La regenza dal chantun Grischun ha decidì da desdir la cunvegna existenta davart la taxaziun da societads d'ovras electricas per ils 30 da settember 2006.
Las societads grischunas d'ovras electricas vendan l'energia producida a lur acziunarias ed a lur acziunaris. Quellas e quels èn obligads da surpigliar la part da la producziun d'energia che correspunda a lur participaziun.
Tras la vendita da l'electricitad ad interpresas che stattan datiers mancan ils pretschs da scuntrada che resultassan sin il martgà liber. Il problem da la taxaziun d'ovras electricas è ussa d'eruir quests pretschs da scuntrada cun agid d'in model che sa simular il martgà.
Dapi la perioda fiscala 2001 succeda la taxaziun d'ovras electricas tenor il uschenumnà model Pfeiffer. Ils pretschs da scuntrada che resultan da quest model paran a la regenza d'esser nuncuntentaivlamain bass.
Ils pretschs sa chattan d'ina vart sut la media dals pretschs svizzers per la vendita d'electricitad directamain davent da l'ovra electrica. Uschia vegn tegnì quint mo en moda insuffizienta da l'energia accumulada d'auta qualitad che vegn producida cun forza idraulica. I vegn vitiers ch'il svilup dals pretschs sin il martgà internaziunal ha memia pauc effect sin il model.
La regenza na vesa la desditga da la cunvegna betg sco ina refusa generala dal model Pfeiffer. Cun questa desditga duai dentant vegnir pussibilitada ina discussiun pli detagliada dals parameters che furman la basa dal model.

Gremi: regenza
Funtauna: rg chanzlia chantunala dal Grischun