La regenza ha classifitgà las vischnancas dal Grischun tenor lur forza finanziala per ils onns 2006 e 2007. Cumpareglià cun la classificaziun da la forza finanziala dals onns 2004 e 2005 midan totalmain 25 lur classa da forza finanziala. Quest dumber è cleramain pli bass che tar l'ultima classifcaziun, tar la quala anc 38 vischnancas avevan midà classa. Tar nov vischnancas sa tracti d'in spustament al cunfin d'ina classa a l'autra, tschintg vischnancas fan la midada pervi dal svilup da lur forza fiscala, quatter vischnancas pervi da l'adattaziun da lur pe da taglia e tar ils ulteriurs cas giogan ina rolla tant midaments da la forza fiscala sco er midaments dal basegn da finanzas.
Indesch vischnancas cun 6'242 abitantas ed abitants s'avanzan en ina guppa da la forza finanziala pli ferma, entant che 14 vischnancas cun 38'367 abitantas ed abitants appartegnan da nov ad ina gruppa pli debla. La gruppa da las vischnancas descendentas ha in dumber d'abitantas e d'abitants relativamain grond, perquai che er la citad da Cuira - che mida da la gruppa 1 a la gruppa 2 - tutga tiers. La summa da las contribuziuns dal chantun a las vischnancas vegn a s'augmentar, perquai che las midadas en ina gruppa da la forza finanziala pli debla surpassan cleramain - en quai che reguarda las abitantas ed ils abitants - quellas en ina gruppa da la forza finanziala pli ferma.

Gremi: regenza
Funtauna: rg chanzlia chantunala