Sut il presidi dal president da la cumissiun Georg Donatsch ed en preschientscha dal schef dal departament cumpetent, cusseglier guvernativ Stefan Engler, ha la cumissiun per ambient, traffic ed energia dal cussegl grond (CATE) fatg ina inspecziun dal post multifuncziunal da la NEAT en il tunnel da basa dal Gottard a Sedrun. En reguard a la fatschenta che vegn tractada dal cussegl grond en la sessiun da december per conceder ina contribuziun chantunala a la "porta alpina Sedrun" è la cumissiun sa laschada infurmar al lieu davart il project er da represchentantas e da represchentants da l'uffizi federal da traffic, da l'uffizi federal da la planisaziun dal territori, da l'alptransit Gottard SA sco er d'ulteriuras expertas e d'ulteriurs experts

Differents studis e scleriments supplementars han mussà ch'il project porta alpina è realisabel dal puntg da vista da la construcziun e dal manaschi. La fermada en dumonda n'ha er betg in effect negativ per la capacitad da prestaziun dal tunnel da basa dal Gottard. Cun quest project unic s'augmenta considerablamain la cuntanschibladad da la Surselva per tren. Plinavant sa tracti d'in project cun ina impurtanza per il turissem da tut la Svizra.

Grazia al project porta alpina pon vegnir spetgads – tenor la persvasiun da la CATE – impuls positivs per tut la regiun che rinforzan il sistem regiunal da producziun e da valur agiuntada. Er las finamiras d'in svilup dal territori persistent pon – cun mesiras accumpagnantas adattadas – vegnir sustegnidas.

Sch'il parlament federal avess da refusar il credit per investiziuns preliminaras da 7.5 milliuns francs – ch'è vegnì deliberà dal cussegl federal – vegniss impedida definitivamain la pussaivladad da colliar meglier il traffic da la regiun dal Gottard cun l'axa da traffic dal nord al sid.

Tgi che manchenta questa schanza unica e da lunga durada pervi d'ina optica da spargn da curta vesida sa fa – tenor la persvasiun da la CATE – precis uschè responsabel envers la generaziun futura sco sch'el laschass enavos in mantun da debits.

La cumissiun ha deliberà unanimamain la fatschenta davart la concessiun d'ina contribuziun chantunala.

Gremi: cumissiun per ambient, traffic ed energia
Funtauna: rg cumissiun per ambient, traffic ed energia