Il chantun Grischun duai contribuir 20 milliuns francs a la construcziun da la porta alpina a Sedrun. Quai propona la regenza grischuna en sia missiva al cussegl grond. La fatschenta vegn tractada dal parlament en la proxima sessiun da december. Ils meds finanzials per la porta alpina duain vegnir concedids en furma d'in credit d'impegn tenor il stadi dals pretschs l'onn 2003. Igl è previs da metter a disposiziun ils credits annuals respectivs tenor il progress da la projectaziun e da la construcziun sco er tenor il basegn finanzial. Per la regenza è il project "porta alpina Sedrun" in schanza singulara per la vallada e per tut la regiun en il territori da l'Alpsur e dal Gottard. La colliaziun directa da la Surselva cun la nova lingia da viafier tras las Alps (NVTA) e tras quai cun ils territoris urbans avra novas perspectivas. Uschia po vegnir meglierada considerablamain la cumpetitivitad d'in entir territori. La porta alpina ha ultra da quai ina forza simbolica per la fidanza en l'avegnir d'ina regiun da muntogna e cuntegna in potenzial impurtant per in svilup persistent. Il project aveva gì in grond sustegn da la regenza grischuna gia en il passà. Pir la stad passada aveva ella concedì in credit da projectaziun dad 800'000 francs. Il project vegn plinavant sustegnì dal cussegl federal, da la regiun Surselva e dals chantuns che cunfineschan cun il Gottard.

Gremi: regenza
Funtauna: rg chanzlia chantunala dal Grischun