La regenza vegn a suttametter al cussegl grond en la sessiun da
zercladur 2004 in sboz per la revisiun parziala da la lescha da taglia
per il chantun Grischun ed in sboz per la revisiun totala da la lescha
davart las finanzas dal chantun Grischun. La cumissiun permanenta per
economia, taxas e politica da stadi dal cussegl grond ha - sut il
presidi da Hansjörg Trachsel - predeliberà la missiva respectiva da la
regenza en sia seduta da mez matg 2004 per mauns dal cussegl grond. Er
la cussegliera guvernativa Eveline Widmer-Schlumpf è stada preschenta a
quella sesida.
Revisiun parziala da la lescha da taglia
Ultra d'ina adattaziun formala dal dretg chantunal vul ins er trair
a niz la revisiun parziala per far differentas assimilaziuns
incontestadas al dretg federal. Quellas pertutgan la nova deducziun
d'invaliditad, l'imposiziun da taglia sin intermediatur(a)s
interchantunal(a)s d'immobiglias sco er la contabilitad commerziala.
Ulteriurs puncts da revisiun concernan la dispensaziun dal minimum
d'existenza, l'indemnisaziun dal chantun tras las vischnancas per la
taxaziun da las persunas natiralas imponidas tenor ils custs sco er la
garanzia da pretensiuns da taglia periclitadas. La cumissiun è suandada
las propostas da la regenza en tut ils puncts da revisiun.
En quest connex è er vegnì discutà il tema da l'imposiziun da taglia
sin persunas giuridicas. La cumissiun e la regenza èn idas d'accord
ch'ina vista cumplessiva ed in'analisa dals avantatgs e dischavantatgs
stoppian preceder a pass concrets en quest sectur.
Revisiun totala da la lescha davart las finanzas dal chantun
Grischun
Il punct principal da la revisiun actuala da la lescha davart las
finanzas è la finanziaziun restanta da la cassa da pensiun chantunala.
Quella dispona d'ina sutgaranzia dapi sia fundaziun l'onn 1902. La
cumissiun è d'accord en quel punct che la finanziaziun restanta da la
cassa da pensiun stoppia vegnir prendida per mauns urgentamain. En quest
connex è er vegnida discutada la dumonda, sche e quant enavant che las
lavurantas ed ils lavurants duajan vegnir integrads en la finanziaziun
restanta. Suenter ina discussiun intensiva ha la cumissiun decidì da
suandar las propostas da la regenza.
In basegn d'adattar la lescha davart las finanzas resulta er tras la
nova constituziun chantunala che cuntegna bler dapli disposiziuns
relevantas per las finanzas che la constituziun veglia. In'ulteriura
finamira da la revisiun è quella d'administrar las finanzas dal chantun
en moda anc pli effizienta ed intenziunada. Uschenavant ch'i n'èn betg
avant maun disposiziuns spezialas, duai la lescha davart las finanzas
valair da nov confurm al senn er per las vischnancas.
In motiv per discussiuns è stada la proposta da la regenza, tenor la
quala la regenza duaja decider definitivamain en cas ch'ina
participaziun existenta vi d'interpresas d'ovras electricas vegnia
augmentada, transferida u alienada. A questa proposta è vegnida fatga la
cuntraproposta d'integrar ina cumissiun cumpetenta dal cussegl grond en
las tractativas. La cumissiun ha la finala sa laschà persvader dal fatg
che las tractativas correspundentas succedian mintgamai sut pressiun da
temp ed aifer paucs dis e che l'integraziun d'ina cumissiun dal cussegl
grond dastgass perquai esser greva. Uschia è ella suandada la proposta
da la regenza.
En connex cun la nova lescha davart las finanzas vegn er la nova
constituziun chantunala suttamessa ad ina revisiun parziala. I sa tracta
latiers principalmain da crear ina pussaivladad da delegaziun en il
sectur da las cumpetenzas dal preventiv. Concretamain vul quai dir ch'il
cussegl grond po - en cas excepziunals - delegar cumpetenzas per
approvar credits a la cumissiun da gestiun ed a la regenza.
Suenter avair tractà intensivamain ils sbozs ha la cumissiun
deliberà unanimamain la missiva da la regenza per mauns dal cussegl
grond.
Gremi: cumissiun dal cussegl grond per economia, taxas e politica da
stadi
Funtauna: rg cumissiun dal cussegl grond per economia, taxas e
politica da stadi