Il "program forestal svizzer" che sa basa sin ina revisiun da la lescha federala davart il guaud (LG) vegn crititgà da la regenza grischuna. En sia consultaziun per mauns da l'uffizi federal d'ambient, guaud e cuntrada menziunescha la regenza che las finamiras dal "program forestal svizzer" na possian betg vegnir cuntanschidas cun ils instruments previs en la revisiun da la LG. Tenor la regenza na vegn la repartiziun da las incumbensas tranter la confederaziun ed ils chantuns (RFI) betg reproducida en moda suffizienta en il sboz da consultaziun. Ultra da quai n'è la cunfinaziun tranter las obligaziuns publicas e las obligaziuns da las proprietarias e dals proprietaris betg clera. Plinavant na vegn la prioritad da las resursas sin surfatschas privilegiadas betg accentuada suffizientamain. Dal rest na vegnan ils meds finanzials betg garantids per las prestaziuns publicas prioritaras dal guaud en il senn dal "program forestal svizzer".

Consultaziun tar la lescha federala davart la geoinfurmaziun
Las intervenziuns per part massivas en las cumpetenzas dals chantuns ch'èn previsas en il sboz da la nova lescha federala davart la geoinfurmaziun èn nuncuntentaivlas per la regenza grischuna. Plinavant crititgescha la regenza las consequenzas finanzialas nuncalculablas per ils chantuns e per las vischnancas en il sectur da las restricziuns da la proprietad tenor il dretg public e constatescha che las ordinaziuns executivas mancan. Per ch'ils giavischs dals chantuns vegnian respectads, duai la confederaziun - tenor l'avis da la regenza grischuna - collavurar stretgamain cun ils chantuns suenter che la lescha federala è relaschada, e quai gia tar l'elavuraziun da las disposiziuns executivas.

Da vischnancas e regiuns
- Morissen: La regenza approvescha la midada da la lescha da construcziun ch'è vegnida concludida ils 15 da fanadur 2005 da la radunanza communala. Approvads vegnan er il plan da zonas e plan general da furmaziun 1:2'000 "Naus" ed il plan general d'avertura 1:2'000 "Naus".

Contribuziuns chantunalas a differentas instituziuns
- Archiv cultural da l'Engiadin'auta: Per las lavurs d'inventarisaziun dal relasch Pinösch-Gredig garantescha la regenza a l'archiv cultural da l'Engiadin'auta in sustegn finanzial unic da maximalmain 13'200 francs.

Chaussas persunalas
- Dr. Marianne Toller-Schwarz vegn confermada sco presidenta dal cussegl da fundaziun da l'ospital chantunal e regiunal retic a Cuira fin che las fundaziuns "ospital chantunal e regiunal retic a Cuira" ed "ospital da la crusch a Cuira" èn fusiunadas a la fundaziun "ospital chantunal dal Grischun", maximalmain dentant fin ils 30 da zercladur 2006. Sco represchentantas e sco represchentants dal chantun en il cussegl da fundaziun da l'ospital chantunal e regiunal retic a Cuira vegnan medemamain reelegids fin maximalmain ils 30 da zercladur 2006 cusseglier guvernativ dr. Martin Schmid, Renato Moser, Favugn, dr. med. Walter Lutz, Domat, Cornelia Fintschin, Jenins, e Helen Cabalzar, Cuira.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun