisads: products da la categoria 1 ston vegnir ars, quels da la categoria 2 pon vegnir duvrads sco ladim e per la producziun da biogas e products da la categoria 3, quels cun ils ristgs ils pli pitschens, pon vegnir pavlads tranter auter ad animals da chasa. La divisiun en trais categorias dischavantagescha mazlarias decentralas, perquai che la dismessa da products secundars da las categorias 2 e 3 n'è betg economica pervi da las quantitads uschè pitschnas e pervi da las distanzas. Qua pretenda la regenza ina gulivaziun da las grevezzas tranter manaschis gronds e pitschens.

La nova OFE prevesa da marcar e registrar chauns cun in microchip u cun ina tetovaziun. La marcaziun vegn a facilitar ils scleriments cunzunt suenter accidents cun morsas ed en cas da l'erupziun d'ina epidemia. La regenza preferescha il microchip, perquai che sia execuziun è pli economica e pli segira. Però sto la marcaziun da chauns anc vegnir motivada en la OFE areguard sia relevenza.

Contribuziuns chantunalas a differentas instituziuns
- Scuol: Il chantun paja ina contribuziun da var 300'000 francs a l'indriz per far naiv artifiziala ed a la sutgera da 6 da las pendicularas Motta Naluns. Ultra da quai survegn la societad utilisadra in credit d'agid d'investiziun da var 1,8 milliuns francs da la confederaziun.
- Promoziun da la cultura: Var 260'000 francs ha la regenza concedì sco contribuziuns e garanzias da deficit ad ovras ed occurrenzas culturalas. Da quels van 105'000 francs a las producziuns da gruppas professiunalas da teater grischunas.
- Rait da sport Surselva: La regenza ha deliberà 20'000 francs dal fond da sport per colliar en ina rait las uniuns da sport da la Surselva. La Surselva è vegnida elegida da la confederaziun sco regiun da model per la furmaziun d'ina rait regiunala da moviment e da sport e survegn per quai fin l'onn 2005 30'000 francs da la cassa federala.

Projects da vias
- Sviament Claustra : Per ulteriuras installaziuns electricas da current ferm ha la regenza deliberà 4,6 milliuns francs.

chanzlia chantunala dal Grischun

Gremi: regenza
funtauna: rg chanzlia chantunala dal Grischun