Occurrenza d'in di per la tscherna da professiun en la chasa da scola Florentini a Cuira
Glindesdi, ils 3 d'october 2005, organisescha la scola superiura Florentini a Cuira - sut la direcziun dal post da stab per dumondas d'egualitad - in di spezial per la tscherna da professiun per scolaras e per scolars da las 2. classas dal stgalim superiur e per lur geniturs. La finamira da questa occurrenza è da promover ina tscherna da professiun averta. Anc adina sa decidan bleras mattas e blers mats per ina tipica "professiun da dunnas" u per ina tipica "professiun d'umens" e sa restrenschan uschia fitg en connex cun lur tscherna da professiun.
L'occurrenza per la tscherna da professiun porscha als giuvenils ed a lur geniturs in access a differents temas davart la tscherna da professiun. Per geniturs da lingua estra stattan a disposiziun translaturas scoladas e translaturs scolads.
La damaun, suenter ina introducziun communabla, visitan las scolaras ed ils scolars differents lavuratoris. Uschia pon ellas ed els barattar experientschas cun giuvenils en la furmaziun professiunala, survegnan infurmaziuns davart la situaziun actuala da plazzas d'emprendissadi e davart la multifariadad dal mund professiunal en noss chantun e sa fatschentan cun lur maletgs da rollas e cun lur cumportament da dependenza. Il suentermezdi han ellas ed els la pussaivladad d'emprender d'enconuscher las professiuns da la tecnica da chasa en differents manaschis a Cuira. Sut instrucziun fabritgeschan là tut las scolaras e tut ils scolars in product ch'ellas e ch'els pon prender a chasa sco regurdanza.
Per ils geniturs cumenza l'occurrenza a las 19.00 cun infurmaziuns generalas davart l'instrucziun da la tscherna da professiun en scola. Suenter visitan els differentas occurrenzas curtas e pon discussiunar tar differents posts cun persunas spezialisadas e cun auters geniturs. Tut tenor lur interess survegnan els infurmaziuns davart il sistem da scolaziun svizzer, davart ils dretgs e las obligaziuns durant l'emprendissadi, davart professiuns artisanal-tecnicas e socialas, davart la tscherna da professiun sin basa da las schlattainas, davart fufragnadis che reusseschan cun success, davart pussaivladads da scolaziun per giuvenils cun difficultads d'emprender e davart la prevenziun da la dependenza.
Las collavuraturas ed ils collavuraturs da las medias èn envidads cordialmain da visitar questa occurrenza.

Ulteriuras infurmaziuns survegnis Vus tar:
Doris Caviezel-Hidber, manadra dal project SCHANZA PER IL GRISCHUN, post da stab per dumondas d'egualitad, Loestrasse 37, 7000 Chur, 081 257 35 73, doris.caviezel@chance.gr.ch

Gremi: post da stab per dumondas d'egualitad
Funtauna: rg post da stab per dumondas d'egualitad